នាយកវិទ្យាស្ថានខុងជឺ និទានរឿងចូលឆ្នាំចិន និងអត្ថន័យនៃការរៀបចំផ្សេងៗ

ជាតិ

នាយកវិទ្យាស្ថានខុងជឺ និទានរឿងចូលឆ្នាំចិន និងអត្ថន័យនៃការរៀបចំផ្សេងៗ

07, Feb 2016 , 10:00 am

រូបភាព

ដោយ:

ភ្នំពេញ៖ បុណ្យចូលឆ្នាំចិនគឺជាបុណ្យប្រពៃណីត្រូវបានប្រជាជនចិនប្រារព្ធធ្វើអស់រយៈពេលប្រមាណជាជាង៤០០០ឆ្នាំមកហើយ ពោលគឺចាប់ផ្ដើមចាប់តាំងពីជាង២០០០ឆ្នាំមុនគ.ស។ នេះបើតាមការលើកឡើងរបស់នាយកវិទ្យាស្ថានខុងជឺនៃរាជបណ្ឌិត្យសភាកម្ពុជា លោក ជា មុនីឫទ្ធិ។

ពិធីបុណ្យចូលឆ្នាំចិន ត្រូវបានភ្ជាប់ជាមួយរឿងនិទានមួយបានដំណាលថា កាលពីជាង២០០០ឆ្នាំមុនគ.ស មានសត្វម្យ៉ាងឈ្មោះជាភាសាចិនថា សត្វនៀន ដែលមានន័យជាភាសាខ្មែរថា សត្វឆ្នាំ ជារៀងរាល់ឆ្នាំឲ្យតែដល់ខែរងារ វាតែងតែចេញមកភូមិអ្នកស្រុកដើម្បីស៊ីមនុស្ស។

ដល់ខែរងាម្ដងៗអ្នកភូមិតែងតែនាំគ្នារត់គេចខ្លួនអស់ដើម្បីរក្សាជីវិតពីសត្វកំណាចមួយនេះ។ នៅក្នុងឆ្នាំមួយនោះមានព្រឹត្តិការណ៍មួយបានកើតឡើង គឺដល់រដូវរងា អ្នកភូមិបានរត់គេចខ្លួនអស់ មានតែតាចាស់ម្នាក់មិនបានរត់គេចខ្លួននោះទេ គឺគាត់នៅអាំងភ្លើង ហើយសត្វនៀនឬសត្វឆ្នាំ បានទៅដូចរាល់ឆ្នាំហើយបំណងមកស៊ីតាចាស់ម្នាក់នោះដែលកំពុងអង្គុយអាំងភ្លើង។ ប៉ុន្តែពេលមកជិតដល់សត្វនោះស្រាប់តែរត់បាត់ ហើយអ្នកភូមិក៏ឆ្ងល់ថាហេតុអ្វីជាសត្វនោះខ្លាចតាចាស់ម្នាក់នេះ?

ប្រហែលជាទី១ អាចមកពីភ្លើង ទើបធ្វើឲ្យសត្វនោះរត់។ ទី២ឬមកពីភ្លើងពណ៌ក្រហម ទើបធ្វើឲ្យសត្វនោះវារត់។ ទី៣ អាចមកពីសត្វនោះខ្លាចសម្លេងដែលឮសូរ ពីការដុតដើមឬស្សី ព្រោះឬស្សីនៅពេលគេដុតវាធ្វើឲ្យឮសំឡេង។ នៅឆ្នាំបន្តរបន្ទាប់អ្នកភូមិក៏ធ្វើបែបនោះដោយ នាំគ្នាលាបផ្ទះពណ៌ក្រហម ដុតភ្លើង ហើយដាក់សំឡេងឲ្យផ្ទុះ ហើយសត្វនោះក៏មិនមកមែន។

ចាប់តាំងពីពេលនោះមក ប្រជាជនចិនក៏តែងតែនាំគ្នាធ្វើបែបនេះជារៀងរាល់ឆ្នាំ ដើម្បីប្រារព្ធពិធីបុណ្យចូលឆ្នាំចិនរហូតមក។ រហូតមកដល់ពេលបច្ចុប្បន្ននេះគេប្រើចង្គៀងគោម ដោយមានលាបពណ៌ក្រហម និងដុតផាវបង្កើតជាសំឡេងផ្ទុះជារៀងរាល់ឆ្នាំមក ដែលតំណាងលាបផ្ទះពណ៌ក្រហម ដុតភ្លើង ហើយដាក់សំឡេងឲ្យផ្ទុះនោះ។ នេះជាការលើកឡើងរបស់លោក ជា មុនីឫទ្ធិ ។

លោក ជា មុនីឫទ្ធិ ក៏បានបញ្ជាក់បន្ថែមពីអត្ថន័យទាក់ទងរបស់មួយចំនួន ដែលគេប្រើប្រាស់នៅក្នុងការរៀបចំពីធីបុណ្យចូលឆ្នាំនេះផងដែរ។ លោកបានពន្យល់ថា៖ «អាំងប៉ាវគឺជាក្រដាសក្រហមដែលប្រើសម្រាប់ជូនពរគ្នា។ កាលពីសម័យបុរាណគេប្រើក្រដាស់ក្រហមនេះ ដោយសារពណ៌ក្រហម តំណាងឲ្យភាពសម្បូរសប្បាយ ភាពរុងរឿង និងដើម្បីកម្ចាត់ឧបទ្រពផ្សេងៗ ប៉ុន្តែក្រោយមកដើម្បីធ្វើឲ្យមនុស្សសប្បាយចិត្ត គេក៏ចាប់ផ្ដើមដាក់លុយ»។

ទាក់ទងនឹងរបាំម៉ុងសាយសត្វតោ និងសត្វនាគ លោក មុនីឫទ្ធិ បញ្ជាក់ថា វាមានន័យថាជាអ្នកការពារ ហើយគេយករបាំពីរនេះមកសម្ដែងដើម្បីកម្ចាត់ឧបទ្រព ឲ្យទៅឲ្យឆ្ងាយជាដើម។ ព្រោះតោ តំណាងជាសត្វការពារ ចំណែកនាគតំណាងឲ្យសត្វមួយដែលមានភាពខ្លាំងខ្លាលើសគេ ។

ដោយឡែកមុខម្ហូបសំខាន់ៗបួនប្រភេទដូចជា គាវ, ត្រី, នំឡើង,និង នំអ៊ី គឺជាមុខម្ហូបដែលមិនអាចខ្វះបាននៅក្នុងពីធីបុណ្យចូលឆ្នាំប្រពៃណីចិននេះ។ មុខម្ហូបទាំងនេះមានអត្ថន័យដូចជា៖ គាវ ជាប្រភេទម្ហូបដែលគេខ្ចប់ដូចជាលុយចិនសម័យបុរាណ ហើយពេលខ្លះគេដាក់កាក់នៅខាងក្នុងនោះទៀត នៅពេលដែលគេញាំទៅបានប៉ះចំកាក់ នោះគេគិតថា នៅឆ្នាំនេះគេនឹងមានសំណាងល្អ។

ចំណែកត្រី នៅក្នុងសូរសំឡេងភាសាចិន ពាក្យត្រីនេះមានន័យថា បរិបូណ៌ ហូរហៀរ។ រីឯ នំឡើង តំណាងឲ្យភាពខ្ពង់ខ្ពស់ ភាពរុងរឿង រកស៊ីមានបាន ឡើងមុខនាទី ឡើងបុណ្យសក្កិជាដើម។ យ៉ាងណាម៉ិញ នំអ៊ី ដោយសារនំនេះ មានរាងមូលនៅក្នុងភាសាចិន មានន័យថាច្រើន គឺគេសំដៅដល់ការមានលុយច្រើនជាដើម។

រីឯ រសជាតិផ្អែមរបស់នំអ៊ីនេះគឺ តំណាងឲ្យការរស់នៅក្នុងគ្រួសារ មានការស្រឡាញ់គ្នា ផ្អែមល្ហែមជាមួយគ្នាជាដើម។ ជារួមមុខម្ហូបទាំងបួន នេះគឺតំណាងឲ្យ សំណាងល្អ ភាពសម្បូរហូហៀរ ភាពរុងរឿង មានបុណ្យសក្កិល្អ មានលុយកាក់ច្រើន គ្រួសារស់នៅមានសុខសុភមង្គលជាមួយគ្នា។

នៅក្នុងបុណ្យចូលឆ្នាំចិននេះ គេតែងតែឃើញមានមុខម្ហូបមួយមុខទៀតនោះគឺ មីឆា។ ការដែលគេតែងតែធ្វើមីឆានេះគឺដោយសារតែ ទី១. ជនជាតិចិនជាអ្នកចូលចិត្តបរិភោគមី ហើយម្យ៉ាងវិញទៀតដោយសារតែ ចិនមានស្រូវអង្ករតិច ហេតុនេះគេក៏កិនអង្ករដែលទទួលបានទៅជាម្សៅ ហើយធ្វើជាមីទៅ នឹងបានច្រើន។ ចំណែកទី២. ដោយសារគេគិតសរសៃមីវែង ហេតុនេះតំណាងឲ្យអាយុវែង។ នៅពេលដែលគេបរិភោគមី នោះនឹងធ្វើឲ្យគេមានអាយុវែងជាដើម ទើបពេលហូបមីគេមិនឲ្យកាត់ទេព្រោះខ្លាចដាច់អាយុ។
ចំណែក សម្លរចាប់ឆាយ ក៏ជាមុខម្ហូបមួយមុខផ្សេងទៀតដែលគេតែងតែឃើញមាន ក្នុងពិធីបុណ្យចូលឆ្នាំចិននេះផងដែរ។

លោក ជាមុន្នីឫទ្ធិ បានអះអាងថា មូលហេតុដែលគេដាក់ឈ្មោះថាសម្លរចាប់ឆាយ គឺដោយសារគេយកសម្លរដែលសល់ៗមកបញ្ចូលគ្នា ដើម្បីរក្សាទុកកុំឲ្យផ្អូម ព្រោះនៅក្នុងរយៈពេលបីថ្ងៃនៃពិធីបុណ្យចូលឆ្នាំនេះគឺមិនបានទៅផ្សារនោះទេ។ នៅពេលដែលគេបញ្ចូលមុខម្ហូបចូលគ្នាច្រើនមុខបែបនេះ គេក៏មិនដឹងជាដាក់ឈ្មោះថាជាមុខម្ហូបអី ក៏ដាក់ឈ្មោះថាជា សម្លចាប់ឆាយ៕