សង្គមអន្តរជាតិ
អន្តរជាតិ
អូស្ត្រាលី កំពុងចរចាជាមួយប្រទេសអាស៊ីអាគ្នេយ៍បី ដើម្បីសុំការតាំងលំនៅថ្មីដល់ជនភៀសខ្លួន
× ក្រៅពីប្រទេសក្នុងតំបន់អឺរ៉ុប អូស្ត្រាលី ក៏ជាទិសដៅសំខាន់មួយផងដែរសម្រាប់ជនភៀសខ្លួនសម្រុកចូលទៅរស់នៅដែលលំហូរនេះហើយបានធ្វើឲ្យអូស្ត្រាលីមានការព្រួយបារម្ភខ្លាំងពីការគំរាមកំហែងសន្តិសុខ។ ចុងក្រោយនេះ រដ្ឋាភិបាលកអូស្ត្រាលី កំពុងតែចរចាជាមួយនឹងបណ្តាប្រទេសនៅអាស៊ីអាគ្នេយ៍ដើម្បី ផ្តល់សិទ្ធិសម្រាប់ការរស់នៅសម្រាប់ជនភៀសខ្លួនទាំងនោះ។
រដ្ឋាភិបាលអូស្ត្រាលី កំពុងតែចរចាជាមួយនឹងប្រទេសចំនួនប្រាំមួយដែលរួមមានឥណ្ឌូនេស៊ី ម៉ាឡេស៊ី និង ហ្វីលីពីនផងដែរនោះ ដើម្បីផ្តល់ទីជម្រកសម្រាប់អ្នកសុំសិទ្ធិជ្រកកោនដែលកំពុងតែឃុំខ្លួននៅប្រទេសកោះប៉ាពូ អាស៊ីនូវែលហ្គីណេ និងណូរូ។ នេះបើយោងតាមការចុះផ្សាយរបស់កាសែតអូស្ត្រាលី the Sydney Morning Herald កាលពីថ្ងៃទី២០ ខែកុម្ភៈ ម្សិលមិញ។
បើតាមកាសែតដដែល ការចរចាដែលកំពុងតែធ្វើជាមួយនឹងប្រទេសទាំងបីនៅអាស៊ីអាគ្នេយ៍ ផ្តោតសំខាន់លើការផ្តល់ទីជម្រកដល់ជនភៀសខ្លួនដែលមានសក្តានុពលប្រមាណ១៤៥៩នាក់។ ដោយឡែកសម្រាប់ប្រទេសបីទៀតដែលកំពុងស្ថិតក្នុងដំណាក់ចរចាផងដែរនោះ រដ្ឋាភិបាលមិនទាន់បញ្ចេញ ឈ្មោះនៅឡើយនោះទេ។
ជុំវិញដំណាក់ការនៃការចរចានេះ អ្នកនាំពាក្យរដ្ឋាភិបាលអូស្ត្រាលី មិនបានច្រានចោល ឬទទួលស្គាល់ នៅឡើយនោះទេ។ ក៏ប៉ុន្តែ សម្រាប់រដ្ឋមន្ត្រីការបរទេសអូស្ត្រាលីលោកស្រី Julie Bishop ចាត់ទុកការចុះផ្សាយពីព័ត៌មាននេះដោយកាសែតក្នុងស្រុក ថា វាហាក់ដូចជាលឿនពេក។ លោកស្រី ថាការចុះផ្សាយនេះ អាចធ្វើឲ្យប៉ះពាល់ដល់ការចរចាជាពិសេសនោះ ប្រទេសដែលជាដៃគូចរចាដែលរួមមានហ្វីលីពីន ដែលកំពុងត្រៀមរៀបចំការបោះឆ្នោតនៅខែឧសភាខាងមុខនេះ។
កន្លងមកអូស្ត្រាលី ក៏ធា្លប់បានបញ្ជូនជនភៀសខ្លួនមកកាន់កម្ពុជាដែលជាប្រទេសនៅក្នុងតំបន់អាស៊ី អាគ្នេយ៍ក្រោមកិច្ចព្រមព្រៀងនៃរដ្ឋាភិបាលទាំងពីរផងដែរ។ ក៏ប៉ុន្តែដំណើរការនៃផ្តល់សិទ្ធិក្នុងការផ្តល់ទីជម្រកនៅកម្ពុជា ហាក់ដូចជាមិនសូវដំណើរការល្អប៉ុន្មាននោះទេ ក្រោយពីការបញ្ជូនជនភៀសខ្លួនបួននាក់មកហើយនោះ។
សូមបញ្ជាក់ផងដែរថា បញ្ហាជនភៀសខ្លួន បានក្លាយវិបត្តិធ្ងន់ធ្ងរខ្លាំងមួយរបស់ពិភពលោកចាប់ពីឆ្នាំ២០១៤។ ហើយក្នុងនោះ អូស្ត្រាលី ក៏បានក្លាយជាប្រទេសមួយដែលមានចំនួនការសម្រុកចូលទៅរស់ នៅនៃជនភៀសខ្លួនតាមរយៈទូកច្រើនផងដែរ។ តែក្រោមគោលនយោបាយតឹងរឹងចុងក្រោយ រាល់ជនភៀសខ្លួនទាំងឡាយណាដែលធ្វើដំណើរទៅកាន់អូស្ត្រាលី នឹងត្រូវចាប់បញ្ជូនទៅប្រទេសកោះណូរូ ឬ កោះប៉ាពូ អាស៊ីនូវែលហ្គីណេ ដែលប្រៀបប្រដូចទៅនឹងមន្ទីរឃុំឃាំង៕
Tag:
អូស្ត្រាលី
ជនភៀសខ្លួន
© រក្សាសិទ្ធិដោយ thmeythmey.com