រដូវចូលឆ្នាំចិន អគ្គិភ័យលេបត្របាក់ផ្ទះជាង១០០ខ្នង

ជាតិ

សង្គមជាតិ

រដូវចូលឆ្នាំចិន អគ្គិភ័យលេបត្របាក់ផ្ទះជាង១០០ខ្នង

11, Feb 2016 , 2:29 pm

រូបភាព

ដោយ: លីម តុលា

ភ្នំពេញ៖ បញ្ហាអគ្គិភ័យនៅក្នុងប្រទេសកម្ពុជានៅតែជាក្តីកង្វល់របស់អាជ្ញាធរ និងប្រជាពលរដ្ឋដដែល ជាពិសេស នៅក្នុងរដូវបុណ្យទានធំៗ។ ជាក់ស្តែង នៅក្នុងរដូវបុណ្យចូលឆ្នាំចិនរយៈពេល៣ថ្ងៃកន្លងមកនេះ ផ្ទះសម្បែងចំនួន១០៥ខ្នងត្រូវបានភ្លើងអគ្គិភ័យលេបត្របាក់ មនុស្សម្នាក់រងរបួស និងមនុស្សម្នាក់អាយុជាង៤០ឆ្នាំបាត់បង់ជីវិត។

លោក ព្រហ្ម យ៉ន នាយការិយាល័យបង្ការ និងពន្លត់អគ្គិភ័យនៃស្នងការនគបាលរាជធានីភ្នំពេញ បានប្រាប់សារព័ត៌មានអេឡិចត្រូនិកនៅថ្ងៃព្រហស្បតិ៍នេះថា អគ្គិភ័យដែលបង្កឡើងក្នុងរយៈពេលបីថ្ងៃនៃបុណ្យចូលឆ្នាំចិនកន្លងមកនេះ បណ្តាលមកពីកត្តាបីយ៉ាង។ ទីមួយ គឺដោយសារការឆ្លងចរន្តអគ្គិសនី។ ទីពីរ គឺបណ្តាលមកពីការដុតអាកុលកោសជប់ខ្យល់ និងទី៣ គឺបណ្តាលមកពីភ្លើងទៀន ធូប អុជសែនដូនតានាពេលចូលឆ្នាំចិន។

លោក ព្រហ្ម យ៉ន នាយការិយាល័យបង្ការ និងពន្លត់អគ្គិភ័យនៃស្នងការនគបាលរាជធានីភ្នំពេញ បានបន្តបញ្ជាក់ទៀតថា ក្រៅពីការរងរបួស និងស្លាប់មនុស្សម្នាក់ ទ្រព្យសម្បត្តិគិតជាទឹកប្រាក់ប្រមាណជា២០ម៉ឺនដុល្លារអាមេរិកត្រូវបានបាត់បង់ដោយសារតែបាតុភូតអគ្គិភ័យ។ ផ្ទះសម្បែងដែលអគ្គិភ័យលេបត្របាក់នោះ ភាគច្រើនជាផ្ទះថ្មខាងក្រោម និងខាងលើឈើ។ តំបន់ដែលឆេះច្រើនជាងគេក្នុងរយៈពេលបីថ្ងៃកន្លងមកនេះ គឺតំបន់ចាក់អង្រែរាជធានីភ្នំពេញ៕