អន្តរជាតិ
ឥណ្ឌាលក់Smartphone តម្លៃថោកជាង៤$
× ក្រុមហ៊ុនឥណ្ឌាដែលមានឈ្មោះថា Ringing Bells បានបញ្ចេញលក់នូវSmartphone ម៉ាក Freedom 251 របស់ខ្លួនក្នុងតម្លៃមួយដែលមិនគួរឲ្យជឿគឺត្រឹមតែ៣.៦៦ដុល្លារតែប៉ុណ្ណោះ។ ប៉ុន្មានម៉ោងក្រោយការដាក់លក់ គេហទំព័ររបស់ក្រុមហ៊ុនបានគាំងមិនដំណើរការ ដោយសារតែមានអ្នកចូលទិញយ៉ាងសន្ធឹកសន្ធាប់។
វាជារឿងមិនស្មានដល់ដែលទូរសព្ទSmartphone មួយតម្លៃទាបជាង៤ដុល្លារ។ ក្រុមហ៊ុន Ringing Bells ដែលមានស្នាក់ការនៅរដ្ឋUttar Pradesh ភាគខាងជើងប្រទសឥណ្ឌា បាន បញ្ចេញផលិតផលទូរសព្ទSmartphone របស់ខ្លួនម៉ាកFreedom 251 ទៅលក់ក្នុងទីផ្សារ ក្នុងតម្លៃត្រឹមតែ២៥១រូពី (៣.៦៦ដុល្លារ)។ តម្លៃនេះគឺទាបខ្លាំងណាស់បើប្រៀបធៀបទៅនឹងទូរសព្ទSmartphone ដទៃទៀតដូចជាi-phone និងSamsung ជាដើម។
បើតាម Al Jazeera ប៉ុន្មានម៉ោងក្រោយដាក់លក់នៅថ្ងៃព្រហស្បតិ៍ម្សិលមិញ គេហទំព័ររបស់ក្រុមហ៊ុននេះបានគាំង ដ្បិតមានការបញ្ជាទិញយ៉ាងច្រើនលើសលប់។ ប៉ុន្តែ ក៏បានដំណើរការឡើងវិញនៅល្ងាចថ្ងៃដដែល។ ជាមួយគ្នានេះ ប្រធានក្រុមហ៊ុនលោក Ashok Kumar Chadha បញ្ជាក់ថា គ្រឿងផ្គុំរបស់ទូរសព្ទFreedom 251 ត្រូវបាននាំចូលពីតៃវ៉ាន់និងតម្លើងនៅឥណ្ឌាផ្ទាល់។
យ៉ាងណាមិញ ទូរសព្ទនេះមានតម្លៃថោក តែមិនបានទទួលការគាំទ្រហិរញ្ញវត្ថុពីរដ្ឋាភិបាលឥណ្ឌានោះទេ។ ម្យ៉ាងទៀត ដោយសារតែទូរសព្ទនេះលក់តែនៅតាមOnline ទើបធ្វើឲ្យវាមានតម្លៃថោក ព្រោះបានកាត់បន្ថយថ្លៃចំណាយបានខ្លះដែរ។
និយាយពីលក្ខណៈសម្បត្តិវិញ ទូរសព្ទFreedom 251 មានសម្ថភាពមិនធម្មតាដែរ មានអេក្រង់១០សង់ទីម៉ែត និងមានទំហំផ្ទុក៨GB ហើយអាចថែមដល់ទៅ៣២GB។ទូរសព្ទដដែលនេះដំណើរការដោយប្រព័ន្ធAndroid lollipop 5.1 ដែលជាប្រព័ន្ធដំណើរការចុងក្រោយរបស់Android។ ទូរសព្ទFreedom 251 ក៏មានទាំងកាមេរ៉ា មុខនិងក្រោយ ព្រមទាំងប្រព័ន្ធអ៊ីនធើណែត3G និងWi-Fi ផងដែរ។
ក្រៅពីនោះ ទូរសព្ទFreedom 251 ក៏មាននូវកម្មវិធីល្បីៗមួយចំនួនទៀតដូចជា Facebook, WhatsApp និងYouTube ដូចទូរសព្ទSmartphone ដទៃទៀតដែរ៕
© រក្សាសិទ្ធិដោយ thmeythmey.com