អគ្គិសនីសៀមរាបប្រកាសផ្អាកការផ្គត់ផ្គង់មួយថ្ងៃនៅទូទាំងខេត្ត

ជាតិ

សង្គមជាតិ

អគ្គិសនីសៀមរាបប្រកាសផ្អាកការផ្គត់ផ្គង់មួយថ្ងៃនៅទូទាំងខេត្ត

24, Mar 2016 , 2:35 pm

រូបភាព

ដោយ: អុីសា រ៉ហានី (Isa Rohany)

សៀមរាប៖ អគ្គិសនីសៀមរាប បានចេញសេចក្តីជូនដំណឹង ស្តីពីការផ្អាកការផ្គត់ផ្គង់អគ្គិសនីនៅទូទាំងខេត្ត។ ការផ្អាកផ្គត់ផ្គង់អគ្គិសនីគឺធ្វើឡើងពេញមួយថ្ងៃ ដើម្បីបន្ថែមត្រង់ស្វូរថ្មី។

នៅថ្ងៃទី២៦ ខែមីនាខាងមុខនេះ អគ្គិសនីខេត្តសៀមរាប នឹងធ្វើការផ្អាកការផ្គត់ផ្គង់អគ្គិសនីពេញទូទាំងខេត្តសៀមរាប។ ការផ្អាកគឺធ្វើឡើងចាប់ពីម៉ោង ៨ព្រឹក ដល់ម៉ោង ៤រសៀល។ ក្នុងខ្លឹមសារសេចក្តីជូនដំណឹងរបស់អគ្គិសនីខេត្តសៀមរាប បានបញ្ជាក់ពីមូលហេតុយ៉ាងដូច្នេះថា គឺដើម្បីធ្វើការបន្ថែមត្រង់ស្វូរថ្មី ៥០ MVA នៅអនុស្ថានីយ៍ថ្មី ស្ថិតនៅភូមិខ្នារ សង្កាត់ជ្រាវ ក្រុងសៀមរាប។

យ៉ាងណាក៏ដោយ អគ្គិសនីខេត្តសៀមរាប បញ្ជាក់ថា តំបន់មួយចំនួនតូចនៅតែអាចមានអគ្គិសនីប្រើប្រាស់ឆ្លាស់គ្នាអំឡុងពេលការផ្អាកផ្គត់ផ្គង់ ដែលថាមពលនោះបានមកពីម៉ាស៊ីនភ្លើងរបស់អគ្គិសនីខេត្ត ដែលមានកម្លាំង ១០MW។

គួរបញ្ជាក់ថា អគ្គិសនីខេត្តសៀមរាបមានប្រភពពីប្រទេសថៃ ដោយភ្ជាប់តាមរយៈខ្សែបញ្ជូនបន្តពីខេត្តបន្ទាយមានជ័យ។ ខ្សែបញ្ជូនសព្វថ្ងៃមានកម្រិតតង់ស្យុង ១១៥គីឡូវ៉ុល។ បើតាមការបញ្ជាក់ពីប្រធានអគ្គិសនី លោក គង់ ពុទ្ធី ដែលធ្លាប់បានប្រាប់សារព័ត៌មានថ្មីៗនាពេលកន្លងមក គឺខាងអគ្គិសនីកំពុងរៀបចំផែនការតខ្សែបណ្តាញពីប្រទេសថៃ បញ្ជូនតាមខេត្តបាត់ដំបង មកកាន់ខេត្តសៀមរាប ដែលមានតង់ស្យុងរហូតដល់ ២៣០ គីឡូវ៉ុល ដើម្បីជំនួសខ្សែបញ្ជូនសព្វថ្ងៃ ដែលមានចំងាយឆ្ងាយ។ ការបន្ថែមនេះ បើតាមលោក គង់ ពុទ្ធី គឺដើម្បីបំពេញតម្រូវការប្រើប្រាស់ក្នុងខេត្តសៀមរាប ដែលមានកំណើនប្រើប្រាស់ប្រមាណ ៧០មេហ្គាវ៉ាត់៕