អន្តរជាតិ
កូនផ្សោតដ៏កម្រងាប់ដោយសារអ្នកទេសចរដណ្តើមគ្នាចាប់ថត Selfie
× ការសប្បាយគ្មានព្រំដែនរបស់មនុស្ស បណ្តាលសត្វដូហ្វាំង ឬផ្សោតតឿ (Franciscan dolphin) បាត់បង់ជីវិត។ រឿងរ៉ាវនេះ បានកើតឡើងកាលពីសប្តាហ៍មុន នៅឆ្នេរ Santa Teresita ក្រុង Buenos Aires ប្រទេសអាហ្សង់ទីន ដោយក្រុមអ្នកទេសចរនាំគ្នាចាប់ផ្សោតពីរក្បាលចេញពីទឹក ហើយដណ្តើមគ្នាថតរូប Selfie។
សារព័ត៌មានក្នុងស្រុករបស់អាហ្សង់ទីន បានផ្សព្វផ្សាយរូបថតជាច្រើនសន្លឹក ដោយបង្ហាញពីសកម្មភាពរបស់អ្នកទេសចរដែលនាំគ្នាស្រង់ផ្សោត Franciscan Dolphin ពីរក្បាលចេញពីទឹក ហើយដណ្តើមគ្នាពីដៃមួយទៅដៃមួយដើម្បីថត Selfie ទុកជាអនុស្សាវរីយ៍។
បន្ទាប់មក គេឃើញការបង្ហោះរូប ផ្សោតមួយក្បាលដែលបានដេកងាប់នៅកណ្តាលវាលខ្សាច់ ក្រោយការថត Selfie របស់ក្រុមអ្នកទេសចរ។ ជាមួយគ្នានេះ ក្រុមអ្នកអភិរក្សសត្វ បានអះអាងថា ផ្សោតមួយក្បាលទៀតកំពុងស្ថិតនៅក្នុងគ្រោះថ្នាក់យ៉ាងធ្ងន់ធ្ងរ។
ក្រោយហេតុការណ៍កើតឡើង មូលនិធិសង្គ្រោះសត្វរបស់អាហ្សង់ទីន បានព្រមានដល់សាធារណជនឲ្យជៀសវាងនូវករណីបែបនេះសារជាថ្មីទៀត ពីព្រោះអំបូរសត្វផ្សោតពីតំបន់ Plata នេះ កំពុងឈានទៅរកការដាច់ពូជ និងគ្រោះថ្នាក់បំផុត។
អ្នកនាំពាក្យម្នាក់របស់មូលនិធិ បានលើកឡើងថា៖ «ផ្សោត Franciscan ដូចជាអំបូរសត្វមួយចំនួនផងដែរ គឺមិនអាចរស់នៅឆ្ងាយពីទឹកច្រើនម៉ោងនោះឡើយ។ វាមានស្បែកក្រាស់ និងសំបូរទៅដោយខ្លាញ់ ដូច្នេះ ការខ្សោះជាតិទឹកបណ្តាលឲ្យវាងាប់យ៉ាងងាយបំផុត»។
មូលនិធិសង្គ្រោះសត្វអាហ្សង់ទីន បានលើកឡើងក្នុងរបាយការណ៍ថា Franciscan dolphin ស្ថិតក្នុងប្រភេទសត្វផ្សោតដ៏តួច និងកម្របំផុតក្នុងពិភពលោក។ វាប្រឈមនឹងការផុតពូជ ដោយបច្ចុប្បន្ន គេជឿថា មានប្រមាណតែ៣០០០០ក្បាលប៉ុណ្ណោះ៕
Tag:
ផ្សោត
អាហ្សង់ទីន
Selfie
© រក្សាសិទ្ធិដោយ thmeythmey.com