អន្តរជាតិ
×![]()
ការបំពាក់ប្រព័ន្ធមីស៊ីលដែលមានសមត្ថភាពអាចកម្ទេចទាំងយន្តហោះ និងនាវា ក្នុងតំបន់ជម្លោះសមុទ្រ ចិនខាងត្បូង បានក្លាយជាប្រធានបទថ្មីមួយសម្រាប់ភាគីពាក់ព័ន្ធនៃជម្លោះ។ ស្របជាមួយនឹងការថ្កោល ទោសរបស់សម្ព័ន្ធមិត្តមួយចំនួនរាប់បញ្ចូលទាំងអាមេរិក វៀតណាម បានចេញកំណត់ហេតុការទូតផ្លូវការ មួយទៅកាន់អង្គការសហប្រជាតិដើម្បីប្រឆាំងនឹងសកម្មភាពរបស់ចិនក្នុងតំបន់ជម្លោះ។
កាលពីថ្ងៃម្សិលមិញ ក្រសួងការបរទេសទេសវៀតណាម បានសម្តែងការព្រួយបារម្ភជាខ្លាំងចំពោះការ បានដាក់ពង្រាយប្រព័ន្ធមីស៊ីលក្នុងតំបន់ជម្លោះដែលជាតំបន់ត្រួតស៊ីគ្នារវាងចិន តៃវ៉ាន់ និងវៀតណាម ។ ជាមួយគ្នាវៀតណាម ក៏បានដាក់កំណត់ហេតុការទូតជាផ្លូវការមួយទៅកាន់អគ្គលេខាធិការអង្គការ សហប្រជាជាតិផងដែរ។
អ្នកនាំពាក្យក្រសួងការបរទេសវៀតណាមលោក Le Hai Binh បានបញ្ជាក់តាមរយៈសេចក្តីថ្លែងការណ៍ នោះថា សកម្មភាពរបស់ចិន ពិតបានបំពានទៅនឹងអធិបតេយ្យរបស់វៀតណាមយ៉ាងធ្ងន់ធ្ងរក្នុងតំបន់កោះប៉ារ៉ាសែលដែលនេះ គឹជាការគំរាមកំហែងដល់សន្តិភាព និងស្ថិរភាពនៅក្នុងតំបន់ ក៏ដូចជាកសន្តិសុខសុវត្ថិភាព និង សិទ្ធិសេរីភាពនៃការធ្វើនាវាចរណ៍ និងការហោះហើរផងដែរ។
បើតាមសេចក្តីថែ្លងការណ៍ដែលបានផ្ញើទៅកាន់ភា្នក់ងារព័ត៌មានReuters ក៏បានបញ្ជាក់ដែរថា កំណត់ ហេតុការទូតនោះ ក៏ត្រូវបានបញ្ជូនទៅស្ថានទូតចិនប្រចាំក្រុងហាណូយ និង ប្រមុខអង្គការសហប្រជាជាតិ លោកបាន គីមូនដើម្បីថ្កោលទោសសកម្មភាពរបស់ចិន។
ជុំវិញបញ្ហានេះដែរ ក្នុងឱកាសជំនួបក្រៅនៃកិច្ចប្រជុំមេដឹកនាកំពូលអាមេរិក-អាស៊ាននៅថ្ងៃទី១៥ និង១៦ ខែកុម្ភៈ ក្នុងរដ្ឋកាលីហ្វ័រញ៉ា នៃសហរដ្ឋអាមេរិកកន្លងទៅ នាយករដ្ឋមន្ត្រីវៀតណាមបានសុំអាមេរិកដើម្បីអន្តរាគមន៍រឿងនេះផងដែរ។ លោក ង្វៀង តាន់ស៊ុង បានស្នើសុំប្រធានាធិបតីអាមេរិកលោក បារ៉ាក់ អូបាម៉ា ត្រង់ៗឲ្យលោកបញ្ចេញឥទ្ធិពលអាមេរិក ក្នុងនាមមហាអំណាចពិភពលោក និងចេញផែនការសកម្មភាពជាក់ស្តែង និងមានប្រសិទ្ធភាព ដើម្បីបញ្ឈប់សកម្មភាពនានា ដូចជាយោធានីយកម្ម និងការវាតទីលើតំបន់ជម្លោះជាឯកតោភាគីជាដើម។
សូមរម្លឹកផងដែរថា កាលពីថ្ងៃពុធ កន្លងទៅ មន្ត្រីជាន់ខ្ពស់ការពារជាតិអាមេរិក និងតៃវ៉ាន់ បានអះអាងថាចិន បានបំពាក់ប្រព័ន្ធមីស៊ីលដែលអាច បាញ់ទៅកាន់លំហអាកាសនៅលើកោះ Woody ដែលស្ថិតនៅក្នុងបណ្តុំកោះប៉ារ៉ាសែលនៃតំបន់ជម្លោះ សមុទ្រចិនខាងត្បូងដែលជាតំបន់ទាមទារត្រួតស៊ីគ្នារបស់ចិន តៃវ៉ាន់ និងវៀតណាម។ការពង្រាយ ឬ ការបំពាក់មីស៊ីលក្នុងដែនជម្លោះ គឺជាប្រព័ន្ធមីស៊ីលការពាររបស់ចិនប្រភេទ HQ-9 ដែលអាចបាញ់បាន ចម្ងាយប្រមាណ២០០គីឡូម៉ែត ដែលមានសមត្ថភាពអាចទាំងស្ទាក់យន្តហោះ និងមីស៊ីលបាន៕
© រក្សាសិទ្ធិដោយ thmeythmey.com
