អន្តរជាតិ
×![]()
ដោយ: ធីតា
បារាំង៖ នៅថ្ងៃទី៣០ ខែមេសា ខាងមុខ លោក Jean-Michel Lebelដែលមានស្រុកកំណើតនៅតំបន់ Cambraiបានប្រទេសបារាំង នឹងចាប់ផ្តើមធ្វើដំណើរទេសចរណ៍តែម្នាក់ជាមួយនឹងត្រាក់ទ័រ លើចម្ងាយផ្លូវប្រមាណ៦០០គីឡូម៉ែត្រ។
កាសែតបារាំង La Voix du Nord បានផ្សាយឲ្យដឹងថា លោក Jean-Michel Lebelអាយុ៦៨ឆ្នាំទើបតែចូលនិវត្តពីការងារជាគ្រូបង្រៀន។ នារយៈពេល១ឆ្នាំចុងក្រោយនេះ លោកបានខិតខំត្រៀមខ្លួនយ៉ាងម៉ត់ចត់ដើម្បីរៀបចំដំណើរទេសចរណ៍ជាមួយត្រាក់ទ័ររបស់ខ្លួន។
លោក Jean-Michel Lebelដែលរៀបចំតុបតែងត្រាក់ទ័រ ជាមួយនឹងការរចនាបន្ទប់យ៉ាងត្រឹមត្រូវនោះ បានអះអាង ការរៀបចំដំណើរកម្សាន្តក្នុងតំបន់នេះ គឺដើម្បីតែភាពសប្បាយរីករាយប៉ុណ្ណោះ មិនមានអ្វីធំដុំនោះឡើយ។
លោកJean-Michel គឺជាមនុស្សម្នាក់ដែលងុបងុលនឹងគ្រឿងម៉ាស៊ីន ឬមេកានិក។ លោកបានបញ្ជាក់ថា៖ «ឪពុករបស់ខ្ញុំគឺជាអ្នកស៊ីឈ្នួលបើកបររថយន្ត ដូច្នេះជំនាញបើកបរពិតជាមានឥទ្ធិពលក្នុងជីវិតរបស់ខ្ញុំ ហើយខ្ញុំក៏ស្រឡាញ់ការធ្វើដំណើរផ្សងព្រេងផងដែរ»។
លោកបានរៀបចំបន្ទប់យ៉ាងស្អាតបាតនៅពីផ្នែកខាងក្រោយនៃត្រាក់ទ័រ សម្រាប់គេងពេលយប់ ឬពេលនឿយហត់។ ចាប់ផ្តើមចេញពីតំបន់ Cambraiឆ្ពោះទៅ Cuvillersដោយក្នុងចម្ងាយផ្លូវប្រមាណ៦០០គីឡូម៉ែត្រ លោក Jean Michel ត្រូវឆ្លងកាត់តំបន់ធំៗចំនួន៤និងប្រមាណ១៥០ភូមិ ។
លោកបានសម្រេចកំណត់ចម្ងាយពី៤០ ទៅ៨០គីឡូម៉ែត្រសម្រាប់ដំណើរក្នុងមួយថ្ងៃ និងល្បឿន១០ ទៅ១២គីឡូម៉ែត្រក្នុងមួយម៉ោង។ លោកបានអះអាងបន្ថែមថា៖ «នេះគ្រាន់តែជាការធ្វើតេស្តិ៍សមត្ថភាពផ្ទាល់ខ្លួនប៉ុណ្ណោះ»។
ដំណើរទេសចរណ៍របស់លោក ក៏ជាបេសកកម្មផ្ទាល់ខ្លួនដើម្បីទៅសួរសុខទុក្ខមិត្តភក្តិដែលមានគំនិតប្រហាក់ប្រហែលគ្នា គ្រួសារ សាច់ញាតិផងដែរ ហើយអ្វីដែលពិសេសនោះលោកនឹងទៅលេងឪពុកម្តាយនៅស្រុកកំណើត Lisbourg ដែលបច្ចុប្បន្នពួកគាត់មានអាយុ៩០ឆ្នាំជាងទៅហើយ៕
© រក្សាសិទ្ធិដោយ thmeythmey.com
