អន្តរជាតិ
កូរ៉េខាងជើងគំរាមវាយបក ខណៈកូរ៉េខាងត្បូងនិងអាមេរិកត្រៀមធ្វើសមយុទ្ធរួមគ្នា
× កូរ៉េខាងជើងបានបរិហារសមយុទ្ធយោធារួមគ្នារវាងអាមេរិកនិងកូរ៉េខាងត្បូងនៅខែក្រោយ និងបានព្រមានវាយបកលើការប៉ុនប៉ងរបស់កូរ៉េខាងត្បូងដែលចង់ផ្ដួលរំលំរបបកុម្មុយនីស្តនេះ។ ឧបទ្វីបកូរ៉េដែលមានស្ថានភាពរង្គោះរង្គើនោះកាន់តែធ្លាក់ទៅក្នុងគ្រោះថ្នាក់ នៅពេលដែលអាមេរិកនិងសម្ព័ន្ធមិត្តរបស់ខ្លួននឹងធ្វើសមយុទ្ធរួមគ្នាដ៏ធំមួយ។
សូមស្ដាប់ព័ត៌មានលម្អិត៖
កូរ៉េខាងជើងថ្កោលទោសសមយុទ្ធយោធារួមគ្នារវាងអាមេរិកនិងកូរ៉េខាងត្បូងដែលគ្រោងធ្វើនៅខែក្រោយ ហើយកូរ៉េខាងជើងក៏បានព្រមានសងសឹកវិញ ប្រសិនបើមានសកម្មភាពដែលចង់វាយប្រហារមកលើខ្លួន។ កូរ៉េខាងជើងចាត់ទុកសមយុទ្ធរួមគ្នានេះ ជាការប្រុងប្រៀបធ្វើសង្គ្រាមនិងជាសកម្មភាពបង្កហេតុ ហើយនឹងប្រើរាល់វិធានការទាំងអស់សម្រាប់ការពារមេដឹកនាំកំពូលនិងរបបរបស់ខ្លួន។
សារព័ត៌មានរដ្ឋកូរ៉េខាងជើងKCNA បានស្រង់សំដីមេបញ្ជាការកំពូលកងទ័ពថា កូរ៉េខាងជើងត្រៀមខ្លួនរួចរាល់ក្នុងការវាយបកដោយមិនប្រណីលើអ្នកណាដែលចង់ផ្ដួលរំលំមេដឹកនាំខ្លួន។ ដោយសំដៅលើកូរ៉េខាងត្បូង កងកម្លាំងកូរ៉េខាងជើងនឹងវាយប្រហារវិមានខៀវរបស់ប្រធានាធិបតីកូរ៉ខាងត្បូងមុនគេ។ ក្រៅពីនោះ កូរ៉េខាងជើងក៏បានគំរាមវាយប្រហារកងទ័ពអាមេរិកនៅកូរ៉េខាងត្បូងដែលមានចំនួនជិតបីម៉ឺននាក់ ក៏ដូចជាវាយប្រហារទឹកដីសហរដ្ឋអាមេរិកផ្ទាល់តែម្ដង។
សមយុទ្ធរួមគ្នារវាងអាមេរិកនិងកូរ៉េខាងត្បូងនៅលើកនេះ ជាលំហាត់យោធាធំជាងគេដោយមានការចូលរួមពីកងកម្លាំងយ៉ាងច្រើន។ សមយុទ្ធយោធាដ៏ធំនេះនឹងត្រូវចូលរួមដោយកងកម្លាំងអាមេរិកចំនួនជាង១ម៉ឺននាក់ ដែលមានការកើនឡើងច្រើនជាងសមយុទ្ធលើកមុនៗ។ ចំណែកកងទ័ពកូរ៉េខាងត្បូងនឹងមានចំនួនដល់ទៅជិតបីសែននាក់ ដែលរួមទាំងកងកម្លាំងពិសេសផងដែរ។
យ៉ាងណាមិញ សមយុទ្ធដែលតែងតែធ្វើរៀងរាល់ឆ្នាំចាប់ពីឆ្នាំ១៩៩០ ត្រូវបានកូរ៉េខាងជើងចាត់ទុកជាចេតនាបង្ករឿងនិងធ្វើឡើងដើម្បីរៀបចំឈ្លានពានទីក្រុងព្យុងយ៉ាង។ ហើយជារៀងរាល់ការធ្វើសមយុទ្ធ កូរ៉េខាងជើងតែងតែប្រកាសព្រមាន និងត្រៀមខ្លួនសងសឹកវិញ។ លើសពីនេះ កូរ៉េខាងជើងថែមទាំងបានយករឿងនេះ ជាលេសក្នុងការអភិវឌ្ឍកម្មវិធីនុយក្លេអ៊ែររបស់ខ្លួនទៀតផង។
សមយុទ្ធរួមគ្នានេះធ្វើឡើងតែរយៈពេលមិនប៉ុន្មានក្រោយកូរ៉េខាងជើងបាញ់រ៉ុក្កែតទៅលំហអាកាសនៅដើមខែកុម្ភៈនេះ។ សហគមន៍អន្តរជាតិបានរិះគន់យ៉ាងចាស់ដៃលើកូរ៉េខាងជើង។ ប្រទេសជាច្រើន ជាពិសេសអាមេរិកនិងសម្ព័ន្ធមិត្តរបស់ខ្លួនដោយបានអះអាងថាទីក្រុងព្យុងយ៉ាងល្មើសបម្រាមអង្គការសហប្រជាជាតិ ដែលហ៊ានប្រើបច្ចេកវិទ្យាបាលីស្ទិក។
ការវាយប្រហារដោយពាក្យសម្ដីទៅវិញទៅមកនេះនឹងធ្វើឲ្យស្ថានភាពនៅឧបទ្វីបកូរ៉េកាន់តែឡើងកម្ដៅទៀតហើយ។ គេត្រូវចងចាំថា ជាលក្ខណៈបច្ចេកទេស បងប្អូនកូរ៉េទាំងពីរនៅតែស្ថិតក្នុងលក្ខណៈសង្គ្រាមនៅឡើយ ថ្វីដ្បិតតែសង្គ្រាមត្រូវបានបញ្ចប់ក៏ដោយ។ នេះក៏ព្រោះតែសង្គ្រាមកូរ៉េឆ្នាំ១៩៥០-១៩៥៣ បញ្ចប់ត្រឹមដោយយុទ្ធសន្តិភាពមួយប៉ុណ្ណោះ មិនមែនសន្ធិសញ្ញាបញ្ចប់សង្គ្រាមនោះទេ៕
Tag:
កូរ៉េខាងជើង
កូរ៉េខាងត្បូង
អាមេរិក
© រក្សាសិទ្ធិដោយ thmeythmey.com