អន្តរជាតិ
លោកខាងលិចផ្តល់លុយ១០ពាន់លានជួយស៊ីរី ខណៈកិច្ចចរចាសន្តិភាពជាប់គាំង
× មេដឹកនាំពិភពលោកដែលប្រមូលផ្តុំគ្នានៅទីក្រុងឡុងដ៏ដើម្បីជជែកគ្នាពីបញ្ហាជម្លោះស៊ីរី កាលពីថ្ងៃ ព្រហស្បតិ៍ ទី ៤ កុម្ភៈម្សិលមិញនេះ បានប្រកាសផ្តល់ជំនួយ ១០ពាន់លានដុល្លារសម្រាប់ជួយប្រជាជនស៊ីរី។ ប៉ុន្តែការប្រកាសផ្តល់ជំនួយនេះកើតឡើងស្របពេលដែលកិច្ចចរចាបញ្ហាស៊ីរីត្រូវពន្យារពេលរហូតដល់ចុងខែកុម្ភៈ។
ក្នុងសន្និសីទបញ្ហាស៊ីរីនៅថ្ងៃព្រហស្បតិ៍ទី ម្សិលមិញ បណ្តាមេដឹកនាំពិភពលោកមានអង់គ្លេស អាឡឺម៉ង់ និងសហរដ្ឋអាមេរិកផងនោះ បានប្រកាសផ្តល់កញ្ចប់ជំនួយទំហំ ១០ពាន់លានដុល្លារសម្រាប់ជួយប្រជាជនស៊ីរីផង។ ជំនួយនេះនឹងផ្តោតលើបញ្ហាស្បៀងអាហារ អប់រំ និងបង្កើតការងារសម្រាប់ប្រជាជនស៊ីរីដែលកំពុងរស់នៅក្នុងប្រទេសផងនិងកំពុងរស់នៅប្រទេសដទៃផងដែរ។
ប៉ុន្តែក្តីសង្ឃឹមថា ការផ្តល់ជំនួយនេះអាចកែប្រែស្ថានភាពប្រជាជនស៊ីរី ហាក់បីដូចជាស្រពិចស្រពិលនៅឡើយ ព្រោះបច្ចុប្បន្នកិច្ចចរចាសន្តិភាពហ្សឺណែវ ត្រូវពន្យារពេលរហូតដល់ថ្ងៃ ២៥កុម្ភៈទៀត។ ដែលនេះមានន័យថាការចរចាបញ្ចប់សង្គ្រាមស្ថិតក្នុងភាពស្រពិចស្រពិលនៅឡើយ ហើយវាក៏បង្កការលំបាកដល់ការផ្តល់ជំនួយទាំងនេះទៅកាន់ជនរងគ្រោះដោយភ្លើងសង្គ្រាមដែរ។ ដរាបណាមិនទាន់មានបទឈប់បាញ់និងមានការរៀបចំសម័យអន្តរកាលនយោបាយទេ ជំនួយនេះពិបាកផ្លាស់ប្តូរស្ថានភាពនិងជីវិតរបស់នៅរបស់ប្រជាជនណាស់។
ប្រទេសអឺរ៉ុបជាពិសេសអាឡឺម៉ង់ចេញមុខចេញមាត់ខ្លាំងដែរក្នុងការជួយបញ្ចប់សង្គ្រាមរ៉ាំរ៉ៃនៅស៊ីរីព្រោះអាឡឺម៉ង់កំពុងតែរងទុក្ខព្រោះវិបត្តិជនភៀសខ្លួនដែលរត់មកពីតំបន់មជ្ឈិមបូព៌ាជាពិសេសលីប៊ីនិងស៊ីរីនេះ។ អធិការបតីអាឡឺម៉ង់លោកស្រី អែនជែឡា មឺហ្កែល បានប្រកាសផ្តល់កញ្ចប់លុយប្រហែល២.៦ពាន់លានដុល្លារសម្រាប់ប្រជាជនស៊ីរីនេះ ។ បើគ្មានដំណោះស្រាយបន្ទាន់ណាមួយទេ អាឡឺម៉ង់ក៏ប្រហែលជាត្រូវរងបន្ទុកធ្ងន់ព្រោះតែវិបត្តិជនភៀសខ្លួនអុកឡុកអឺរ៉ុបនេះទៀត។ ចំណែកសមាជិកសហភាពអឺរ៉ុបផ្សេងទៀតបានចូលរួមគ្នាផ្តល់ជំនួយ៣.៤ពាន់លានដុល្លារអាមេរិក ។
នាយរដ្ឋមន្ត្រីអង់គ្លេសលោក ដេវីដ ខេមេរ៉ូន ដែលជាសហប្រធាននៃសន្និសីទនេះបានអះអាងថារដ្ឋាភិបាលលោក ផ្តល់ជំនួយ ១.៧៤ពាន់លានដុល្លារដើម្បីជួយដោះស្រាយបញ្ហាវិបត្តិមនុស្សជាតិនៅក្នុងប្រទេសស៊ីរី ហើយវាជាវិធានការថ្មីដែលអាចជួយប្រជាជនស៊ីរីបាន។ លោកថា ៖«ការប្រឹងប្រែងនិងប្តេជ្ញារបស់យើងបច្ចុប្បន្ននេះជាសារសម្រាប់ប្រជាជនស៊ីរីថា យើងនៅបន្តឈរនៅជាមួយអ្នកនិងគាំទ្រអ្នកទោះបីជាយូរប៉ុណ្ណាក៏ដោយ»។ រីឯសហរដ្ឋអាមេរិកដែលចង់ឲ្យជម្លោះស៊ីរីឆាប់ចប់នោះក៏បានប្រកាសផ្តល់ជំនួយ ៨៩០លានដុល្លារសម្រាប់ដោះស្រាយវិបត្តិមនុស្សជាតិនៅស៊ីរីដូចគ្នា ។
ថ្មីៗនេះ កងទ័ពរដ្ឋាភិបាលលោក បាសា អាល់ អាសាដ ក្រោមការគាំទ្ររបស់រុស្ស៊ីនោះ បានចាប់ផ្តើមវាយប្រហារនៅតំបន់ធំនៅភាគខាងជើងទីក្រុង Aleppo ដោយការវាយប្រហារនោះបានបង្ខំឲ្យប្រជាជនស៊ីរី ៤ម៉ឺននាក់រត់ភៀសខ្លួនផង។
ប្រជាជនស៊ីរីប្រហែល ៤.៦លាននាក់បានរត់ភៀសខ្លួនទៅរកកន្លែងមានសុវត្ថិភាព ជាពិសេសទៅសុំសិទ្ធិជ្រកកោននៅប្រទេសមួយចំនួនដូចជា ហ្សកដានី លីបង់ តួកគី អ៊ីរ៉ាក់ និងអេហ្ស៊ីបផងដែរ ហើយប្រជាជនរាប់ពាន់នាក់ផ្សេងទៀតផ្សងព្រេងទៅរស់នៅតំបន់អឺរ៉ុបផង៕
© រក្សាសិទ្ធិដោយ thmeythmey.com