លោក ញឹក ប៊ុនឆៃ ៖ខ្ញុំអាយុច្រើនហើយប្រហែលជាអាចបានមួយអាណត្តិនេះទៀត

ជាតិ

នយោបាយជាតិ

លោក ញឹក ប៊ុនឆៃ ៖ខ្ញុំអាយុច្រើនហើយប្រហែលជាអាចបានមួយអាណត្តិនេះទៀត

26, Feb 2016 , 1:14 pm

រូបភាព

ដោយ: រំដួល ចិត្រា (Romdoul Chetra)

ប្រធានគណបក្សខ្មែររួបរួមជាតិ លោក ញឹក ប៊ុនឆៃ បានអះអាងថា ការបង្កើតគណបក្សថ្មីនេះ គឺអាចជួយឲ្យលោកមានឱកាសច្រើនសម្រាប់ប្រមូលអ្នករាជានិយម មកចូលរួមជាមួយគណបក្សខ្លួន ដើម្បីរៀបចំគណបក្សរាជានិយមមួយនេះ ទុកឲ្យអ្នកបន្តវេនជំនាន់ក្រោយថែរក្សាជំនួសលោក។

បើទោះជាមិនទាន់ហ៊ានអះអាងច្បាស់ថាខ្លួននឹងឈប់ធ្វើនយោបាយនៅពេលណាក៏ដោយ តែលោក ញឹក ប៊ុនឆៃ បានបង្ហើបថា លោកប្រហែលជាអាចធ្វើនយោបាយបានតែមួយអាណត្តិក្រោយនេះទៀតទេ ដោយសារលោកគិតថាខ្លួនមានអាយុច្រើនហើយ ដែលត្រូវទុកឱកាសឲ្យអ្នកជំនាន់ក្រោយរក្សាគណបក្សរាជានិយមនេះ។«ខ្ញុំក៏អាយុច្រើនដែរហើយ ប្រហែលជាបានមួយអាណត្តិនេះ អាចនឹងមានបន្តវេននៅអាណត្តិបន្តបន្ទាប់ទៀត»។ នេះជាការបញ្ជាក់របស់លោក ញឹក ប៊ុនឆៃ នៅក្នុងពិធីបើកសមាជគណបក្សខ្មែររួបរួមជាតិរបស់ខ្លួនជាលើកដំបូងនៅក្នុងសង្កាត់ជ្រោយចង្វារ នៅព្រឹកនេះ។

សូមស្ដាប់សំឡេង៖

នៅក្នុងពិធីបើកសមាជសកលបក្សនេះ សមាសភាពដែលដឹកនាំគណបក្សមាន លោក ញឹក ប៊ុនឆៃ ត្រូវបានសមាជិកបក្សជ្រើសតាំងជាប្រធាន លោក ទា ចំរ៉ាត់ ជាប្រធានកិត្តិយស និងលោក ខាន់ សាវឿន ជាអនុប្រធាន។

គួរបញ្ជាក់ថា លោក ញឹក ប៊ុនឆៃ បានសម្រេចចាកចេញគណបក្សហ្វ៊ុនស៊ិនប៉ិច ដែលដឹកនាំដោយសម្ដេចក្រុមព្រះ នរោត្តម រណឫទ្ធិ កាលពីថ្ងៃទី០៣ កុម្ភៈ ។លោក ញឹក ប៊ុនឆៃ ធ្លាប់បានអះអាងកន្លងមកថា ការដើរចេញពីបក្សនេះ ដោយសារតែលោកមិនពេញចិត្តនឹងការដឹកនាំរបស់សម្ដេចក្រុមព្រះ នរោត្តម រណឫទ្ធិ ដែលបានកៀបសង្កត់មកលើខ្លួន និងមន្ត្រីបក្សមួយចំនួនទៀត ។ លោកថា ទ្រង់ រណឫទ្ធិ បានបង្កើតបក្សពួកនិយម ដឹកនាំបែបអត្តនោម័ត ហើយបក្សគ្មានការរីកចម្រើនទេក្នុងរយៈពេល១ឆ្នាំនេះ។ លោក ញឹក ប៊ុនឆៃ អះអាងថា លោកគ្មានថ្ងៃនឹងវិលមករួបរួមជាមួយសម្ដេចក្រុមព្រះទៀតឡើយ៕