ជាតិ
សមយុទ្ធឆ្មាំអង្គរកម្ពុជា-អាមេរិកនៅខេត្តកំពង់ស្ពឺ បិទបញ្ចប់នាថ្ងៃសុក្រ
×
កងយោធពលខេមរភូមិន្ទ និងកងកម្លាំងជើងគោកសហរដ្ឋអាមេរិកប្រចាំនៅតំបន់ប៉ាស៊ីហ្វិកនឹងរៀបចំពិធីបិទជាផ្លូវការនៃសមយុទ្ធឆ្មាំអង្គរ ឆ្នាំ ២០១៦ នៅថ្ងៃសុក្រ ទី ២៥ ខែមីនា ខាងមុខនៅក្នុងខេត្តកំពង់ស្ពឺ។
សមយុទ្ធឆ្មាំអង្គរគឺជាសមយុទ្ធទ្វេភាគីប្រចាំឆ្នាំ ដែលឧបត្ថម្ភដោយកងកំលាំងជើងគោកអាមេរិកប្រចាំនៅតំបន់ប៉ាស៊ីហ្វិក ហើយមានកងយោធពលខេមរភូមិន្ទជាម្ចាស់ផ្ទះ ផ្តោតការយកចិត្តទុកដាក់លើប្រតិបត្តិការផ្តល់ជំនួយសង្គ្រោះមហន្តរាយ និងជំនួយមនុស្សធម៌។ ឆ្នាំនេះគឺជាឆ្នាំទី ៧ជាប់គ្នានៃសមយុទ្ធថ្នាក់តំបន់ដ៏មានសារៈសំខាន់ និងមានប្រយោជន៍ខ្ពស់នេះ ដែលប្រព្រឹត្តទៅពីថ្ងៃទី ១៤ ដល់ថ្ងៃទី ២៥ ខែមិនា ឆ្នាំ ២០១៦។
សកម្មភាពសំខាន់ៗនៃសមយុទ្ធឆ្មាំអង្គររួមមានការហ្វឹកហ្វឺននៅប៉ុស្ត៍បញ្ជាការ ការផ្លាស់ប្តូរគ្នាលើជំនាញវិស្វកម្ម ការសង្គ្រោះបន្ទាន់ផ្នែកពេទ្យ និងការហ្វឹកហ្វឺនលើការកំចាត់យុទ្ធភណ្ឌផ្ទុះ និងយុទ្ធនាការផ្តល់ឈាម។ ពិធីបិទមានសុន្ទរកថារបស់មន្ត្រីមកពីកងកំលាំងជើងគោកអាមេរិកប្រចាំនៅតំបន់ប៉ាស៊ីហ្វិក និងកងយោធពលខេមរភូមិន្ទ ព្រមទាំងការធ្វើបង្ហាញឡើងវិញនូវការជន្លៀសអ្នករងគ្រោះ នៅក្នុងអំឡុងពេលនៃបេសកកម្មថែរក្សាសន្តិភាព ការលោតឆ័ត្រយោងអោយមើល យុទ្ធនាការផ្តល់ឈាម និងការបង្ហាញដទៃទៀត។
ពិធីបិទជាផ្លូវការនៃសមយុទ្ធឆ្មាំអង្គរ ឆ្នាំ ២០១៦ នឹងប្រព្រឹត្តទៅនៅថ្ងៃសុក្រ ទី ២៥ ខែមិនា ឆ្នាំ ២០១៦ នៅវេលាម៉ោង ៨ ព្រឹក នៅសាលាហ្វឹកហ្វឺនសំរាប់កំលាំងថែរក្សាសន្តិភាពពហុជាតិរបស់កងយោធពលខេមរភូមិន្ទ ក្នុងខេត្តកំពង់ស្ពឺ៕
© រក្សាសិទ្ធិដោយ thmeythmey.com