អន្តរជាតិ
អាមេរិក-ចិនចោទដាក់គ្នាថាកំពុងតែធ្វើយោធូបនីយកម្មក្នុងសមុទ្រចិនខាងត្បូង
លោក Hong Lei ខាងឆ្វេង និងលោក John Kirby ខាងស្តាំ
×![]()
ជម្លោះសមុទ្រចិនខាងត្បូង ដែលមានភាគីពាក់ព័ន្ធដូចជា ចិន តៃវ៉ាន់ និងរដ្ឋអាស៊ានរួមមាន ព្រុយណេ ម៉ាឡេស៊ី ហ្វីលីពីន និងវៀតណាម កំពុងតែក្លាយជាប្រធានបទមួយដ៏ក្តៅគគុក។ ហើយចុងក្រោយនេះ អាមេរិកដែលមិនមែនជាភាគីជម្លោះសោះ បាននិងកំពុងរិះគន់ និងចេញជាវិធានការផ្សេងៗក្នុងតំបន់ ជម្លោះដែលចិនបានចាត់ទុកថាជាការលូកដៃរឿងបញ្ហាផ្ទៃក្នុងនៃជម្លោះ។ 
អ្នកនាំពាក្យក្រសួងការបរទេសចិនលោក Hong Leiបានថ្លែងប្រតិកម្មកាលពីថ្ងៃសុក្រទី១៩ខែកុម្ភៈ ថា ចិន មិនមានបំណងក្នុងការបន្តការធ្វើយោធូបនីយកម្មនៃបណ្តុំកោះ Nansha នៃសមុទ្រចិនខាងត្បូង នោះទេ។ លោក Hong Lei ក៏បានរិះគន់ប្រតិបត្តិការនាវាចម្បាំង និងយន្តហោះទម្លាក់គ្រាប់អាមេរិកនៅក្នុងតំបន់ជម្លោះសមុទ្រចិនខាងត្បូងចុងក្រោយនេះថា ជាការពង្រឹងអំណាចក្នុងតំបន់ផងដែរ។
ប្រតិកម្មរបស់អ្នកនាំពាក្យក្រសួងការបរទេសចិន ធ្វើឡើងបន្ទាប់ពីអ្នកនាំពាក្យក្រសួងការបរទេសអាមេរិកលោក John Kirby បានអះអាងតាមរយៈរូបភាពផ្កាយរណបថា ការបំពាក់ប្រព័ន្ធមីស៊ីលលើកោះ Yongxing ឬកោះ Woody ដែលផ្នែកមួយនៃបណ្តុំកោះប៉ារ៉ាសែលនៃសមុទ្រចិនខាងត្បូងរបស់ចិន បានបំពានការសន្យារបស់ចិនដែលថានឹងមិនធ្វើយោធូបនីយកម្មក្នុងតំបន់ជម្លោះនោះទេ។
កាលពីថ្ងៃព្រហស្បតិ៍ទី១៨ ខែកុម្ភៈកន្លងទៅក្នុងឱកាសនៃការធ្វើសង្ខេបព័ត៌មានប្រចាំថ្ងៃលោកKirbyបានបញ្ជាក់ថាយើងមិនបានឃើញសញ្ញាណាមួយនៃការប្តេជាលើយោធូបនីយកម្មត្រូវបានបញ្ឈប់នោះទេពោលគឺវាគ្មានអ្វីសោះដែលត្រូវបានធ្វើឡើងដើម្បីធានាពីស្ថិរភាពនិងសន្តិសុខនៃសា្ថនភាពក្នុងសមុទ្រចិនខាងត្បូង។ ការលើកឡើងរបស់អ្នកនាំពាក្យរូបនេះក៏ស្របជាមួយនឹងការអះអាងនៃមន្ត្រីជាន់ខ្ពស់ការពារជាតិអាមេរិក និងតៃវ៉ាន់ ដែលថាចិន បានបំពាក់ប្រព័ន្ធមីស៊ីលដែលអាចបាញ់ទៅកាន់លំហអាកាសនៅលើកោះ Woody ដែលស្ថិតនៅក្នុងបណ្តុំកោះប៉ារ៉ាសែលនៃតំបន់ជម្លោះសមុទ្រចិនខាងត្បូងដែលជាតំបន់ទាមទារត្រួតស៊ីគ្នារបស់ចិន តៃវ៉ាន់ និងវៀតណាម។
ផ្ទុយទៅនឹងការចោទប្រកាន់របស់ក្រុងវ៉ាស៊ិនតោនលោកHong Leiបានសង្កត់ធ្ងន់ថាអាមេរិក កំពុងតែពង្រឹងសកម្មភាពនៃការពង្រាយយោធារបស់ខ្លួននៅក្នុងសមុទ្រចិនខាងត្បូងហើយការបញ្ជូននាវា និងយន្តហោះចម្បាំងមកកាន់ដែនសមុទ្រចិនខាងត្បូងកន្លងមកគឺជាសកម្មភាពប្រឆាំងចិនទៅវិញនោះទេ។ អ្នកនាំពាក្យដដែលបានបន្ថែមទៀតថាសកម្មភាពរបស់អាមេរិកបាននិងកំពុងតែបង្កើតភាពតានតឹងក្នុងសមុទ្រចិនខាងត្បូងហើយក៏កំពុងបង្កើតនូវយោធូបនីយកម្មក្នុងតំបន់នោះផងដែរ៕
© រក្សាសិទ្ធិដោយ thmeythmey.com
