ជម្លោះសង្ឃនៅកំពង់ស្ពឺ៖ រដ្ឋមន្ត្រីក្រសួងធម្មការចុះទៅដោះស្រាយដោយផ្ទាល់

ជាតិ

សង្គមជាតិ

ជម្លោះសង្ឃនៅកំពង់ស្ពឺ៖ រដ្ឋមន្ត្រីក្រសួងធម្មការចុះទៅដោះស្រាយដោយផ្ទាល់

09, Feb 2016 , 2:59 pm

រូបភាព

ដោយ: ម៉ៅ សុផា

កិច្ចប្រជុំអំពីអធិករណ៍នៅវត្ត ជ្រៃហូរព្នៅ ស្ថិតនៅក្នុងឃុំវាល ស្រុកគងពិសី ខេត្តកំពង់ស្ពឺ កំពុងតែប្រព្រឹត្តទៅសាជាថ្មី ក្រោមអធិបតីភាពរបស់លោក មិន ឃិន រដ្ឋមន្ត្រីក្រសួងធម្មការនិងសាសនា។ ការចុះទៅដោយផ្ទាល់ ពីសំណាក់ រដ្ឋមន្ត្រីរូបនេះ គឺដើម្បីដោះស្រាយជម្លោះរវាងព្រះគ្រូចៅអធិការ និងព្រះសង្ឃកូនម្ចាស់ស្រុកចំនួន ១៣អង្គ ដែលត្រូវបាន បណ្តេញចេញពីវត្ត។

ដោយសារតែអធិករណ៍មិនអាចស្ងប់រំងាប់តាយរយៈការជជែកគ្នារវាងព្រះគ្រូចៅអធិការ និងព្រះសង្ឃទាំង១៣អង្គ លោក មិន ឃិន រដ្ឋមន្ត្រីក្រសួងធម្មការនិងសាសនា រួមទាំងគណៈប្រតិភូ ជាង១០នាក់ផ្សេងទៀត បានចុះទៅដោយផ្ទាល់ ដើម្បីស្វែងរកដំដោះស្រាយ និងធ្វើអន្តរាគមន៍។ នេះបើតាមការអះអាងរបស់លោក សេង សុមុនី អ្នកនាំពាក្យ ក្រសួងធម្មការនិងសាសនា ដែលបានថ្លែងប្រាប់សារព័ត៌មានតាមទូរសព្ទ នៅព្រឹកថ្ងៃទី៩ កុម្ភៈនេះ។អ្នកនាំពាក្យរូបនេះបានបញ្ជាក់បែបនេះថា៖«ឥឡូវ ឯកឧត្តម មិន ឃិន កំពុងតែនៅវត្តនេះហើយ។ យើងកំពុងតែបើកិច្ចប្រជុំ ហើយលទ្ធផលយ៉ាងណានោះ ទល់តែប្រជុំចប់ទើបដឹង»។

ជម្លោះនេះ បានផ្ទុះឡើយ ដោយសារតែព្រះគ្រូចៅអធិការ ព្រះនាម ប៊ូ ពុទ្ធីណា បញ្ជាឲ្យព្រះសង្ឃជាកូនម្ចាស់ស្រុកចំនួន ១៣អង្គ ចាកចេញពីវត្ត កាលពីថ្ងៃទី៦ ខែកុម្ភៈ ឆ្នាំ២០១៦ ។ បើទោះបីជាព្រះគ្រូចៅអធិការ សម្រេចព្រះទ័យបណ្តេញចេញ ដោយមានការគាំទ្រពីសំណាក់អាចារ្យ គណៈកម្មការក៏ពិតមែន តែព្រះសង្ឃទាំងនោះ មិនព្រមចាកចេញពីវត្តឡើយ ដោយអះអាងថា ការបណ្តេញចេញនេះ មិនប្រកបដោយហេតុផលត្រឹមត្រូវ។

បណ្តាព្រះសង្ឃទាំង១៣នោះ ព្រះអង្គ កើត ផល បានមានសង្ឃដីកាថា ការបណ្តេញចេញនេះ ក្រោមហេតុផលថា ព្រះសង្ឃទាំង១៣ មិនព្រមស្តាប់បង្គាប់ ហើយតែងតែប្រឆាំងនឹងព្រះគ្រូចៅអធិការអង្គនោះ។ ព្រះអង្គបន្ថែមថា ក្រៅពីហេតុផលខាងលើ ការគាំទ្រគណបក្សសម្ព័ន្ធដើម្បីប្រជាធិបតេយ្យ ក៏ជាមូលហេតុមួយដែរ។

កាលពីថ្ងៃទី៨ កុម្ភៈ ព្រះសង្ឃ និងអាចារ្យ គណៈកម្មការវត្ត បានជួបពិភាក្សាគ្នាម្តងហើយ ដើម្បីស្វែងរកដំណោះស្រាយ តែមិនទទួលលទ្ធផលអ្វីឡើយ ដោយសារតែ ភាគីទាំងសងខាង មិនព្រមទទួលយកសំណើគ្នាទៅវិញទៅមក។ ព្រះគ្រូចៅអធិការ ចង់ឲ្យព្រះសង្ឃកូនម្ចាស់ស្រុកទាំង១៣ ចាកចេញពីវត្ត ព្រោះមិនស្តាប់ឱវាទរបស់ខ្លួន។ ចំណែកឯព្រះសង្ឃទាំង១៣អង្គ មិនត្រឹមតែមិនចាកចេញនោះទេ តែថែមទាំងស្នើឲ្យទម្លាក់ព្រះគ្រូចៅអធិការអង្គនោះទៀតផង ហើយតែងតាំងព្រះគ្រូចៅអធិការថ្មីដែលជាកូនម្ចាស់ស្រុក៕