អន្តរជាតិ
អូបាម៉ា យកកិច្ចប្រជុំពិសេសអាស៊ាន-អាមេរិក ទាញការគាំទ្រកិច្ចព្រមព្រៀង TPP ពីប្រជាជនអាមេរិក ទីប្រឹក្សាសន្តិសុខរងអាមេរិកលោក Ben Rhodes
× Rancho Mirage-សហរដ្ឋអាមេរិក ៖ មន្ត្រីជាន់ខ្ពស់សេតវិមានអាមេរិក ទទួលស្គាល់ថា លោក បារ៉ាក់ អូបាម៉ា អញ្ជើញមេដឹកនាំអាស៊ានជាយុទ្ធសាស្ត្រទាញការគាំទ្រប្រជាជនអាមេរិក និងសភាឲ្យគាំទ្រកិច្ចព្រមព្រៀងភាពជាដៃគូអន្តរប៉ាស៊ីហ្វិកដែលកំពុងស្ថិតក្នុងភាពចម្រូងចម្រាស។ ហើយលោក ក៏ចង់ឲ្យអនាគតប្រធានធិបតីអាមេរិក បន្តគោលនយោបាយផ្សាភ្ជាប់ទំនាក់ទំនងជិតស្និទ្ធជាមួយរដ្ឋអាស៊ាន ក្នុងកម្រិតរដ្ឋដូចពេលអនាគតដែរ។
ក្នុងសន្និសីទសារព័ត៌មាននៅដោយឡែកកិច្ចប្រជុំកំពូលអាស៊ាន-អាមេរិក ទីប្រឹក្សាសន្តិសុខរងលោក Ben Rhodes បានបញ្ជាក់ថា ផ្នែកមួយនៃមូលហេតុនៃរៀបចំកិច្ចប្រជុំកំពូលអាមេរិក អាស៊ាន នៅអាមេរិក មុនផុតអាណត្តិរបស់លោក បារ៉ាក់ អូបាម៉ា គឺការទាក់ទាញការគាំទ្រពីប្រជាជន និងសភា ចំពោះកិច្ចព្រមព្រៀងភាពជាដៃគូអន្តរប៉ាស៊ីហ្វិក និងផ្ញើសារទៅអនាគតប្រធានាធិបតីអាមេរិកថា កាលៈទេសៈណាក៏ដោយ អាមេរិកមិនអាចបោះបង់អាស៊ានបានឡើយ ព្រោះអាស៊ានសំខាន់សម្រាប់ការពង្រឹងឥទ្ធិពលអាមេរិក នៅអាស៊ី។
លោក Ben Rhodes ថា៖« ផ្នែកមួយនៃអ្វីដែលយើងកំពុងធ្វើបច្ចុប្បន្ន គឺចង់ផ្ញើសារទៅកាន់ប្រជាជនអាមេរិក និងសភា ពីសារៈសំខាន់នៃអាស៊ាន ព្រោះអាស៊ានជាអង្គការតំបន់ដែលមានសេដ្ឋកិច្ចលូតលាស់រហ័សជាងគេ និងមានទំហំធំបំផុតមួយលើពិភពលោកផង។ វាក៏ជារឿងចាំបាច់ ដែលត្រូវគាំទ្រកិច្ចព្រមព្រៀងអន្តរប៉ាស៊ីហ្វិក ព្រោះវានឹងធ្វើឲ្យយើងកាន់តែប្រកួតប្រជែងខ្ពស់ក្នុងសេដ្ឋកិច្ចពិភពលោកផង»។
លោក អូបាម៉ា កំពុងស្វះស្វែងរកការគាំទ្រពីប្រជាជនអាមេរិក និងការអនុញ្ញាតពីសមាជិកសភាអាមេរិកផង ព្រោះបច្ចុប្បន្នអាមេរិកកំពុងស្ថិតក្នុងដំណាក់កាលផ្តល់សច្ចាប័ន កិច្ចព្រមព្រៀងភាពជាដៃគូអន្តរប៉ាស៊ីហ្វិកប៉ុណ្ណោះ។ ប៉ុន្តែប្រជាជនអាមេរិកមួយចំនួន បានតវ៉ាប្រឆាំងកិច្ចព្រមព្រៀងស្តង់ដារខ្ពស់នេះ ហើយសមាជិកសភាបក្សសាធារណរដ្ឋបានបង្ហាញការជំទាស់រួចទៅហើយ ចំពោះការផ្តល់សច្ចាប័នលើកិច្ចព្រមព្រៀងនេះដែរ។
ប្រទេសជាសមាជិកទាំង១២ ក្នុងនោះមានសមាជិកអាស៊ាន៤ផងនោះ មានពេល២ឆ្នាំ ដើម្បីផ្តល់សច្ចាប័ននេះ ក្រោយពេលដែលពួកគេឯកភាពគ្នា ទទួលយកកិច្ចព្រមព្រៀងនេះកាលពីដើមខែតុលាកន្លងទៅ។
ក្រៅពីលួងលោមឲ្យប្រជាជន និងសភាគាំទ្រកិច្ចព្រមព្រៀង ដែលរដ្ឋបាលលោក អូបាម៉ា ប្រឹងចរចា រដ្ឋបាលដដែលនេះ ក៏ចង់ឲ្យប្រជាជនអាមេរិកធម្មតា យល់ដឹងថាអនាគតរបស់អាមេរិក ពឹងផ្អែកសំខាន់លើអាស៊ាន ជាពិសេសការបង្កើតការងារសម្រាប់ប្រជាជនជាដើម។ ជាមួយគ្នានេះដែរ អូបាម៉ា ក៏ចង់ផ្ញើសារដល់អ្នកស្នងតំណែងលោក នៅពេលខាងមុខផង ដើម្បីធានាថា គោលនយោបាយអាមេរិកផ្សាភ្ជាប់ទំនាក់ទំនងជាមួយអាស៊ាន ក្នុងកម្រិតរដ្ឋ ដូចពេលបច្ចុប្បន្ន នឹងបន្តកើតមានទៅពេលអនាគតទៀត។ គេវាយតម្លៃថា ទោះជាប្រធានាធិបតីបក្សណាជាប់ឆ្នោតក៏ដោយ គោលនយោបាយអាមេរិកចំពោះតំបន់អាស៊ាន នឹងមិនផ្លាស់ប្តូរឡើយ ព្រោះអាស៊ាន សំខាន់សម្រាប់អាមេរិក ទាំងសេដ្ឋកិច្ច សន្តិសុខ នយោបាយ និងបញ្ហាផ្សេងទៀតផង។ ដូច្នេះបើបក្សសាធារណរដ្ឋជាប់ឆ្នោតក៏ដោយ យ៉ាងហោចណាស់ គេត្រឹមផ្លាស់ប្តូរឈ្មោះគោលនយោបាយការបរទេស ដែលកំពុងអនុវត្តន៍បច្ចុប្បន្នដែលលោក អូបាម៉ា បង្កើតឡើងប៉ុណ្ណោះ។
ត្រលប់មកវិញ លោក អូបាម៉ា ក្លាយជាប្រធានាធិបតីអាមេរិកទីមួយ ដែលបានខិតខំប្រឹងប្រែងខ្លាំង ដើម្បីពង្រឹងចំណងការទូត និងទំនាក់ទំនងទ្វេភាគី រវាងអាស៊ាន និងអាមេរិក ដោយដាក់ចេញនយោបាយការបរទេសមួយ ដើម្បីពង្រឹងឥទ្ធិពលអាមេរិក ឡើងវិញនៅអាស៊ី។ ក្រោមក្របខណ្ឌគោលនយោបាយនេះ អាមេរិកក្លាយជារដ្ឋជាដៃគូទីមួយ ដែលបញ្ជូនឯកអគ្គរដ្ឋទូត មកកាន់អាស៊ានមុនគេ ហើយបន្តឈានទៅដំឡើងកម្រិតទំនាក់ទំនងទ្វេភាគី រហូតដល់ភាពជាដៃគូយុទ្ធសាស្ត្រថែមទៀត៕
Tag:
អូបាម៉ា
អាមេរិក-អាស៊ាន
TPP
© រក្សាសិទ្ធិដោយ thmeythmey.com