ជាតិ
អាហារូបករណ៍ថ្នាក់បណ្ឌិតសុខាភិបាល រយៈពេល ៣ឆ្នាំ នៅអង់គ្លេស
× Imperial College London ប្រកាសផ្តល់អាហារូបករណ៍ស្រាវជ្រាវថ្នាក់បណ្ឌិតជំនាញសុខាភិបាល រយៈពេល ៣ឆ្នាំ ក្នុងឆ្នាំសិក្សា ២០១៦-១៧ នៅប្រទេសអង់គ្លេស។
សិស្ស និស្សិតទូទាំងពិភពលោក អាចចូលរួមស្នើអាហារូបករណ៍ពី Imperial College London អង់គ្លេស។ ជ័យលាភី នឹងទទួលបានថវិកាអាហារូបករណ៍ជាង ២ម៉ឺនផោន ស្មើនឹងជាង ៣ម៉ឺនដុល្លារអាមេរិកក្នុងមួយឆ្នាំ សម្រាប់ចំណាយការស្នាក់នៅ ម្ហូបអាហារ អំឡុងរយៈសិក្សា ៣ឆ្នាំ។
សិស្ស និស្សិត ជ័យលាភីនឹងអាចចុះធ្វើកម្មសិក្សាស្រាវជ្រាវផ្ទាល់នៅវិទ្យាស្ថានជាតិបេះដូង និងសួត (The National Heart and Lung Institute ឬ NHLI) ដែលស្ថិតក្រោមមហាវិទ្យាល័យវេជ្ជសាស្ត្រ និងជាមជ្ឈមណ្ឌលស្រាវជ្រាវអន្ដរជាតិនាំមុខគេមួយ លើឯទេសស្រាវជ្រាវជំងឺរ៉ាំរ៉ៃជាច្រើនប្រភេទ នៅក្នុងប្រព័ន្ធសរសៃឈាមបេះដូង (Cardiovascular) និងជំងឺផ្លូវដង្ហើម (Respiratory systems) ដូចជា ជំងឺស្ទះផ្លូវដង្ហើមរ៉ាំរ៉ៃ (COPD) ជំងឺហឺត និងបេះដូង ជាដើម។
សិស្ស និស្សិតត្រូវបំពេញឯកសារស្នើអាហារូបករណ៍តាមប្រព័ន្ធ Online ដូចជា បំពេញតាមទម្រង់ពាក្យអាហារូបករណ៍ មានពិន្ទុភាសាអង់គ្លេស មានសញ្ញាបត្រសុខាភិបាល ឬសញ្ញាបត្រមានតម្លៃស្មើ ប្រវត្តិរូបសង្ខប (CV) លិខិតអំណះអំណាងរបស់និស្សិត (Personal statement ) និងលិខិតបញ្ជាក់ពីសាស្ត្រាចារ្យ ឬប្រធានស្ថាប័ន (Two academic referees)។
សិស្ស និស្សិត ត្រូវដាក់ពាក្យស្នើអាហារូបករណ៍តាមអនឡាយ d.jarvis-at-imperial.ac.uk. ឲ្យបានមុនថ្ងៃទី២៨ ខែកុម្ភៈ ឆ្នាំ២០១៦ ។
ដើម្បីជ្រាបព័ត៌មានអាហារូបករណ៍លម្អិត សិស្ស និស្សិត អាចចូលទៅកាន់គេហទំព័រ https://www1.imperial.ac.uk/nhli/training/postgraduate_research_nhli/studentships/ ៕
Tag:
អាហារូបរករណ៍
អប់រំ
© រក្សាសិទ្ធិដោយ thmeythmey.com