អ្នកឃ្លាំមើលសិទ្ធិមនុស្សនៅកម្ពុជា អះអាងថា បើចង់ឲ្យតុលាការដោះលែង លោក មាជ សុវណ្ណរ៉ានិងសកម្មជនផ្សេងទៀត លុះត្រាតែមានការចរចារវាងថ្នាក់ដឹកនាំគណបក្សប្រជាជនកម្ពុជា និងថ្នាក់ដឹកនាំគណបក្សសង្គ្រោះជាតិ។ ពួកគេហ៊ាន លើកឡើងបែបនេះ ដោយសំអាងលើហេតុផលថា ការចាប់សកម្មជនបក្សប្រឆាំងទាំងអម្បាលម៉ាន គឺជារឿងនយោបាយសុទ្ធសាធ។
ក្រុមអ្នកតាមដានសិទ្ធិមនុស្ស នៅតែប្រកាន់ជំហររបស់ខ្លួនដដែលថា ករណីលោក មាជ សុវណ្ណរ៉ា និងសកម្មជនបក្សប្រឆាំងផ្សេងទៀត គឺកើតចេញពីជម្លោះនយោបាយរវាងបក្សកាន់អំណាចនិងបក្សប្រឆាំង។ ពួកគេលើកឡើងថា បើអ្នកនយោបាយពាក់មុខយក្សដាក់គ្នា សកម្មជននឹងបន្តជាប់ពន្ធនាគារ តែបើអ្នកនយោបាយពាក់មុខទេវតាដាក់គ្នា នោះសកម្មជនប្រាកដជាត្រូវបានដោះលែងជាមិនខាន។
ក្រុមមន្ត្រីសង្គមស៊ីវិល បន្ថែមទៀតថា បើតាមបទពិសោធកន្លងមក រាល់បញ្ហានឹងត្រូវបានបញ្ចប់ មិនថារឿងនៅតុលាការឬរឿងក្រៅតុលាការ ឲ្យតែអ្នកនយោបាយមានឆន្ទៈចង់ដោះស្រាយ។ តែបើអ្នកនយោបាយមិនចុះសម្រុងគ្នា នោះអ្វីៗនឹងគាំង ទៅមុខមិនរួច។
ប្រធានផ្នែកបច្ចេកទេសឃ្លាំមើលការរំលោភសិទ្ធិមនុស្សនៃអង្គការលីកាដូ លោក អំ សំអាតមើលឃើញថា ការដោះស្រាយតាមផ្លូវនយោបាយ ទើបជាក្តីសង្ឃឹមសម្រាប់សកម្មជនបក្សប្រឆាំងទាំងនោះ។ លោក គ្មានទំនុកចិត្តលើតុលាការថា អាចដោះស្រាយបញ្ហារបស់សកម្មបក្សប្រឆាំងដោយយុត្តិធម៌ឡើយ ។
លោក អំ សំអាត បានបញ្ជាក់បែបនេះថា៖«រឿងទាំងអស់នេះ យើងជាក្រុមសង្គមស៊ីវិលបានចាត់ទុក ថាជារឿងនយោបាយទៅហើយ។ អ៊ីចឹងបើគ្មានដំណោះស្រាយតាមផ្លូវនយោបាយណាមួយទេ អ្នកទាំង១១នាក់នេះ រួមទាំងលោកហុង សុខហួរ និងអ្នកផ្សេងទៀត ក៏មិនអាចនឹងមានផ្លូវរួចខ្លួនពីពន្ធនាគារបានដែរ ។ តែនៅថ្ងៃក្រោយ បើអ្នកនយោបាយត្រូវរ៉ូវគ្នា អ្នកទាំងអស់នោះ អាចនៅក្រៅឃុំ ឬលើកលែងការចោទប្រកាន់»។
ចំណែកឯ ណៃ វង់ដា អនុប្រធានផ្នែកស៊ើបអង្កេតសិទ្ធិមនុស្សនៃសមាគមការពារសិទ្ធិមនុស្សអាដហុក សង្កេតឃើញថា ពេលទិដ្ឋភាពនយោយបាយកម្ពុជាល្អក់កករ នោះសេចក្តីសម្រេចរបស់តុលាការ ប្រាកដជាផ្តល់ផលអវិជ្ជមានសម្រាប់បក្សប្រឆាំង។ លោកបញ្ជាក់ដូច្នេះថា៖«បរិយាកាសនយោបាយបច្ចុប្បន្នអាប់អួល អ៊ីចឹងសេចក្តីសម្រចរបស់តុលាការ មិនធ្វើឲ្យពួកយើងភ្ញាក់ផ្កើលនោះទេ»។
ការលើកឡើងរបស់ក្រុមសង្គមស៊ីវិលខាងលើ ធ្វើឡើងនៅចំពោះមុខក្រុមអ្នកសារព័ត៌មាន ក្រោយពីបញ្ចប់សវនាការលើសំណុំរឿងលោក មាជ សុវណ្ណរ៉ា និងសកម្មជនបក្សប្រឆាំង១០នាក់ផ្សេងទៀត នៅសាលាឧទ្ធរណ៍ នាពេលព្រឹក ថ្ងៃទី១៧ មីនា។ សាលាឧទ្ទរណ៍បានកោះហៅជនជាប់ចោទទាំង១១ ឲ្យចូលឆ្លើយបំភ្លឺនូវករណីចំនួន២ ។ ករណីទី១ គឺការសុំជំទាស់សេចក្តីសម្រេចរបស់សាលារាជធានីភ្នំពេញ ដែលមិនឲ្យលោកនៅក្រៅឃុំ ដើម្បីបានព្យាបាលជំងឺនៅបរទេស។ តែសំណើនេះ ត្រូវបានក្រុមប្រឹក្សានៃអង្គចៅក្រម ច្រានចោល ដោយអះអាងថា សេចក្តីសម្រេចរបស់តុលាការជាន់ទាប គឺជាសេចក្តីសម្រេចដែលត្រឹមត្រូវ។
កន្លងមក លោក មាជ សុវណ្ណារ៉ា បានស្នើឲ្យសាលាដំបូងរាជធានីភ្នំពេញ ដោះលែងលោកនៅក្រៅឃុំ ដើម្បីបានទៅព្យាបាលជំងឺ ព្រមទាំងបានជួបភរិយានិងកូន នៅសហរដ្ឋអារមេរិក ។ ប៉ុន្តែ សាលាជំនុំជម្រះក្តីជាន់ទាបមួយនេះ បានបដិសេធ។ការបដិសេធសំណើរបស់លោក មាជ សុវណ្ណរ៉ា បែបនេះហើយ ទើបក្រុមសង្គមស៊ីវិល អះអាងថា តុលាការ ហាក់ដូចជាសម្រេចតាមបង្គាប់បញ្ជារបស់អ្នកមានអំណាច ខណៈពេលដែលអ្នកនយោបាយ កំពុងតែព្យាបាទគ្នា។
ចំណែកឯ ករណីទី២ គឺការសុំជំទាស់នឹងសេចក្តីសម្រេចរបស់សាលារាជធានីភ្នំពេញដូចគ្នា ដែលសម្រេចឲ្យសកម្មជនទាំង១១នោះ ជាប់ពន្ធនាគារចាប់ពី១៥ឆ្នាំ ដល់២០ឆ្នាំ ។ ប៉ុន្តែសម្រាប់ករណីទី២នេះ សាលាឧទ្ធរណ៍មិនទាន់សម្រេចនៅឡើយទេ។
លោក ជូង ជូងី មេធាវីការពារក្តីរបស់ជនជាប់ចោទទាំង១១រូប បានលើកឡើងថា មូលហេតុដែលលោកប្តឹងឧទ្ធរណ៍នេះ ដោយសារតែការសម្រេចរបស់សាលាដំបូងរាជធានីភ្នំពេញ បានធ្វើខុសនីតិវិធីក្រមព្រហ្មទណ្ឌ។ លោកបញ្ជាក់ពីផ្លូវច្បាប់បែបនេះថា ការសម្រេចរបស់តុលាការក្នុងបទល្មើសព្រហ្មទណ្ឌ មិនអាចដំណើរការទៅដោយគ្មានមេធាវីរបស់ជនជាប់ចោទឡើយ។
សូមរម្លឹកថា កាលពីថ្ងៃទី ២៥ ខែធ្នូ ឆ្នាំ២០១៥ សាលាដំបូងរាជធានីភ្នំពេញ បានបើកសវនាការលើសំណុំរឿងលោក មាជ សុវណ្ណរ៉ា និងសកម្មជនទាំង១០ នាក់នោះ ដោយគ្មានមេធាវីរបស់ពួកគេនោះទេ។ តុលាការជាន់ទាបមួយនេះ បានចោទប្រកាន់លោក មាជ សុវណ្ណរ៉ា និងសកម្មជនទាំង១០នាក់ ពីបទដឹកនាំធ្វើកុបកម្ម ញុះញង់ឲ្យប្រព្រឹត្តបទឧក្រិដ្ឋ និងផ្តើមគំនិតក្នុងអំពើហិង្សា ដោយចេតនា មានស្ថានទម្ងន់ទោស នៅក្នុងហេតុការណ៍ប៉ះទង្គិចគ្នា នៅលើស្ពាននាគ កាលពីថ្ងៃទី ១៥ ខែកក្កដា ឆ្នាំ ២០១៤ ៕