អន្តរជាតិ
អាមេរិកបន្ថែមទណ្ឌកម្មលើកូរ៉េខាងជើង
× ប្រធានាធិបតីអាមេរិកលោកបារ៉ាក់ អូបាម៉ា បានចុះហត្ថលេខាលើវិធានការទណ្ឌកម្មថ្មីមួយទៀតប្រឆាំងនឹងកូរ៉េខាងជើងដែលបានសាកល្បងគ្រាប់បែកអ៊ីដ្រូសែននិងបាញ់រ៉ុក្កែតកាលពីថ្មីៗនេះ។ វិធានការថ្មីនេះនឹងដាក់សម្ពាធកាន់តែខ្លាំងបន្ថែមទៀតលើរបបកុម្មុនីស្តកូរ៉េខាងជើង ដើម្បីព្រមានរដ្ឋមួយនេះដែលតែងតែល្មើសនឹងបម្រាមអង្គការសហប្រជាជាតិ។
សូមស្ដាប់ព័ត៌មានលម្អិត៖
សហរដ្ឋអាមេរិកបានដាក់ទណ្ឌកម្មបន្ថែមទៀតលើកូរ៉េខាងជើងក្រោយប្រទេសនេះបំពានបម្រាមរបស់អង្គការសហប្រជាជាតិម្ដងហើយម្ដងទៀត។ កួរ៉េខាងជើងដែលបានសាកល្បងគ្រាប់បែកអ៊ីដ្រូសែននិងបាញ់ផ្កាយរណបទៅលំហអាកាស កំពុងតែប្រឈមមុខនឹងសម្ពាធយ៉ាងខ្លាំង ជាពិសេសទណ្ឌកម្មដែលត្រូវបានដាក់ជាបន្តបន្ទាប់នាពេលកន្លងមក។
នៅថ្ងៃព្រហស្បតិ៍ម្សិលមិញ សេតវិមាននិយាយថា លោកបារ៉ាក់ អូបាម៉ា បានចុះហត្ថលេខាលើច្បាប់មួយដែលជាវិធានការថ្មីក្នុងការដាក់ទណ្ឌកម្មលើកូរ៉េខាងជើងដែលបំពានការហាមឃាត់របស់អន្តរជាតិ។ ច្បាប់នេះទើបតែត្រួវព្រឹទ្ធសភាអនុម័តយល់ព្រម និងរឹតបន្តឹងការដាក់ទណ្ឌកម្មលើអ្នកណាដែលនាំសម្ភារៈឬបច្ចេកវិទ្យាពាក់ព័ន្ធនឹងការផលិតអាវុធប្រល័យចូលទៅកូរ៉េខាងជើង។ ច្បាប់ដដែលនេះក៏នឹងដាក់ទណ្ឌកម្មលើអ្នកណាដែលជាប់ពាក់ព័ន្ធនឹងការរំលោភសិទ្ធិមនុស្សផងដែរ។
ទន្ទឹមនឹងនេះ វិធានការច្បាប់នេះ នឹងដាក់សម្ពាធបន្ថែមលើធនធានហិរញ្ញវត្ថុរបស់មេដឹកនាំកូរ៉េខាងជើង។ វិធានការនេះសំដៅដល់ការកាត់ផ្ដាច់ការលាងលុយនិងការរត់ពន្ធអាភៀន ដែលត្រូវជឿថា ជាប្រភពធនធានហិរញ្ញវត្ថុដ៏សំខាន់ដែលផ្ដល់ចំណូលរាប់លានដុល្លារដល់ទីក្រុងព្យុងយ៉ាង។
បន្ទាប់ពីកូរ៉េខាងជើងបាញ់រ៉ុក្កែតនៅខែកុម្ភៈ សហរដ្ឋអាមេរិកនិងសម្ព័ន្ធមិត្តអាស៊ីរបស់ខ្លួនបានព្យាយាមដាក់ចេញវិធានការថ្មីបន្ថែមទៀត ជាពិសេសឲ្យក្រុមប្រឹក្សាសន្តិសុខចេញដំណោះស្រាយសម្រេចដាក់ទណ្ឌកម្មឲ្យកាន់តែធ្ងន់ធ្ងរលើកូរ៉េខាងជើង។ កូរ៉េខាងត្បូងដែលជាសម្ព័ន្ធមិត្តជិតស្និទ្ធរបស់អាមេរិកចេញមុខមុនគេ ដោយបានបិទតំបន់ឧស្សាហកម្ម Kaesong ដែលស្ថិតក្នុងទឹកដីកូរ៉េខាងជើង។ ទីក្រុងសេអ៊ូលចោទទីក្រុងព្យុងយ៉ាងថា យកលុយដែលជាចំណូលពីតំបន់Kaesong ទៅអភិវឌ្ឍកម្មវិធីនុយក្លេអ៊ែររបស់ខ្លួន។
តែជាការកត់សម្គាល់នោះ កូរ៉េខាងជើងតែងតែបញ្ចេញអាកប្បកិរិយាមិនខ្វល់នឹងការព្រមានរបស់សហគមន៍អន្តរជាតិនោះទេ។ បើទោះជាទណ្ឌកម្មជាច្រើនត្រូវបានដាក់ក៏ដោយ កូរ៉េខាងជើងតែងតែធ្វើសកម្មភាពផ្គើនម្ដងហើយម្ដងទៀត។ ជាក់ស្ដែងនោះ កូរ៉េខាងជើងបានធ្វើឲ្យអន្តរជាតិខឹងសម្បារខ្លាំងនូវសកម្មភាពចុងក្រោយរបស់ខ្លួនដោយបានសាកល្បងគ្រាប់បែកអ៊ីដ្រូសែននិងបាញ់រ៉ុក្កែតផ្កាយរណបទៅក្នុងលំហអាកាស៕
© រក្សាសិទ្ធិដោយ thmeythmey.com