អន្តរជាតិ
មេដឹកនាំអឺរ៉ុបប្រាប់ជនភៀសខ្លួនកុំឲ្យមកអឺរ៉ុបទៀត
× ប្រធានក្រុមប្រឹក្សាអឺរ៉ុបលោក ដូណាល់ ទូសក៍ បានប្រកាសព្រមានជនភៀសខ្លួនទាំងអស់ កុំឲ្យប្រថុយជីវិតឬចំណាយលុយអត់ប្រយោជន៍ដើម្បីធ្វើដំណើរមកកាន់តំបន់អឺរ៉ុប។ លោក ដូណាល់ ទូសក៏ បានប្រាប់ទៅរដ្ឋជាសមាជិកសហភាពអឺរ៉ុបទាំងអស់ត្រូវបញ្ឈប់សកម្មភាពជាឯកតោភាគី ក្នុងការទប់ស្កាត់ជនភៀសខ្លួន ស្របពេលដែលអឺរ៉ុបកំពុងបញ្ចេញថវិកាច្រើនសម្រាប់ដោះស្រាយបញ្ហានេះ។
សូមស្តាប់ការបកស្រាយរបស់លោក តន ចាន់រិទ្ធារ៉ា៖
ខណៈពេលដែលជនភៀសខ្លួនរាប់ម៉ឺននាក់កំពុងសម្រុកចូលអឺរ៉ុប ប្រធានក្រុមប្រឹក្សាអឺរ៉ុប ដូណាល់ ទូសក៍ (Donald Tusk) បានផ្ញើសារគ្រោតគ្រាតមួយទៅជនភៀសខ្លួនទាំងនោះ។ លោកបានប្រាប់ជនភៀសខ្លួនមិនត្រូវចំណាយជីវិតឬលុយដើម្បីមកអឺរ៉ុបទេ ព្រោះពួកគេទាំងនោះអាចនឹងមិនបានអ្វីទាំងអស់។ លោក ទូសក៍ ដែលកំពុងតែធ្វើដំណើរទៅប្រទេសតំបន់បាល់កង់ ក្រិក និងតួកគី បានបញ្ចុះបញ្ចូលឲ្យមានវិធានការតឹងរឹងក្នុងការទប់ស្កាត់លំហូរជនភៀសខ្លួន ដែលភាគច្រើនមកពីមជ្ឈិមបូព៌ា។
បើតាម Reuters ក្រិកនិងតួកគី ជាប្រទេសជួរមុខពីរ ដែលជាទ្វារឆ្លងកាត់ទៅប្រទេសអឺរ៉ុបជឿនលឿនដទៃទៀត របស់លំហូរជនភៀសខ្លួនដ៏អាក្រក់បំផុតចាប់តាំងសង្គ្រាមលោកលើកទីពីរមក។ ជនភៀសខ្លួនរាប់ពាន់បានធ្វើដំណើរឆ្លងកាត់សមុទ្រអេជែនទៅតួកគីនិងក្រិក ដោយសង្ឃឹមថា នឹងមានសំណាងបានបន្តជីវិតប្រសើរនៅអឺរ៉ុប។
យ៉ាងណាមិញ នៅទីក្រុងអាថែន លោក ដូណាល់ ទូសក៍ និយាយថា កុំជឿពួករត់ពន្ធឲ្យសោះ ហើយកុំប្រថុយជីវិតនិងលុយ វាគ្មានបានអ្វីមកវិញទេ។ ជាមួយគ្នានេះ លោក ទូសក៍ ក៏បានបញ្ជាក់ពីគោលបំណងរបស់អឺរ៉ុប គឺត្រូវតែបំបាត់លំហូរជនភៀសខ្លួនខុសច្បាប់ដែលធ្វើដំណើរពីតួកគីទៅក្រិក។
១. រដ្ឋអឺរ៉ុប ត្រូវបញ្ឈប់សកម្មភាពឯកតោភាគីក្នុងការទប់ស្កាត់លំហូរជនភៀសខ្លួន
នៅឯទីក្រុងអាថែន ប្រធានក្រុមប្រឹក្សាអឺរ៉ុបរូបនេះក៏ឆ្លៀតរិះគន់ដល់សកម្មភាពប្រទេសមួយចំនួនដែលបានបិទឬរឹតបន្តឹងព្រំដែនរបស់ខ្លួន។ លោក ដូណាល់ ទូសក៍ ចាត់ទុកសកម្មភាពជាឯកតោភាគីនេះថា ធ្វើឲ្យប៉ះពាល់ដល់សាមគ្គីភាពរបស់អឺរ៉ុប។ លោកទូសក៍ លើកឡើងដូចនេះ ក្រោយពេលដែលអូទ្រីសនិងប្រទេសតំបន់បាល់កង់មួយចំនួនទៀត បានចាប់ផ្ដើមពង្រឹងច្រកចូលព្រំដែន។
វិធានការពង្រឹងច្រកព្រំដែនរបស់ប្រទេសទាំងនេះ បានបន្សល់ទុកជនភៀសខ្លួនរាប់ពាន់នាក់កំពុងជាប់គាំងនៅព្រំដែនរវាងក្រិកនិងម៉ាសេដ្វាន ដ្បិតម៉ាសេដ្វានបានអនុញ្ញាតឲ្យជនភៀសខ្លួនតិចតួចប៉ុណ្ណោះឆ្លងកាត់ព្រំដែនរបស់ខ្លួន។ នេះជាបន្ទុកដ៏ធ្ងន់របស់រដ្ឋាភិបាលក្រិក ដែលត្រូវដោះស្រាយបន្ទាន់បើទោះជាកំពុងរងគ្រោះបញ្ហាសេដ្ឋកិច្ចក៏ដោយ។
ក្នុងសន្និសីទជាមួយលោក ទូសក៍ នាយករដ្ឋមន្ត្រីក្រិកលោក អាឡិចស៊ីស ត្ស៊ីប្រាស់ ចង់ឲ្យអឺរ៉ុបដាក់ទណ្ឌកម្មលើប្រទេសជាសមាជិកដែលមិនគោរពការសម្រេចចិត្តរបស់អឺរ៉ុប។ នេះប្រហែលជាលោក ត្ស៊ីប្រាស់ ចង់ឲ្យប្រទេសទាំងនោះទទួលយកជនភៀសខ្លួន ដើម្បីជួយសម្រាលបន្ទុករបស់ខ្លួន ដែលកំពុងរងវិបត្តិបំណុលមិនទាន់ដាច់ស្រេចផងនោះ។
២. អឺរ៉ុបបញ្ចេញលុយ៧៦០លានដុល្លារ ទប់ស្កាត់លំហូរជនភៀសខ្លួន
ក្នុងគោលបំណងដោះស្រាយវិបត្តិជនភៀសខ្លួនដែលនៅតែមិនទាន់ដាចស្រេច អឺរ៉ុបបានបញ្ចេញកញ្ចប់ទឹកប្រាក់ជាង៧៦០លានដុល្លារ ទៅឲ្យក្រិកនិងប្រទេសមួយចំនួនទៀត ដើម្បីដោះស្រាយបញ្ហាមួយនេះ។ ក្រិកដែលកំពុងជួបប្រទះបញ្ហាសេដ្ឋកិច្ចខ្លួនឯងផងនោះ កំពុងតែចាត់វិធានការ ដោះស្រាយលំហូរជនភៀសខ្លួនដែលហូរចូលយ៉ាងគំហុក ក្រោយពេលដែលប្រទេសតំបន់បាល់កង់បានរឹតបន្តឹងព្រំដែនរបស់ខ្លួន។
ក្រិកស្ថិតនៅចំចំណុចកណ្ដាលនៃលំហូរជនភៀសខ្លួន មុននឹងធ្វើដំណើរទៅកាន់ប្រទេសអឺរ៉ុបផ្សេងទៀត ក្នុងគោលបំណងស្វែងរកជីវិតល្អប្រសើរ។ ជនភៀសខ្លួនច្រើនជាង១លាននាក់បានទៅដល់ក្រិក ចាប់តាំងពីឆ្នាំ២០១៥មក នៅពេលដែលជនភៀសខ្លួនជាច្រើនចាកចេញពីសង្គ្រាមនៅស៊ីរី និងអ៊ីរ៉ាក់ជាដើម។
ទឹកប្រាក់៧៦០លានដុល្លារនេះ នឹងត្រូវចែកជាបីដំណាក់កាលក្នុងរយៈពេលបីឆ្នាំខាងមុខ។ ហើយបើតាមលោក Christos Stylianides ដែលជាស្នងការទទួលបន្ទុកជំនួយមនុស្សធម៌របស់អឺរ៉ុប ជំនួយភាគច្រើននឹងត្រូវផ្ដល់ទៅឲ្យក្រិក ជាទីដែលមានវិបត្តិជនភៀសខ្លួនធ្ងន់ធ្ងរជាងគេ។ ក្រិកបានស្នើជំនួយទឹកប្រាក់៥២០លានដុល្លារ សម្រាប់ផ្ដល់ជំនួយក្នុងការសង់ទីជម្រកដល់ជនភៀសខ្លួនមួយសែននាក់៕
Tag:
អឺរ៉ុប
ជនភៀសខ្លួន
© រក្សាសិទ្ធិដោយ thmeythmey.com