ជាតិ
សង្គមជាតិ
នៅមុខស្នាក់ការគណបក្សសង្គ្រោះជាតិ មានសភាពដូចធម្មតា គ្មានបាតុករ
× មកដល់ម៉ោង៩ កន្លះ ព្រឹកនេះ គ្មានបាតុករ ដែលជាក្រុមយុវជនគណបក្សប្រជាជនកម្ពុជា ធ្វើបាតុកម្មនៅមុខស្នាក់ការគណបក្សសង្គ្រោះជាតិនោះទេ។ នៅមុខស្នាក់ការគណបក្សនៅសង្កាត់ចាក់អង្រែលើ មានសភាពស្ងប់ស្ងាត់ ដូចថ្ងៃធម្មតា ដែលមានតែមន្ត្រីធ្វើការ និងសិស្សសក្សានៅក្នុងបក្សស្នាក់ការមួយចំនួនប៉ុណ្ណោះ។
បើទោះបីជា មានបាតុកម្មប្រឆាំងនឹងសម្តេច ហ៊ុន សែន នៅសហរដ្ឋអាមេរិកដូចការគ្រោងទុកក្តី ក៏មកដល់ម៉ោងប្រមាណ ៩ កន្លះ ព្រឹកថ្ងៃទី ១៦ ខែកុម្ភៈនេះ គ្មានក្រុមយុវជនរបស់គណបក្សប្រជាជនកម្ពុជាណាម្នាក់ ទៅតវ៉ានៅមុខស្នាក់គណបក្សសង្គ្រោះជាតិឡើយ។ នៅតាមដងផ្លូវនៅក្បែរស្នាក់ការគណបក្សសង្គ្រោះជាតិវិញ ក៏មិនបានកងកម្លាំងដាក់ពង្រាយអ្វីនោះដែរ។
លោក សេង សុផល ប្រធានសន្តិសុខនៅស្នាក់ការគណបក្សសង្គ្រោះជាតិ បានថ្លែងថា ក្រុមសន្តិសុខរបស់គណបក្សសង្គ្រោះជាតិ មិនបានបន្ថែមកម្លាំងដើម្បីជួយការពារសុវត្ថិភាពនៅស្នាក់ការបក្សនោះទេ ពីព្រោះស្ថានភាពនៅមុខស្នាក់ការមានស្ថានភាពដូចសព្វដង។
នៅមុនបាតុកម្មរបស់សម្ព័ន្ធអាមេរិក-កម្ពុជា ប្រឆាំងសម្តេច ហ៊ុន សែន នៅអាមេរិក ក្រុមយុវជនគណបក្សប្រជាជនកម្ពុជា បានប្រកាសត្រៀមធ្វើបាតុកម្មទាមទារឲ្យរំលាយគណបក្សសង្គ្រោះជាតិចោល បើមានបាតុកម្មនៅអាមេរិក។ ដោយសារការប្រកាសនេះ គណបក្សសង្គ្រោះជាតិ បានស្នើឲ្យអាជ្ញាធរជួយការពារសុវត្ថិភាពថ្នាក់ដឹកនាំរបស់ខ្លួន៕
Tag:
សង្គ្រោះជាតិ
បាតុកម្ម
© រក្សាសិទ្ធិដោយ thmeythmey.com