ប្លែកៗ
អន្តរជាតិ
ជប៉ុន៖ ម្តាយម្នាក់បង្ខំឲ្យកូនលេបត្រីពណ៌មាស៣០ក្បាលម្តងមួយៗ
× Yuko Ogata ដែលរស់នៅតំបន់ Fukuoka ប្រទេសជប៉ុន រួមទាំងប្រុសស្នេហ៍របស់ខ្លួន ត្រូវបានចាប់ខ្លួន ពីបទបង្ខំឲ្យកូនស្រីអាយុ១៦ឆ្នាំ ឲ្យលេបត្រីពណ៌មាស (goldfish) ចំនួន៣០ក្បាលម្តងមួយៗ ដោយសារតែខឹងកូនមើលរក្សាត្រីនោះមិនបានល្អ។ នេះបើយោងតាមការផ្សាយរបស់ Le Parisien។
ប៉ូលិសមូលដ្ឋានបានឲ្យដឹងថា រឿងរ៉ាវក្នុងគ្រួសារមួយនេះ បានកើតឡើងតាំងពីខែមិថុនា ឆ្នាំ២០១៥ មកម្ល៉េះ ខណៈជនរងគ្រោះដែលបច្ចុប្បន្នមានអាយុ១៧ឆ្នាំ តែងតែរងគ្រោះទាំងផ្លូវកាយ និងផ្លូវចិត្តរៀងរាល់ថ្ងៃពីសំណាក់ម្តាយ និងប្រុសស្នេហ៍របស់ម្តាយរូបនោះ។
Yuko Ogata និងដៃគូ ធ្លាប់ត្រូវបានចាប់ខ្លួន៤លើករួចទៅហើយ ពីបទធ្វើទារុណកម្មលើកូនស្រី ដោយចងខ្សែភ្លើង និងវាយមុខមាត់ យកបារីដុតអណ្តាត រួមទាំងការបង្ខំឲ្យញ៉ាំការ៉េមជាមួយពងទារហូតដល់ក្អួត ជាដើម។
Takeshi Egami ដែលជាសង្សារ បានបដិសេធថា ខ្លួនមិនដែលជាប់ពាក់ព័ន្ធអ្វីនោះឡើយលើការធ្វើទារុណកម្មក្មេងស្រី ប៉ុន្តែ Ogata បានសារភាពនូវទង្វើរបស់ខ្លួន។ មិនទាន់មានការសម្រេចអ្វីឡើយ ប៉ុន្តែរឿងរ៉ាវនេះ កំពុងល្បីល្បាញខ្លួននៅលើបណ្តាញព័ត៌មានក្នុងស្រុករបស់ជប៉ុន៕
© រក្សាសិទ្ធិដោយ thmeythmey.com