ជាតិ
អ្នកជំនាញ ព្រមានពីល្បឿនខ្យល់ និងកម្ពស់រលកនៅខេត្តជាប់សមុទ្រ
× ក្រសួងធនធានទឹក និងឧតុនិយម តាមរយៈនាយកដ្ឋានឧតុនិយម បានជូនដំណឹងឲ្យប្រជាពលរដ្ឋនៅបណ្តាខេត្តជាប់សមុទ្រ ជាពិសេសប្រជានេសាទ ឲ្យមានការប្រុងប្រយ័ត្ន ចំពោះ ខ្យល់បោកបក់ដែលមានល្បឿនលឿន និងកម្ពស់រលកសមុទ្រ។
លោក អ៊ុំ រីណា ប្រធាននាយកដ្ឋានឧតុនិយម បានថ្លែងប្រាប់សារព័ត៌មានថ្មីៗនៅថ្ងៃទី២៦ខែកុម្ភៈនេះថា ចាប់ពីថ្ងៃទី២៦ដល់ថ្ងៃទី ២៩ខែកុម្ភៈ ឆ្នាំ២០១៦ បណ្តាខេត្តទាំង៤ នៅជាប់សមុទ្រនឹងមានខ្យល់បោកបក់ខ្លាំង ដែលបង្កឲ្យរលកសមុទ្រមានកម្ពស់ខ្ពស់ជាងធម្មតាដូចគ្នា។ ខ្យល់បក់ខ្លាំង និងកម្ពស់រលកសមុទ្រខ្ពស់ ដែលបណ្តាលមកពីការផ្លាស់ប្តូរបាតុភូតនៅលើផ្ទៃសមុទ្រឥណ្ឌា។
«ទាំងតំបន់កៀកនឹងឆ្នេរសមុទ្រ និងតំបន់នៅកណ្តាលសមុទ្ររលកមានកម្ពស់ពី២ទៅ៣ម៉ែត្រដូចគ្នា ប៉ុន្តែល្បឿនខ្យល់នៅកៀកនឹងឆ្នេរសមុទ្រ គឺមានពី៧ម៉ែត្រ ទៅ១០ម៉ែត្រក្នុងមួយវិនាទី ចំណែកល្បឿនខ្យល់លឿនជាងតំបន់ក្បែរៗឆ្នេរ គឺ១០ម៉ែត្រ ទៅ១៥ម៉ែត្រក្នុងមួយវិនាទី»។ នេះជាការបញ្ជាក់របស់ ប្រធាននាយកដ្ឋានឧតុនិយមដដែល។
អ្នកជំនាញរូបនេះ ក៏បានអំពាវឲ្យប្រជាពលរដ្ឋប្រុងប្រយ័ត្ន និងត្រូវគិតគូរឲ្យច្បាស់ មុននឹងសម្រេចចិត្តថា ត្រូវចេញទៅនេសាទ ឬដឹកភ្ញៀវទេសចរទៅកាន់តំបន់កោះដូចធម្មតាឬអត់ ចៀសវាងកើតមានគ្រោះថ្នាក់ជាយថាណាមួយ។ ជាមួយនឹងការអំពាវនេះ លោកក៏បានសម្គាល់ដែរថា ស្ថានភាពអាកាសធាតុនៅកម្ពុជាក្នុងឆ្នាំនេះ មានការប្រែប្រួលយ៉ាងឆាប់ៗរហ័ស ខុសប្លែកពីឆ្នាំមុនៗ។ លោកថា៖«វាប្រែប្រួលភ្លាមៗតែម្តង ពេលត្រជាក់ គឺត្រជាក់ភ្លាមៗ ពេលត្រូវក្តៅ វាក្តៅភ្លាមៗតែម្តង ពេលខ្លះរកតែយើងជូនដំណឹងមិនទាន់ផង ដូច្នេះទាមទារឲ្យប្រជាពលរដ្ឋប្រុងប្រយ័ត្នឲ្យបានខ្ពស់»។
តែយ៉ាងណាក៏ដោយ ស្ថានភាពខ្យល់បក់នេះ មានឥទ្ធិពលខ្លាំងតែនៅតំបន់មាត់សមុទ្រប៉ុណ្ណោះ ប៉ុន្តែស្ថានភាពសីតុណ្ហភាពមិនមានការប្រែប្រួលឡើយ។ ផ្អែកតាមការព្យាករណ៍សីតុណ្ហភាពរបស់ក្រសួងធនធានទឹក និងឧតុនិយម តំបន់វាលទំនាបមានសីតុណ្ហភាពអប្បរមាពី២១-២៣ អង្សាសេ និងអតិបរមាពី៣១-៣៣អង្សាសេ។ ចំណែកតំបន់ខ្ពង់រាប សីតុណ្ហភាពអប្បរមាពី១៩-២១អង្សាសេ និងអតិបរមាពី៣១-៣៣អង្សាសេ ខណៈតំបន់មាត់សមុទ្រ សីតុណ្ហភាពអប្បរមាពី២២-២៤ អង្សាសេ និងអតិបរមាពី៣២-៣៤អង្សាសេ៕
Tag:
អ៊ុំ រីណា
អាកាសធាតុ
© រក្សាសិទ្ធិដោយ thmeythmey.com