Johnie, FovianនិងJilfiaគឺជាឈ្មោះសត្វក្រពើដែលអ្នកស្រីVicki Lowing គិលានុបដ្ឋាកដែលរស់នៅតំបន់Rockbankក្រុងមែលប៊នប្រទេសអូស្ត្រាលីបីបាច់ថែរក្សាដូចសត្វចិញ្ចឹមធម្មតា។នេះបើតាមការផ្សាយរបស់កាសែតបារាំងOuest France។
អ្នកស្រីVicki Lowing បានអះអាងថាជីវិតរបស់អ្នកស្រីពិតជាសេចក្តីសុខខ្លាំងណាស់ក្នុងការរស់នៅ ជាមួយសត្វក្រពើJohnie, FovianនិងJilfia។ «កុំមើលក្រពើដោយដាក់ភ្នែកចំៗពេកពីព្រោះវាគាត់ថាអ្នកកំពុងគំរាមវា»។នេះជាដំបូន្មានដំបូងរបស់អ្នកស្រីVicki Lowing។
គិលានុប្បដ្ឋាករូបនេះបានរៀបរាប់ថាអ្នកស្រីមានទំនាក់ទំនងយ៉ាងល្អជាមួយក្រពើឈ្មោះJohnieដែលមានអាយុ២០ឆ្នាំរីឯFovianអាយុ៨ឆ្នាំចូលចិត្តកូនប្រុសគាត់ឈ្មោះAndrew ជាងគាត់។បន្ទាប់មកទៀតគាត់និយាយពីក្រពើឈ្មោះJilfiaអាយុ៩ឆ្នាំដែលចូលចិត្តស្រូបយកកម្តៅថ្ងៃ។
បើតាមកាសែតOuest France ការផ្សារភ្ជាប់ជីវិតជាមួយសត្វក្រពើរបស់អ្នកស្រីVicki គឺដោយសារតែអ្នកស្រីបានធំធាត់នៅក្នុងកសិដ្ឋានចិញ្ចឹមសត្វមួយកន្លែងនៅរដ្ឋNew South Wales។អ្នកស្រីបានអះអាងថា៖ «ម្តាយរបស់ខ្ញុំអប់រំខ្ញុំឲ្យចេះគោរពសត្វ។គាត់តែងតែសង្គ្រោះកូនកង់ហ្គូរូ។
អ្នកស្រីVicki ដែលមានរហស្សនាមថា «Croc Lady» បានរំលឹកថា៖ «កាលពីអាយុ៤ឆ្នាំខ្ញុំចិញ្ចឹមបង្កួយដល់អាយុ១០ឆ្នាំខ្ញុំចិញ្ចឹមពស់ប៉ុន្តែតាមពិតខ្ញុំចង់ចិញ្ចឹមក្រពើតាំងពីអាយុ៦ឆ្នាំមកម្ល៉េះ។ខ្ញុំបានមើលរឿងសត្វក្រពា[Alligator-អំបូរក្រពើ] មួយដែលមានឈ្មោះថាDaisyខ្ញុំក៏ចាប់ចូលចិត្តក្រពើតែម្តង»។
ឈានដល់អាយុជាង២០ឆ្នាំទើបអ្នកស្រីVicki សម្រេចក្តីសុបិន្តរបស់ខ្លួនដោយបានទិញក្រពើឈ្មោះRocky ទៅចិញ្ចឹមប៉ុន្តែវាបានងាប់កាលពីឆ្នាំ១៩៩៥ដោយសារទឹកក្នុងអាងត្រជាក់ខ្លាំងពេក។អ្នកស្រីពន្យល់ថា៖ «គ្រោះថ្នាក់ដ៏ធំបំផុតសម្រាប់ក្រពើគឺអាកាសធាតុត្រជាក់។នៅផ្ទះរបស់ខ្ញុំខ្ញុំត្រូវរក្សាសីតណ្ហភាពក្នុងរង្វង់៣០អង្សាជានិច្ច»។
ដោយខ្លួនកាន់តែមានវ័យចំណាស់ទៅហើយនោះអ្នកស្រីVicki រំពឹងថាកូនប្រុសAndrew នឹងបន្តវេនពីគាត់ក្នុងការចិញ្ចឹមក្រពើឲ្យដូចជាសត្វធម្មតា។ប៉ុន្តែបទពិសោធន៍ប្រមាណ៣០ឆ្នាំជាមួយសត្វក្រពើកន្លងមកនេះអ្នកស្រីVicki ចំណាយក្នុងខ្ទង់ជាង១២០០ដុល្លារអាមេរិកលើភ្លើងទឹកការចិញ្ចឹមនិងការការពារសត្វពីការយាយីផ្សេងៗ។
ក្រៅពីក្រពើបីក្បាល អ្នកស្រីVicki នៅមានឆ្មា២ក្បាលអណ្តើក៤ក្បាលពស់៥ក្បាលសេក២ក្បាលនិងបង្កួយជាច្រើនក្បាល។អ្នកស្រីបានអះអាងថាអ្នកស្រីនិងកូនមិនដែលរងនូវការវាយប្រហារធ្ងន់ធ្ងរម្តងណាឡើយពីសត្វទាំងនោះ។ជាទម្លាក់អ្នកស្រីចូលចិត្តយកJohnieដើរតាមខ្លួនរួមទាំងដេកនៅលើគ្រែជាមួយផងដែរ។
អ្នកស្រីបានបន្ថែមថា៖ «អ្នកជិតខាងថាខ្ញុំជាមនុស្សឆ្កួតប៉ុន្តែនេះជាការស្រឡាញ់ដ៏ងុបងុលរបស់ខ្ញុំចំពោះសត្វទាំងអស់»។អ្នកស្រីធ្លាប់លែងលះស្វាមី២នាក់ហើយប៉ុន្តែអ្នកស្រីមិនមានការអផ្សុកអ្វីនោះឡើយដោយមានក្រពើនៅជិតខ្លួន។តាមរយៈបណ្តាញសង្គមហ្វេសប៊ុកអ្នកស្រីVicki ក៏ទទួលបាននូវការឧបត្ថម្ភមួយចំនួនផងដែរ៕