អន្តរជាតិ
យន្តហោះចម្បាំង A-10 មិនទាន់ចូលនិវត្តន៍ព្រោះនៅបន្តកម្ចាត់ក្រុមIS
× ចុងក្រោយរដ្ឋមន្ត្រីការពារជាតិអាមេរិកបានបញ្ជាក់ជាផ្លូវការហើយថា យន្តហោះចម្បាំង A-10 ត្រូវពន្យារពេលចូលនិវត្តន៍រហូតដល់ឆ្នាំ ២០២២ ។ យន្តហោះចម្បាំងដែលប្រឡូកក្នុងប្រតិបត្តិការសឹក តាំងពីឆ្នាំ ១៩៧៥មកនោះ នឹងបន្តប្រតិបត្តិការរបស់ខ្លួនទៀតដើម្បីប្រមាញ់ក្រុមរដ្ឋឥស្លាម ហើយដល់ឆ្នាំ ២០២២ ទម្រាំយន្តហោះប្រដេញ F-35 នឹងមកជំនួសតំណែងយន្តហោះនេះ។ តើយន្តហោះចម្បាំងស៊េរីចាស់នេះមានលក្ខណៈសម្បត្តិពិសេសអ្វីខ្លះ បានជាក្រសួងការពារជាតិអាមេរិកសុខចិត្តពន្យារពេលចូលនិវត្តន៍?
សូមស្តាប់ការបកស្រាយរបស់លោកសៅ ផលនិស្ស័យ៖
ថ្ងៃព្រហស្បតិ៍ ទី ៤ កុម្ភៈ ប្រមុខការពារជាតិអាមេរិកលោក Ashton Carter បានប្រកាសចុងក្រោយថា យន្តហោះចម្បាំង A-10 Warthog នឹងនៅបន្តបេសកម្មរបស់ខ្លួនទៀតរហូតដល់ឆ្នាំ ២០២២ ទើបយន្តហោះនេះចូលនិវត្តន៍ជាផ្លូវការ។
រដ្ឋមន្ត្រីការពារជាតិអាមេរិក បញ្ជាក់បែបនេះដើម្បីបញ្ចប់មន្ទិលសង្ស័យកន្លងមកពាក់ព័ន្ធការចូលនិវត្តន៍នៃយន្តហោះចម្បាំងប្រភេទនេះ ក្នុងពេលលោកបង្ហាញរបាយការណ៍ហិរញ្ញវត្ថុដែលមន្ទីរបញ្ចាកោណត្រូវដាក់ស្នើទៅសភានៅពេលខាងមុខ។ ដើម្បីទុកយន្តហោះនេះឲ្យបម្រើការងារបន្ត គេត្រូវការថវិកាបន្ថែមដើម្បីមើលជួសជុល ឬថែទាំ និងសម្រាប់ឧបត្ថម្ភអ្នកបើកបរផងដែរ។
លោក Carter បានបញ្ជាក់ថាកញ្ចប់ថវិកានេះពន្យារពេលចូលនិវត្តន៍យន្តហោះ A-10 នេះរហូតដល់ឆ្នាំ ២០២២ ទម្រាំយន្តហោះ F-35 ចូលប្រតិបត្តិការជំនួសវិញម្តង។ ដូច្នេះអាមេរិកអាចមានយន្តហោះចម្បាំងគ្រប់គ្រាន់ដើម្បីបំពេញបេសកម្មក្នុងជម្លោះពេលបច្ចុប្បន្ននៅក្រៅប្រទេស ។
ក្រោយរដ្ឋមន្ត្រីការពារជាតិអាមេរិកប្រកាសបែបនេះ សមាជិកសភាអាមេរិកបានស្វាគមន៍និងគាំទ្រការសម្រេចចិត្តទុកឲ្យយន្តហោះចម្បាំង A-10 បន្តការងាររបស់ខ្លួនទៀតរហូតដល់៦ឆ្នាំ។ សមាជិកព្រឹទ្ធសភាបក្សសាធារណរដ្ឋ លោក John McCain ប្រធានគណកម្មាធិការការពារជាតិនៃព្រឹទ្ធសភាអាមេរិក ប្រកាសគាំទ្រសម្រេចចិត្តនេះពេញទំហឹង ដោយលោកបញ្ជាក់ថា គ្មានយន្តហោះចម្បាំងឯណាផ្សេងទៀតដែលអាចមានសមត្ថភាពពិសេសបំពេញប្រតិបត្តិការគាំទ្រទ័ពថ្មើជើងក្នុងស្ថានភាពគ្រោះថ្នាក់មានប្រសិទ្ធភាពជាងយន្តហោះ A-10 នេះឡើយ។ លោកបន្ថែមថា លោករង់ចាំមើលយន្តហោះ A-10 បំពេញបេសកម្មកម្ចាត់ក្រុមរដ្ឋឥស្លាមឬក្រុមដែស្ហ នៅមជ្ឈិមបូព៌ា ជួយគាំទ្របក្សសម្ព័ន្ធយោធាណាតូដើម្បីទប់ទល់រុស្ស៊ី និងចេញប្រតិបត្តិការក្នុងបេសកម្មយោធានានាទូទាំងពិភពលោកក្នុងពេលចាំបាច់។
តាមពិតទៅ ក្រសួងការពារជាតិសុខចិត្តរក្សាទុកយន្តហោះចម្បាំង A-10 Warthog ឲ្យបម្រើការបន្តទៀតនោះដោយសារយន្តហោះនេះមានលក្ខណៈពិសេសច្រើន។ យន្តហោះនេះស៊េរីចាស់មែនព្រោះចូលបំពេញភារកិច្ចក្នុងឆ្នាំ ១៩៧៥ តែអ្វីដែលពិសេសវាធ្លាប់បំពេញបេសកម្មសាបព្រួសប្រជាធិបតេយ្យច្រើនកន្លែងពាសពេញពិភពលោក។
១. A-10 បំពេញបេសកម្មសាបព្រួសប្រជាធិបតេយ្យ
យន្តហោះនេះត្រូវបានប្រើប្រាស់ដំបូងដើម្បីអន្តរាគមន៍ក្នុងសង្គ្រាមឈូងសមុទ្រក្នុងឆ្នាំ ១៩៩១ ក្នុងពេលដែលកងទ័ពអ៊ីរ៉ាក់ឈ្លានពានប្រទេសគុយវ៉ែត។ ក្នុងប្រតិបត្តិការដោយសហកាជាមួយទ័ពសម្ព័ន្ធមិត្តក្រោមឆ័ត្រអង្គការសហប្រជាជាតិ យន្តហោះនេះបានកម្ទេចរថក្រោះអ៊ីរ៉ាក់ ប្រហែល៩០០ គ្រឿងនិងយាន្តជំនិះយោធា និងកាំភ្លើងធំរាប់ពាន់គ្រឿងផ្សេងទៀត។ ដោយសារប្រតិបត្តិការដ៏ជោគជ័យនេះហើយ ទើបបានជាគេបន្តប្រើប្រាស់វាទៀតនៅក្នុងសង្គ្រាមសាបព្រោះប្រជាធិបតេយ្យនិងអន្តរាគមន៍យោធាអាមេរិកផ្សេងទៀត។
ក្រោយមកយន្តហោះនេះចូលប្រយុទ្ធប្រកៀកស្មាជាមួយទ័ពណាតូក្នុងសមរភូមិក្នុង ប្រទេសបូស្នៀ នៅឆ្នាំ ១៩៩៤ ហើយបន្តចូលមកអន្តរាគមន៍នៅកូសូវូនៅឆ្នាំ ១៩៩៩ ទៀត។ ក្នុងឆ្នាំ ២០០៣ អាមេរិកក៏បានពង្រាយយន្តហោះនេះទៅក្នុងអន្តរាគមន៍នៅអ៊ីរ៉ាក់ដើម្បីផ្តួលរំលំរបបលោក សាដាម ហ៊ូសេន ។ បន្ទាប់មកចេញអន្តរាគមន៍ក្នុងប្រតិបត្តិការរំដោះប្រជាជនលីប៊ីដោយគាស់រំលើងរបបដឹកនាំលោក កាដាហ្វីនៅក្នុងឆ្នាំ ២០១១ថែមទៀតផង។
ពេលក្រុមភេរវជនរដ្ឋឥស្លាមឬក្រុមដែស្ហ ចេញមុខអុកឡុកកាន់តែខ្លាំង គំរាមកំហែងសន្តិសុខពិភពលោក A-10 បានចេញមុខជាថ្មីទៀតនៅមជ្ឈិមបូព៌ា ដើម្បីតាមប្រមាញ់ក្រុមនេះ។ ដោយសារប្រតិបត្តិការនៅមជ្ឈិមបូព៌ា ប្រឆាំងក្រុមភេរវជននេះជាសង្គ្រាមទ័ពអាកាសនិងគាំទ្រទ័ពថ្មើរជើងក្នុងតំបន់ A-10 លេចមុខលេចមាត់ជាថ្មីទៀតព្រោះសមត្ថភាពរបស់វានិងសព្វាវុធដែលគេបំពាក់ជាប់យន្តហោះនោះ។
២.លក្ខណៈពិសេសអ្វីខ្លះដែលយន្តហោះនេះមាន?
តាមពិតទៅ A-10 មានលក្ខណៈសំខាន់មួយចំនួន ទើបបានជាក្រសួងការពារជាតិអាមេរិករក្សាទុកឲ្យវាបន្តបម្រើការងារទៀត។ លក្ខណៈពិសេស ទីមួយ A-10 អាចហោះហើរក្នុងរយៈកម្ពស់ទាបដើម្បីគាំទ្រទ័ពថ្មើរជើងក្នុងកាលៈទេសៈគ្រោះថ្នាក់ ដែល យន្តហោះចម្បាំងស៊េរីថ្មីផ្សេងទៀតមិនអាចធ្វើបាន។
ក្នុងពេលទ័ពថ្មើជើងជួបគ្រោះថ្នាក់ យន្តហោះនេះអាចហោះបន្ទាបខ្លួនដើម្បីសង្គ្រោះនិងគាំទ្រទ័ពទាំងនោះឲ្យរួចផុតពីគ្រោះថ្នាក់។
ម្យ៉ាងយន្តហោះនេះអាចហោះឡើង និងចុះបានរហ័សមិនរើសទីតាំង មិនចាំបាច់រត់លើផ្លូវមានចម្ងាយវែងដូចយន្តហោះចម្បាំងឯទៀត ហើយវាក៏អាចហោះហើរពេលថ្ងៃ ឬយប់បានស្ថានភាពអាកាសធាតុបែបណាក៏ដោយ មិនបាច់ភ័យ។ ហើយរឿងដែលសំខាន់នៅក្បាលយន្តហោះមានបំពាក់កាំភ្លើងយន្តបាញ់គ្រាប់ ៣០មីលីម៉ែត្រ ហើយក្នុងមួយនាទីយន្តហោះនេះបាញ់ចេញគ្រាប់បាន ៣៩០០គ្រាប់ថែមទៀត ដែលអាវុធនេះអាចកម្ទេចទីតាំងសត្រូវបានរហ័សនិងមានប្រសិទ្ធភាពខ្ពស់៕
© រក្សាសិទ្ធិដោយ thmeythmey.com