អន្តរជាតិ
×![]()
ដោយ: ធីតា
ខណៈដែលអ្នកបើកបរចុះធ្វើការត្រួតពិនិត្យបច្ចេកទេស រថភ្លើងបានធ្វើដំណើរទៅមុខ ដោយគ្មានអ្នកបើករហូតដល់ទៅចម្ងាយ១២គីឡូម៉ែត្រ។ ករណីនេះ បានកើតឡើងកាលពីថ្ងៃព្រហស្បតិ៍ កន្លងមកនៅក្នុងប្រទេសបែលហ្ស៊ិក។ នេះបើតាមការផ្សាយរបស់សារព័ត៌មាន rtl.be របស់បែលហ្ស៊ិក។
រថភ្លើងគ្មានមនុស្សបើក និងគ្មានអ្នកដំណើរ បានបោះដំណើរទៅមុខក្នុងចម្ងាយ១២គីឡូម៉ែត្ររវាងស្ថានីយ Landenទៅកាន់ Tirlemont។ លោក Bart Crolsអ្នកនាំពាក្យអាជ្ញាធរផ្លូវដែកជាតិបែលហ្ស៊ិក (SNCB) បានបញ្ជាក់ឲ្យដឹងថា៖ «រថភ្លើងបានធ្វើដំណើរទៅមុខដោយយឺតៗ ហើយមនុស្សនៅតាមបណ្តោយផ្លូវរថភ្លើង Tiremontត្រូវបានជម្លៀស ដូច្នេះមិនមានអ្នកណាម្នាក់រងគ្រោះថ្នាក់នោះឡើយ»។
ដំបូងឡើយរថភ្លើងបានចេញដំណើរពីតំបន់ Louvainហើយអ្នកបើកបរមើលឃើញថារថភ្លើងមានបញ្ហាបន្ទាប់គាត់ចុះពិនិត្យមើល។ នៅពេលដែលអ្នកបើកបរកំពុងធ្វើការពិនិត្យស្រាប់តែរថភ្លើងចេញដំណើរទៅមុខយឺតៗចោលខ្លួន។
នៅពេលហេតុការណ៍នេះបានកើតឡើង អ្នកបើករថភ្លើងបានរាយការណ៍ទៅសហការីរបស់ខ្លួនឲ្យធ្វើការប្រុងប្រយ័ត្ននិងជូនដំណឹងដល់អ្នកនៅតាមបណ្តោយផ្លូវ។ គ្រប់ភ្លើងសញ្ញានៅលើរថយន្តចេញពណ៌បៃតងទាំងអស់។
អាជ្ញាធរផ្លូវដែក SNCB បានគូសបញ្ជាក់ថា នេះជាករណីដំបូងបំផុត ខណៈការស៊ើបអង្កេតស៊ីជម្រៅមួយកំពុងតែដំណើរការ។ រថភ្លើង ស្ថិតនៅក្រោមការត្រួតពិនិត្យដើម្បីស្វែងរកមូលហេតុពិតប្រាកដនៃការចេញដំណើរទៅមុខដោយស្វ័យប្រវត្តិរបស់ «រថភ្លើងខ្មោច» មួយនេះ។
មិនទាន់មានការសន្និដ្ឋានណាមួយថា ជាបញ្ហាបច្ចេកទេស ឬក៏បញ្ហាដែលបង្កើតឡើយដោយមនុស្សនោះឡើយ។ អ្នកបើកបរគ្រាន់តែបញ្ជាក់ថា ខ្លួនបានលឺសំឡេងមិនស្រួល ទើបសម្រេចចុះត្រួតពិនិត្យ ប៉ុន្តែវាបែរជាបោះដំណើរទៅមុខចោលខ្លួន៕
© រក្សាសិទ្ធិដោយ thmeythmey.com
