អន្តរជាតិ
នយោបាយអន្តរជាតិ
ចិន-រុស្ស៊ី គាំទ្រកិច្ចសន្ទនាភាគី៦ តែប្រឆាំងគម្រោងការបំពាក់ប្រព័ន្ធកម្ទេចមីស៊ីលនៅកូរ៉េខាងត្បូង
×
បើទោះបីជាក្រុមប្រឹក្សាសន្តិសុខអង្គការប្រជាជាតិបានអនុម័តលើសេចក្តីសម្រេចថ្មីដ៏ធ្ងន់ធ្ងរប្រឆាំងការសាកល្បងការបាញ់មីស៊ីលរបស់កូរ៉េខាងជើងក៏ដោយ វិធានការនេះមិនបានធ្វើឲ្យកូរ៉េខាងជើងថមថយសកម្មភាពដ៏ឃ្លើនរបស់ខ្លួននោះទេ។ ស្របជាមួយគ្នានេះ ចិន និងរុស្ស៊ី បានព្រមព្រៀងគ្នាក្នុងការស្វែងរកដំណោះស្រាយដើម្បីធានានូវការគ្មានការប្រកួតប្រជែងអាវុធក្នុងឧបទ្វីបកូរ៉េ និងគាំទ្រការបន្តកិច្ចសន្ទនាភាគីប្រាំមួយ (Six Party Talks)ផងដែរ។
រដ្ឋាភិបាលក្រុងប៉េកាំង និងរដ្ឋាភិបាលក្រុងមូស្កូ បានព្រមព្រៀងគ្នាសែ្វងរកដំណោះស្រាយក្នុងការធានាឲ្យបាននូវការគ្មាននុយក្លេអ៊ែរនៅក្នុងឧបទ្វីបកូរ៉េ និងគាំទ្រការបន្តកិច្ចសន្ទនាភាគីប្រាំមួយ(Six Party Talks) ដើម្បីបញ្ចប់នូវការគំរាមកំហែងពីអាវុធនុយក្លេអ៊ែរក្នុងតំបន់។ ការលើកឡើងនេះធ្វើឡើងក្នុងជំនួបរវាងរដ្ឋមន្ត្រីការបរទេសរុស្ស៊ីលោក Sergei Lavrov និងសមភាគីចិន លោក Wang Yi នៅថ្ងៃទី១១ ខែមីនាម្សិលមិញ ក្នុងក្រុងមូស្កូនៃប្រទេសរុស្ស៊ី។
ក្នុងសន្និសីទកាសែតក្រោយបញ្ចប់កិច្ចប្រជុំរវាងរដ្ឋមន្ត្រីទាំងពីរ លោក វ៉ាង យី បានបញ្ជាក់ដែរថាសេចក្តីសម្រេចក្រុមប្រឹក្សាសន្តិសុខអង្គការសហប្រជាជាតិលេខ២២៧០គួរតែត្រូវអនុវត្តឲ្យបានពេញលេញដើម្បីបញ្ឈប់នូវការអភិវឌ្ឍកម្មវិធីនុយក្លេអ៊ែររបស់កូរ៉េខាងជើង។ តែលោក ថា យន្តការទាំងនោះ ត្រូវ ធានាថាមិនធ្វើឲ្យប៉ះពាល់លើប្រជាជន និងតម្រូវការមនុស្សធម៌នោះទេ។
ក្នុងសន្និសីទដដែល លោក វ៉ាង ក៏បានព្រមានដែរថា រដ្ឋពាក់ព័ន្ធ ក៏មិនគួរធ្វើសកម្មភាពទាំងឡាយណា ដែលធ្វើឲ្យមានភាពតានតឹងកាន់តែធ្ងន់ធ្ងរទៅៗនៅក្នុងឧបទ្វីបកូរ៉េ ហើយអ្វីដែលគួរតែត្រូវធ្វើនោះគឺ ការបន្តកិច្ចសន្ទនាភាគីប្រាំមួយដែលជាបទបញ្ញត្តិមួយនៅក្នុងសេចក្តីសម្រេចដែលទើបតែអនុម័តដោយក្រុមប្រឹក្សាសន្តិសុខអង្គការសហប្រជាជាតិកន្លងទៅ។ ភាគីប្រាំមួយមានដូចជា ចិន ជប៉ុន កូរ៉េខាងជើង កូរ៉េខាងត្បូង រុស្ស៊ី និងអាមេរិក។
សូមរម្លឹកផងដែរថា ក្រុមប្រឹក្សាសន្តិសុខអង្គការសហប្រជាតិនៅថ្ងៃទី០២ ខែមីនាបានអនុម័តជាឯកច្ឆ័នលើសេចក្តីសម្រេចថ្មីមួយទៀតប្រឆាំងសកម្មភាពដ៏ឃ្លើនរបស់កូរ៉េខាងជើងក្នុងការបាញ់សាកល្បងគ្រាប់បែកមីស៊ីលតាំងពីឆ្នាំ២០១៤ និង២០១៥ និងជាពិសេសនោះការបាញ់គ្រាប់បែកបរមាណូនៅថ្ងៃទី០៦ ខែមករា និងនៅថ្ងៃទី០៧ ខែកុម្ភៈ ឆ្នាំ២០១៦នេះ។ សេចក្តីសម្រេចលេខ២២៧០ ដែលបានបញ្ញាត្តិ៥២ចំណុចនោះ ត្រូវបានចាត់ទុកថាជាទណ្ឌកម្មមួយដ៏ធ្ងន់ធ្ងរបន្ថែមលើទណ្ឌកម្មដែលបានអនុម័តដោយក្រុមប្រឹក្សាសន្តិសុខកន្លងមក។
ស្របជាមួយនឹងទណ្ឌកម្មនេះ កូរ៉េខាងត្បូង និងអាមេរិក ក៏បានចាប់ផ្តើមការចរចាក្នុងការដំឡើងប្រព័ន្ធ ការពារ និងប្រឆាំងមីស៊ីលប៉ាលីស្ទីល (THAAD) នៅកូរ៉េខាងត្បូងផងដែរ ដែលសកម្មភាពនេះ ត្រូវបាន រុស្ស៊ី និងចិន យល់ឃើញថាលើសពីប្រព័ន្ធការពារ និងថែមទាំងជំរុញឲ្យមានការប្រកួតប្រជែងផ្នែកសព្វាវុធនៅក្នុងតំបន់ទៀតផង៕
© រក្សាសិទ្ធិដោយ thmeythmey.com