ប្រជុំអាស៊ាន-អាមេរិក៖ មេដឹកនាំអាស៊ានបីនាក់ដែលសកម្មខ្លាំងលើហ្វេសប៊ុក

ជាតិ

ប្រជុំអាស៊ាន-អាមេរិក៖ មេដឹកនាំអាស៊ានបីនាក់ដែលសកម្មខ្លាំងលើហ្វេសប៊ុក

19, Feb 2016 , 2:28 pm

រូបភាព

ដោយ: រួបរួម

នាយករដ្ឋមន្ត្រីកម្ពុជា សម្តេច ហ៊ុន សែន នាយករដ្ឋមន្ត្រីសឹង្ហបុរី លោក Lee Hsein Loong និងនាយករដ្ឋមន្ត្រីម៉ាឡេស៊ី លោក Najib Razak ត្រូវបានកត់សម្គាល់ឃើញថា មានភាពសកម្មយ៉ាងខ្លាំងនៅលើបណ្តាញសង្គមហ្វេសប៊ុក នាអំឡុងនៃកិច្ចប្រជុំកំពូលរវាងថ្នាក់ដឹកនាំអាមេរិក និងអាស៊ាន នៅ Sunnylands សហរដ្ឋអាមេរិក។

កិច្ចប្រជុំរយៈពេល២ថ្ងៃ សម្រេចបាននូវសេចក្តីថ្លែងការណ៍មួយដែលមានចំណុចវិជ្ជមានជាច្រើន។ ជាមួយគ្នានេះ សារព័ត៌មានដ៏ល្បីៗ BBC បានចាប់អារម្មណ៍លើមេដឹកនាំបីនាក់ដែលមានសកម្មភាពយ៉ាងខ្លាំងលើបណ្តាញសង្គមហ្វេសប៊ុក ក្រៅពីជំនួបផ្លូវការជាមួយលោក បារ៉ាក់ អូបាម៉ា។

BBC បានបង្ហាញពីរូបថតបីសន្លឹករបស់នាយករដ្ឋមន្ត្រីសឹង្ហបុរី លោក Lee Hsein Loong ដែលបានបង្ហោះនៅលើទំព័រហ្វេសប៊ុករបស់ខ្លួន។ ក្នុងនោះមានមួយសន្លឹក លោក Lee បានថត Selfie (wefie) ជាមួយសម្តេចនាយករដ្ឋមន្ត្រី ហ៊ុន សែន រួមជាមួយនាយករដ្ឋមន្ត្រីវៀតណាម និងឧបនាយករដ្ឋមន្ត្រីឡាវ។

សម្រាប់លោក Najib Razak សារព័ត៌មានដ៏ល្បីរបស់អង់គ្លេស បានបង្ហាញពីសកម្មភាពរបស់នាយករដ្ឋមន្ត្រីម៉ាឡេស៊ីរូបនេះ ដែលបានរៀបរាប់ពីសកម្មភាពខ្លួននៅមុនប្រជុំ នាអំឡុងពេលប្រជុំ និងនៅពេលធ្វើដំណើរ។

ទាក់ទងនឹងសម្តេច ហ៊ុន សែន BBC បានចាប់យករូបថត Selife ពីសន្លឹកក្នុងសម្លៀកបំពាក់សម្រាប់ប្រជុំ និងសម្លៀកបំពាក់ធម្មតានៅពេលដែលសម្តេចធ្វើដំណើរនៅលើយន្តហោះ។ ប៉ុន្តែអ្វីដែលគួរឲ្យកត់សម្គាល់ សារព័ត៌មានលំដាប់ពិភពលោកមួយនេះ បានដាក់តំណរភ្ជាប់អត្ថបទមួយរបស់ខ្លួន ដែលសរសេរទាក់ទងនឹងការព្រមានរបស់សម្តេច ហ៊ុន សែន លើអ្នកដែលរិៈគន់សម្តេចនៅលើបណ្តាញសង្គម៕