ជាតិ
សម្តេច ហ៊ុន សែន គិតគូររឿងរុះរើគណៈរដ្ឋមន្ត្រីនៅឆ្នាំ២០១៦
× ភ្នំពេញ៖ ក្រោយពីរដ្ឋាភិបាលអាណត្តិទី៥ដំណើរការបានជាង២ឆ្នាំកន្លះរួចមក សម្តេច ហ៊ុន សែន ប្រកាសនៅថ្ងៃព្រហស្បតិ៍នេះ គិតគូរពីការរុះរើគណៈរដ្ឋមន្ត្រីនៅឆ្នាំ២០១៦នេះ។ ការប្រកាសរបស់សម្តេចធ្វើឡើងនៅក្នុងពិធីបូកសរុបការងារឆ្នាំ២០១៥ និងលើកទិសដៅការងារឆ្នាំ២០១៦របស់ក្រសួងមហាផ្ទៃនៅថ្ងៃព្រហស្បតិ៍នេះ។
ក្រោយពីឡើងកាន់អំណាចអស់រយៈពេលជាង២ឆ្នាំក្នុងអាណត្តិទី៥រួចមក សម្តេច ហ៊ុន សែន បានចោទជាសំណួរថា តើសម្តេចគួររុះរើគណៈរដ្ឋមន្ត្រីនៅឆ្នាំ២០១៦នេះឬទេ បើមន្ត្រីគាត់មួយចំនួនធ្វើការមិនល្អ។ សម្តេចបញ្ជាក់ថា៖«ខ្ញុំកំពុងតែគិត ខ្ញុំកំពុងតែគិត បើទុកងាប់ខ្ញុំ»។
ការប្រកាសរបស់សម្តេចនៅថ្ងៃនេះ បានធ្វើឡើងស្របពេលដែលមានលេចលឺព័ត៌មានថា គណបក្សប្រជាជនកម្ពុជាគ្រោងធ្វើការផ្លាស់ប្តូរ ឬរុះរើគណៈរដ្ឋមន្ត្រីនៅពាក់កណ្តាលឆ្នាំ២០១៦នេះ។ តើជាការផ្លាស់ប្តូររដ្ឋមន្ត្រីចាស់ចេញ ហើយបញ្ចូលរដ្ឋមន្ត្រីថ្មី ឬជាការផ្ទេរភារកិច្ចរដ្ឋមន្ត្រីចាស់ទៅកាន់ក្រសួងផ្សេងៗ? ចម្លើយពិតប្រាកដ គេនៅមិនទាន់ដឹងនៅឡើយទេ។ ម្យ៉ាងវិញទៀត ការប្រកាសរបស់សម្តេចនៅថ្ងៃនេះដដែល បានធ្វើឡើងស្របពេលដែលមានលេចលឺព័ត៌មានលើកឡើងថា រដ្ឋាភិបាលគ្រោងបំបែកក្រសួងមួយចំនួនក្នុងនោះមានក្រសួងអប់រំ និងក្រសួងកសិកម្ម។ តែព័ត៌មានទាំងនេះ មិនទាន់ត្រូវបានគេបញ្ជាក់ឲ្យពិតប្រាកដនៅឡើយទេ។
ខាងក្រោមនេះជាសំឡេងរបស់សម្តេច ហ៊ុន សែន ជុំវិញបំណងរុះរើ ឬដោះដូរគណៈរដ្ឋមន្ត្រីនៅក្នុងឆ្នាំ២០១៦នេះ៖
© រក្សាសិទ្ធិដោយ thmeythmey.com