ទ្រឹស្តី «ផឹកស៊ីប្រយ័ត្នជាប់គុក» កំពុងពេញនិយមជាង «លើកដាច់សាច់ស្អាត»

ជាតិ

ទ្រឹស្តី «ផឹកស៊ីប្រយ័ត្នជាប់គុក» កំពុងពេញនិយមជាង «លើកដាច់សាច់ស្អាត»

05, Feb 2016 , 9:59 pm

រូបភាព

ដោយ:

ភ្នំពេញ៖ ទ្រឹស្តី «ផឹក ផឹកឲ្យគេសែង ផឹកដើរខ្លួនឯង ផឹកធ្វើអី» «លើកដាច់សាច់ស្អាត» «ជល់មួយជួយកម្លាំង» «មកធ្វើអី បើមកមិនផឹក» «ផឹកស៊ី កុំទម្រន់ បើមិនវៃប្រពន្ធ គឺវៃម៉ែក្មេក»លែងពេញនិយមទៀតហើយ ពីព្រោះតែបុរសខ្មែរដែលចូលចិត្តសេពគ្រឿងស្រវឹងមួយចំនួននៅក្នុងពេលបច្ចុប្បន្ននេះចាប់ផ្តើមគិតពីកម្រិតចំនួនជាតិអាល់កុលនៅក្នុងប្រភេទស្រាបៀរមុនពេលដែលពួកគេទទួលទាន ព្រមទាំងកំណត់ចំនួនយ៉ាងច្បាស់លាស់។ និន្នាកានេះ កើតមានក្រោយពេលដែលច្បាប់គ្រប់គ្រងគ្រឿងស្រវឹងថ្មីត្រូវបានរឹតបណ្តឹងនៅដើមឆ្នាំ២០១៦នេះ និងជាស្មារតីភ្ញាក់រលឹកគិតគូពីសុខភាពផងដែរ។ ពួកគេបានប្រើទ្រឹស្តីថ្មីដើម្បីចំអន់គ្នាថា៖«ផឹកស៊ីប្រយ័ត្នជាប់គុក»។

ថ្ងៃមួយ នៅក្នុងបន្ទប់ស្ទីមមួយកន្លែងនៅសង្កាត់បឹងកេងកង៣ ក្នុងរាជធានីភ្នំពេញ មានបុរសចំណាស់ប្រមាណពីបួន ទៅប្រាំនាក់ នាំគ្នាស្ទីមបណ្តើរ ជជែកគ្នាពីរឿង«ផឹកស៊ី»បណ្តើរ ហើយសារព័ត៌មានថ្មីៗបានស្តាប់ឮ។បុរសម្នាក់វ័យជាង៥០ឆ្នាំចាប់ផ្តើមលើកឡើងមុនគេថា៖«អត់បានទេឥឡូវផឹកស្រួល ឬស្រួល អស់លុយហើយ អាចត្រូវគេចាប់ដាក់គុកទៀត»។ លោកបន្តថា ជាធម្មតាលោកចូលចិត្តស្រាបៀរ អាបេសេ (ABC) ហើយលោកពិសារមិនតិចជាងបីកំប៉ុងនោះទេ ក្នុងពេលជួបជុំមិត្តភក្តិម្តង។ តែមកដល់ពេលនេះវិញ លោកអះអាងថា៖«ផឹកដូចមុនអត់កើតទេខ្លាចគេឲ្យផ្លុំខ្យល់ទៅលើសជាតិអាល់កុល។ ខ្ញុំផឹកតែមួយ ឬពីរកំប៉ុងប៉ុណ្ណោះព្រោះខ្លាចគេផាកពិន័យ ណាមួយសុខភាពក៏ចុះខ្សោយដែរ»។

បន្ទាប់ពីបុរសវ័យចំណាស់ បុរសវ័យជាង២៥ឆ្នាំម្នាក់ទៀត មានកាន់កូនកន្សែងមួយ ជូតញើសបណ្តើរ និយាយបន្តបណ្តើរថា ជាធម្មតាលោកចូលចិត្តស្រាបៀរ ហែននីគែន (Heineken) ព្រោះវាមានរស់ជាតិស្រាលល្មម ហើយលោកអាចពិសារបានច្រើនជាងគេ គឺចាប់ពីរប្រាំដបឡើងទៅ ក្នុងពេលជួយជុំមិត្តភក្តិម្តង។ លោកបន្ថែមថា រាល់ពេល«ផឹកស៊ី»ពួកលោកតែងជម្រុញគ្នាទៅវិញទៅមកឲ្យពិសារច្រើនៗយកឈ្នះចាញ់។ អ្នកដែលពិសារបានច្រើនជាងគេត្រូវបាន គេសរសើរថាជាអ្នកខ្លាំង ចំណែកឯអ្នកដែលពិសារបានតិចជាងគេ នឹងត្រូវគេបង្អាប់ថាខ្សោយ។ ប៉ុន្តែមួយរយៈពេលចុងក្រោយនេះវិញ ពួកលោកឈប់ប្រើទស្សនៈជម្រុញការផឹក ដូចជា៖ «មកធ្វើអី បើមកមិនផឹក»ឬ«លើកដាច់សាច់ស្អាត»ទៀតហើយ ពួកលោកប្រើទ្រឹស្តីថ្មីថា«ផឹកស៊ីហាមបង្ខំ ផឹកបានប៉ុណ្ណា យកប៉ុណ្ណឹង»«ផឹកស៊ីប្រយ័ត្នជាប់គុក»។

មានមាឌធំក្រអាញ ក្បាលពោះធំបន្តិច បុរសចំណាស់វ័យជាង៤០ឆ្នាំម្នាក់ទៀត ដែលមើលទៅទំនងជាអ្នកពូកែពិសារស្រាបៀរនោះ បន្ទរថា៖«កាលពីមុនផឹកស្រវឹងហើយ រត់មកស្ទីម ដល់ពេលស្ទីមរាងស្វាងហើយ ស្រួលមិនស្រួលចេញទៅវិញនាំគ្នាដាក់ទៀត។ ពេលខ្លះផឹកទល់ភ្លឺក៏មានដែរ បើគិតជាចំនួនវិញមិនដឹងជាប៉ុន្មានកោះទេ»។យ៉ាងណាក៏ដោយទម្រាប់ទទួលទានគ្រឿងស្រវឹងច្រើនៗ របស់បុរស ចំណាស់រូបនេះត្រូវបានផ្លាស់ប្តូរហើយ ក្រោយពេលដែលច្បាប់គ្រប់គ្រងការទទួលទានគ្រឿងស្រវឹងថ្មីត្រូវបានរឹតបន្តឹងនោះ។ លោកបានអះអាងយ៉ាងដូច្នេះថា៖«ខ្ញុំចាប់ផ្តើមកាត់បន្ថយហើយចាប់ពីពេលនេះទៅ ព្រោះខ្លាចថ្ងៃណាចៃដន្យត្រូវប៉ូលិសចាប់ឲ្យផ្លុំខ្យល់ និងត្រូវគេថតចុះកាសែត ឬហ្វេសប៊ុក ទៀតនោះច្បាស់ជាខ្មាស់គេណាស់។ ណាមួយចាស់ហើយ គិតគូរហាត់ប្រាណ ជិះកង់វិញម្តង»។

សូមរំលឹកថា ច្បាប់ចរាចរណ៍ផ្លូវគោកឆ្នាំ២០១៥ ក្នុងជំពូកទី១០ មាត្រា៧៧ បានចែងថា៖ ជនណាបើកបរយានយន្តនៅពេលដែលខ្លួនស្ថិតក្នុងភាពស្រវឹង ដោយមានជាតិអាល់កុលចាប់ពី ០,៤០ មីលីក្រាម ក្នុងមួយលីត្រខ្យល់ ឬចាប់ពី ០,៨០ក្រាម ក្នុងមួយលីត្រឈាមឡើងទៅ ត្រូវផ្តន្ទាទោសដាក់ពន្ធនាគារពី ១ខែ ទៅ ៦ខែ និងពិន័យជាប្រាក់ ពី ៨សែនរៀល ទៅ ៤លានរៀល៕