អន្តរជាតិ
លោក អូបាម៉ា នឹងធ្វើទស្សនកិច្ចទៅគុយបាលើកដំបូងក្នុងប្រវត្តិសាស្ត្រអាមេរិក ៨០ឆ្នាំ
× ប្រធានាធិបតីអាមេរិកលោក បារ៉ាក់ អូបាម៉ា នឹងធ្វើទស្សនកិច្ចលើកដំបូងទៅកាន់គុយបានៅ ខែក្រោយនេះ។ បើសិនជាមិនមានការប្រែប្រួលនៃគម្រោងទស្សនកិច្ចនេះនោះទេ លោក អូបា ម៉ានឹងក្លាយជាប្រធានាធិបតីអាមេរិកដំបូងគេបង្អស់ហើយដែលឈានជើងក្នុងទឹកដីគុយបាក្នុងរយៈពេល៨០ឆ្នាំចុងក្រោយនេះ។
សូមស្ដាប់ព័ត៌មានលម្អិត៖
នៅខែមីនា ខាងមុខនេះ លោកបារ៉ាក់ អូបាម៉ា នឹងធ្វើទស្សនកិច្ចទៅគុយបា ជាលើកដំបូង និងជាប្រវត្តិសាស្ត្ររបស់ប្រធានាធិបតីអាមេរិកក្នុងរយៈពេល៨០ឆ្នាំចុងក្រោយនេះ ។ ទស្ស នកិច្ចនេះ នឹងធ្វើឲ្យលោកក្លាយជាប្រធានាធិបតីអាមេរិកទី១ ដែលធ្វើដំណើរទៅប្រទេសកោះដែលជាអតីតគូសត្រូវក្នុងសម័យសង្គ្រាមត្រជាក់ ចាប់តាំងពីឆ្នាំ១៩២៨មក។
មន្ត្រីក្រុមប្រឹក្សាសន្តិសុខជាតិអាមេរិកបានថ្លែងប្រាប់សារព័ត៌មាន NBC News ថាព័ត៌មានលម្អិត នៃដំណើរទស្សនកិច្ចនេះ អាចនឹងត្រូវប្រកាសនៅថ្ងៃព្រហស្បតិ៍នេះ។
ជុំវិញនៃដំណើរទស្សនកិច្ចប្រវត្តិសាស្ត្រនេះដែរ គឺជាសញ្ញាថ្មីមួយទៀតនៃការសម្រួលទំនាក់ទំនងរវាងប្រទេសទាំងពីរ ដែលជួបប្រទះភាពល្អក់កករចាប់តាំងពីបដិវត្តន៏ផ្ដួលរំលំរដ្ឋាភិបាលរណបអាមេរិកនៅគុយបាក្នុងឆ្នាំ១៩៥៩។ ចាប់ពីនេះនោះមក រដ្ឋាភិបាលគុយបាដែលដឹកនាំដោយលោក ហ្វីដែល កាស្ត្រូ បានផ្ដាច់រាល់ទំនាក់ទំនងជាមួយរដ្ឋាភិបាលអាមេរិកដែលបានដាក់ទណ្ឌកម្មយ៉ាងច្រើនលើគុយបា។
យ៉ាងណាមិញក្នុងពាក់កណ្ដាលអាណត្តិទី២ របស់លោក អូបាម៉ា សហរដ្ឋអាមេរិកនិងគុយបាបានសម្រួលទំនាក់ទំនងការទូតទ្វេភាគីឡើងវិញនៅឆ្នាំ២០១៤។ ក្រោយៗមក ការចរចាជាច្រើនរវាងអាមេរិក និងគុយបាបានកើតឡើង ដែលឈានដល់ការបើកស្ថានទូតអាមេរិកនៅទីក្រុងឡាហាវ៉ាននៅឆ្នាំ២០១៥។ ជាពិសេសនោះ ចរាចរណ៍ផ្លូវអាកាសរវាងប្រទេសទាំងពីរក៏ត្រូវស្ដារឡើងវិញផងដែរ ក្រោយការចុះហត្ថលេខាកាលពីថ្ងៃពុធម្សិលមិញ។
យ៉ាងណាមិញ បើទោះជាទំនាក់ទំនងការទូតត្រូវបានភ្ជាប់ក៏ដោយ ទណ្ឌកម្មដែលអាមេរិកដាក់លើគុយបានៅមិនទាន់ដកវិញនៅឡើយទេ ដ្បិតមានការប្រឆាំងពីក្រុមសភាសាធារណរដ្ឋ។ ចំណែកការហាមឃាត់ជំនួញអាវុធនៅតែបន្ត ព្រោះអាមេរិកត្រូវការពិនិត្យមើលសកម្មភាពគុយបាជាមុនសិន។
ដំណើរទស្សនកិច្ចនេះ ក៏ជាផ្នែកនៃដំណើររបស់លោកបារ៉ាក់ អូបាម៉ា ទៅកាន់តំបន់អាមេរិកឡាទីនដែលគ្រោងនឹងចាប់ផ្ដើមនៅខែក្រោយ។ លោកអូបាម៉ាដែលជិតផុតអាណត្តិប្រធានាធិបតីទៅហើយនោះ កំពុងព្យាយាមបន្សល់ទុកស្នាដៃជាច្រើន។ នៅថ្ងៃម្សិលមិញ សេតវិមាននិយាយថា លោកបារ៉ាក់ អូបាម៉ា នឹងធ្វើដំណើរទៅកាន់វៀតណាមជាលើកដំបូងក្នុងអាណត្តិរបស់លោក។
សូមបញ្ជាក់ដែរថា ប្រធានាធិបតីអាមេរិកចុងក្រោយដែលធ្វើដំណើរទៅកាន់គុយបាគឺលោក Calvin Coolidge នៅក្នុងឆ្នាំ១៩២៨។ ក្រោយៗមក ក៏មានអតីតប្រធានាធិបតីអាមេរិកលោក ជីមី កាទ័រ បានទៅគុយបាតាមការអញ្ជើញរបស់អតីតមេដឹកនាំមេដឹកនាំគុយបាលោក ហ្វីដែល កាស្ត្រូដែរ៕
© រក្សាសិទ្ធិដោយ thmeythmey.com