ជាតិ
នយោបាយជាតិ
អាជ្ញាធរខេត្តពោធិ៍សាត់ ដាក់កម្លាំងការពារមិនឲ្យខាងCNRP និងយុវជនតវ៉ា ប៉ះទង្គិចគ្នា រូបភាព៖ ហ្វេសប៊ុក Srey Chamroeu
× រូបភាព៖ ហ្វេសប៊ុក Srey Chamroeu
× អាជ្ញាធរខេត្តពោធិ៍សាត់ កំពុងជួយការពារសណ្ដាប់ធ្នាប់ សុវត្ថិភាព ដល់ថ្នាក់ដឹកនាំគណបក្សសង្គ្រោះជាតិ ដែលកំពុងចុះជួបប្រជាពលរដ្ឋនៅក្នុងខេត្តនេះ ដោយមិនឲ្យរងការបំភិតបំភ័យពីក្រុមយុវជន ដែលនាំគ្នាតវ៉ានោះឡើយ។
មេបញ្ជាការកងរាជអាវុធហត្ថខេត្តពោធិ៍សាត់លោក ខេង ទីតូ បានអះអាងថា បើទោះជាមានក្រុមយុវជនដែលបាននាំគ្នាពីភ្នំពេញ មកស្រែកតវ៉ារំខានដល់ការជួបជុំអ្នកគាំទ្រនិងប្រជាពលរដ្ឋនៅមូលដ្ឋានរបស់ឯកឧត្តម កឹម សុខា ប្រធានស្ដីទីគណបក្សសង្គ្រោះជាតិក៏ដោយ ក៏មិនអាចមានបញ្ហាប៉ះទង្គិចគ្នាជាយថហេតុណាមួយឡើយ ព្រោះលោកបានបញ្ជាឲ្យកងកម្លាំងនិងអាជ្ញាធរមានសមត្ថកិច្ច ចុះជួយការពារអ្នកនយោបាយនៅគោលដៅទាំងនោះហើយ។
ថ្លែងប្រាប់សារព័ត៌មានថ្មីៗ មេបញ្ជាការរូបនេះ បានបញ្ជាក់ដូច្នេះថា៖«យើងបានបញ្ជូនកងកម្លាំងអាវុធហត្ថ ទៅដាក់ការពារនៅគោលដៅទីនោះហើយ ដើម្បីការពារសណ្ដាប់ធ្នាប់ និងសុវត្ថិភាពដល់អ្នកនយោបាយ ដោយយើងនឹងការពារបញ្ចៀស មិនឲ្យមានការកើតឡើងនូវអំពើហិង្សាទៅវិញទៅមកនោះទេ»។
បើតាមលោក ខេង ទីតូ អាជ្ញាធរដែលបានចុះទៅជួយការពារថ្នាក់ដឹកនាំគណបក្សសង្គ្រោះជាតិនេះ មានចំនួនច្រើនដោយក្នុងនោះមានទាំងប៉ូលីស កងរាជអាវុធហត្ថ ព្រមទាំងអ្នកស្លៀកពាក់ឯកសណ្ឋានផ្លូវការ និងក្រៅផ្លូវការផងដែរ។
នៅព្រឹកថ្ងៃអាទិត្យនេះ មានក្រុមយុវជន ដែលអះអាងថាខ្លួនជានិស្សិតមានគ្នាប្រមាណជា៥០នាក់ បាននាំគ្នាទៅស្រែកតវ៉ារំខានការជួបជុំគ្នាជាមួយប្រជាពលរដ្ឋរបស់ប្រធានស្តីទីគណបក្សសង្គ្រោះជាតិ ដោយពួកគេចង់ឲ្យឯកឧត្តម កឹម សុខា បកស្រាយរឿងសំឡេងខ្សែអាត់សាសងស្នេហាជាមួយនារីម្នាក់ ដែលពួកគេចាត់ទុកថា ជាសំឡេងរបស់ឯកឧត្តម កឹម សុខា ដែលធ្វើឲ្យប៉ះពាល់ដល់វប្បធម៌ និងសីលធម៌សង្គម។ បើតាមហ្វេសប៊ុករបស់យុវជនម្នាក់ឈ្មោះ ស្រី ចំរើន ការតវ៉ារបស់ពួកគេក៏ត្រូវបានសមត្ថកិច្ចកំពុងរារាំង។
កាលពីថ្ងៃទី១៨មីនា ក្រុមនិស្សិតដែលមិនគាំទ្រនិងអ្នកនយោបាយដែលប្រព្រឹត្តិរឿងអាស្រូវស្នេហាដឹកនាំដោយលោក ស្រី ចំរើន ក៏បានដាក់ពាក្យប្ដឹងឯកឧត្តម កឹម សុខា ទៅអង្គភាពប្រឆាំងអំពើពុករលួយមួយករណីទៀត ដោយស្នើឲ្យអង្គភាពមួយនេះ បើកការស៊ើបអង្កេតពាក់ព័ន្ធនឹងសំឡេងសាសងពីការទិញដី និងផ្ទះឲ្យនារីម្នាក់ ដែលពួកគេអះអាងថា ជាសំឡេងឯកឧត្តម កឹម សុខា នេះដែរ បន្ទាប់ពីពួកគេបាននាំគ្នាដាក់ញត្តិទៅរដ្ឋសភា ដើម្បីស្នើឲ្យស្ថាប័ននេះកោះហៅលោក កឹម សុខា ចេញមុខបកស្រាយរឿងសំឡេងខ្សែអាត់នេះ ។
តែព័ត៌មានទាក់ទងសំឡេងឆ្លើយស្នេហា ដែលមានការចោទប្រកាន់ថាជាសំឡេងរបស់ឯកឧត្តម កឹម សុខា និងយុវតីម្នាក់ មិនបានធ្វើឲ្យប្រធានស្តីទីគណបក្សប្រឆាំងស្មុគ្រស្មាញអារម្មណ៍នោះឡើយ។ ដោយមិននិយាយចំពីបញ្ហា ឯកឧត្តម កឹម សុខា ធ្លាប់បានបញ្ជាក់កន្លងមកថា បក្សរបស់លោកត្រូវតែធ្វើទៅតាមគោលដៅ តាមផែនការយុទ្ធរបស់ខ្លួន ដោយ«មិនត្រូវឈ្លោះ មិនឆ្លើយ មិនឆ្លង »ហើយមិនធ្វើអ្វីតាមតែគេចាក់ឲ្យលោតនោះទេ៕
© រក្សាសិទ្ធិដោយ thmeythmey.com