អន្តរជាតិ
ហ្វីលីពីន រឹបអូសនាវាដឹកទំនិញកូរ៉េខាងជើង
× រដ្ឋាភិបាលហ្វីលីពីន បានអះអាងនៅថ្ងៃទី០៥ ខែមីនា ថាអាជា្ញធរហ្វីលីពីនបានរឹបអូសនាវាដឹកទំនិញកូរ៉េខាងជើងដែលកំពុងចតនៅប្រទេសខ្លួន។ ចំណាត់ការនេះ ធ្វើឡើងស្របទៅនឹងសេចក្តី សម្រេចរបស់អង្គការសហប្រជាជាតិដែលជាប្រភេទទណ្ឌកម្មថ្មីដ៏ធ្ងន់ធ្ងរបំផុតប្រឆាំងនឹងការសាកល្បងការបាញ់មីស៊ីល និងការអភិវឌ្ឍកម្មវិធីនុយក្លេអ៊ែររបស់កូរ៉េខាងជើង។
អ្នកនាំពាក្យប្រធានាធិបតីហ្វីលីពីន Severino Cabral បានថ្លែងតាមរយៈកម្មវិធីវិទ្យុជាតិហ្វីលីពីន ថា « Jin Teng » ដែលជានាវាផ្ទុកទំនិញកូរ៉េខាងជើងចំណុះ ៦៨៣០ តោន នឹងមិនត្រូវបានអនុញ្ញាតឲ្យចាកចេញពីកំពង់ផែ Subic ដែលស្ថិតនៅភាគខាងជើងនៃរដ្ឋធានីម៉ានីលនោះទេ។ នេះបើយោងតាមភា្នក់ងារព័ត៌មាន AFP ដែលបានដកស្រង់សម្តីអ្នកនាំពាក្យដដែលដែរថា អ្នកបើកបរនាវានោះ ក៏នឹងត្រូវបណ្តេញចេញពីប្រទេសហ្វីលីពីនផងដែរ។
ជុំវិញការបង្ខាំង ឬរឹបអូសនាវាដឹកទំនិញរបស់កូរ៉េខាងជើងរបស់ហ្វីលីពីននេះដែរ គឺជាចំណាត់ការមួយ ដ៏រហ័សក្នុងនាមហ្វីលីពីនជាសមាជិករបស់អង្គការសហប្រជាជាតិ។ តែបើយើងក្រឡេកមើលឲ្យស៊ីជម្រៅនោះ វាមិនមែនជារឿងដែលគួរភ្ញាក់ផ្អើលនោះទេ ដ្បិតសេចក្តីសម្រេចនោះ គឺត្រូវបានព្រាងដោយអាមេរិកដែលជាសម្ព័ន្ធមិត្តរបស់ខ្លួននោះ។
សូមរម្លឹកផងដែរថា ក្រុមប្រឹក្សាសន្តិសុខអង្គការសហប្រជាតិនៅថ្ងៃទី០២ ខែមីនាបានអនុម័តជាឯកច្ឆ័នលើសេចក្តីសម្រេចថ្មីមួយទៀតលេខ២២៧០ ប្រឆាំងសកម្មភាពដ៏ឃ្លើនរបស់កូរ៉េខាងជើងក្នុងការបាញ់សាកល្បងគ្រាប់បែកមីស៊ីលតាំងពីឆ្នាំ២០១៤ និង២០១៥ និងជាពិសេសនោះការបាញ់គ្រាប់បែកបរមាណូនៅថ្ងៃទី០៦ ខែមករា និងនៅថ្ងៃទី០៧ ខែកុម្ភៈ ឆ្នាំ២០១៦នេះ។
សេចក្ដីសម្រេចលេខ២២៧០ ឆ្នាំ២០១៦ ជាសេចក្តីសម្រេចទី៥ ដែលមាន៥២ចំណុចត្រូវបានចាត់ទុកថា ជាប្រភេទទណ្ឌកម្មបន្ថែមដ៏ធ្ងន់ធ្ងរបំផុតលើទណ្ឌកម្មចាស់ ប្រឆាំងនឹងកូរ៉េខាងជើង។ ក្នុងនោះរាល់សមាជិកទាំងអស់ តម្រូវឲ្យមានការត្រួតពិនិត្យលើទំនិញទាំងអស់ដែលនាំចេញនិងនាំចូលពីកូរ៉េខាងជើង មិនថាធ្វើឡើយតាមផ្លូវអាកាសឬសមុទ្រ កំណត់ពីការហាមឃាត់ការនាំចេញធ្យូងថ្ម ដែក មាស និងរ៉ែមានតម្លៃដទៃទៀត ពីកូរ៉េខាងជើងផងដែរ ដែលនេះគឺសំដៅដល់ការកាត់ផ្ដាច់ធនធានហិរញ្ញវត្ថុរបស់ក្រុងព្យុងយ៉ាង។ កូរ៉េខាងជើងទទួលបានចំណូលជាច្រើនលានក្នុងការនាំចេញភោគផលរ៉ែទាំងនេះ ដែលត្រូវប្រើសម្រាប់ការចំណាយរបស់ខ្លួន។
ក្រៅពីនោះ ក្រុមប្រឹក្សាសន្តិសុខក៏ពង្រឹងលើការហាមធ្វើពាណិជ្ជកម្មអាវុធ ជាពិសេសអាវុធធុនស្រាល និងបានអនុញ្ញាតឲ្យឃាត់កប៉ាល់ដែលសង្ស័យថា មានដឹកទំនិញខុសច្បាប់ទៅកូរ៉េខាងជើង។ សូម្បីនាឡិកាទំនើប ដូចជាសម្ភារៈកីឡាក៏ត្រូវបានហាមឃាត់ចូលទៅកូរ៉េខាងជើងផងដែរ ដែលការហាមឃាត់នេះសំដៅដល់ក្រុមមេដឹកនាំជាន់ខ្ពស់កូរ៉េខាងជើង។ លើសពីនេះទៅទៀត ប្រទេសជាសមាជិកអង្គការសហប្រជាជាតិមានសិទ្ធិបណ្ដេញអ្នកការទូត កូរ៉េខាងជើង ដែលពាក់ព័ន្ធនឹងការរត់ពន្ធអាវុធខុសច្បាប់ផងដែរ៕
© រក្សាសិទ្ធិដោយ thmeythmey.com