អន្តរជាតិ
កូរ៉េខាងជើង បាញ់គ្រាប់ផ្លោងជាថ្មីក្នុងតំបន់ជម្លោះ ខណៈកូរ៉េខាងត្បូង ត្រៀមធ្វើសមយុទ្ធទ្រង់ទ្រាយធំ
× បើទោះបីជាមានការថ្កោលទោសនិងការបន្ថែមទណ្ឌកម្មជាបន្តបន្ទាប់ក៏ដោយកូរ៉េខាងជើងហាក់ដូចជាមិនសូវខ្វាយខ្វល់ប៉ុន្មាននោះទេ។ផ្ទុយទៅវិញរដ្ឋាភិបាលក្រុងព្យុងយ៉ាងបានបន្តសកម្មភាពដ៏គឃ្លើនក្នុងការបាញ់សាកល្បងមីស៊ីលនិងសកម្មភាពផ្សេងៗដែលគំរាមកំហែងដល់សន្តិសុខនិងបំពាននឹងបម្រាមរបស់សហគមន៍អន្តរជាតិ។
រដ្ឋាភិលបាលក្រុងព្យុងយ៉ាងបានបាញ់គ្រាប់ផ្លោងជាច្រើនគ្រាប់នៅព្រឹកសៅរ៍ទី២០ខែកុម្ភៈនេះនៅក្បែរតំបន់ជម្លោះដែនសមុទ្រជាមួយនឹងក្រុងសេអ៊ូល។ការបាញ់គ្រាប់ផ្លោងនេះធ្វើឡើងបន្ទាប់ពីការសាកល្បងមីស៊ីលបំពាក់ផ្កាយរណបកាលពីថ្មីៗនេះនិងស្របពេលកូរ៉េខាងត្បូងរួមជាមួយនឹងសម្ព័ន្ធមិត្តរបស់ខ្លួនត្រៀមធ្វើសមយុទ្ធយោធាប្រចាំឆ្នាំទ្រង់ទ្រាយធំផងដែរនោះ។
មន្ត្រីក្រសួងការពារជាតិកូរ៉េខាងត្បូងបានអះអាងថា ទាហានបានលឺសំឡេងនៃការបាញ់គ្រាប់ផ្លោងជាច្រើនគ្រាប់ចេញពីកោះBaengnyeongដែលទំនងជាការធ្វើសមយុទ្ធយោធារបស់កូរ៉េខាងជើង។នេះបើយោងតាមភ្នាក់ងារព័ត៌មានReuters ដែលបានដកស្រង់សម្តីរបស់យោធាដែរថាការបាញ់គ្រាប់ផ្លោងរបស់កូរ៉េខាងជើងនោះមិនបានចូលមកក្នុងទឹកដីកូរ៉េខាងត្បូងនោះទេ។
យ៉ាងណាក៏ដោយការបាញ់គ្រាប់ផ្លោងរបស់កូរ៉េខាងជើងគឹជាកាបង្កើនភាពតានតឹងជាថ្មីម្តងទៀតសម្រាប់សន្តិសុខក្នុងឧបទ្វីបកូរ៉េ និងសន្តិសុខពិភពលោកជារួម។ក្នុងដើមឆ្នាំ២០១៦នេះកូរ៉េខាងជើងបានបាញ់សាកល្បងគ្រាប់បែកបរមាណូដែលជាបច្ចេកវិទ្យាថ្មីរបស់ខ្លួនជាពីរលើករួចទៅហើយ។ក្នុងនោះលើកទីមួយគឺជាការបាញ់គ្រាប់បែកអ៊ីដ្រូសែនដែលជាអាវុធបរមាណូដែលមានឥទ្ធិពលបំផុតនៅខែមករានិងលើកទី២ដើមខែកុម្ភៈនេះកូរ៉េខាងជើងក៏បានបាញ់មីស៊ីលដោយបំពាក់ជាមួយនឹងផ្កាយរណបទៅកាន់លំហអាកាសផងដែរ។
ទាំងជប៉ុននិងកូរ៉េខាងត្បូងជាប្រទេសជិតខាងបានប្រុងជើងការនិងបញ្ជាឲ្យកងទ័ពរបស់ខ្លួនត្រៀមខ្លួនរួចជាស្រេចចំពោះរាល់ការប៉ះទង្គិចអាចកើតឡើងនាពេលខាងមុខ។អ្វីគួរកត់សម្គាល់នោះកូរ៉េខាងត្បូងរួមជាមួយនឹងសម្ព័ន្ធមិត្តខ្លួនកំពុងតែត្រៀមធ្វើសមយុទ្ធយោធាទ្រង់ទ្រាយធំដែលមិនធា្លប់មានកន្លងមកនាពេលខាងមុខដ៏ខ្លីផងដែរ។ហើយសកម្មភាពឆ្លើយឆ្លងគ្នានេះនឹងក្លាយជាការប្រឈមមុខដ៏ផុយស្រួយមួយនៃការផ្ទុះសង្គ្រាមក្នុងឧបទ្វីបកូរ៉េ៕
© រក្សាសិទ្ធិដោយ thmeythmey.com