ជាតិ
សង្គមជាតិ
លោក អង្គ វង្សវឌ្ឍនា ថា តុលាការមានឯករាជ្យ តែលោក អេង ឆៃអ៊ាង ពុំទាន់ជឿជាក់
× ភ្នំពេញ៖ លោក អង្គ វង្សវឌ្ឍនា រដ្ឋមន្ត្រីក្រសួងយុត្តិធម៌ បន្តបដិសេធថា ក្រសួងយុតិ្តធម៌ពុំបានលូកដៃចូលកិច្ចការងារប្រព័ន្ធតុលាការនោះទេ លោកអះអាងថា ក្រសួងគ្រាន់តែផ្តល់ឯកសារ ឬភស្តុតាងមួយចំនួនដល់តុលាការ ដើម្បីជួយរកយុត្តិធម៌ជូនគូវិវាទ តែប៉ុណ្ណោះ។ ប៉ុន្តែ លោក អេង ឆៃអ៊ាង ពុំទាន់ជឿជាក់លើការអះអាងនេះឡើយ ដោយលោកថា រដ្ឋសភានឹងបន្តតាមដានកិច្ចការងារក្រសួងមួយនេះថែមទៀត។
លោក អង្គ វង្សវឌ្ឍនា បានចូលបំភ្លឺអំពីបញ្ហាប្រព័ន្ធយុត្តិធម៌ ជាពិសេសការអនុវត្តរបស់ប្រព័ន្ធតុលាការ កន្លងមក ជូនរដ្ឋសភា នៅថ្ងៃទី២៥ មីនានេះ តាមសំណើរបស់លោក អេង ឆៃអ៊ាង ប្រធានគណៈកម្មការទី ១ នៃរដ្ឋសភា គឺគណៈកម្មការសិទ្ធិមនុស្ស ទទួលពាក្យបណ្តឹង អង្កេត និងទំនាក់ទំនងរដ្ឋសភា ព្រឹទ្ធសភា។
ក្រោយពីពិភាក្សាអស់វេលាជាង ៣ម៉ោង ក្នុងវិមានរដ្ឋសភា ភាគីទាំងពីរបានឯកភាពគ្នានឹងបន្តដោះស្រាយបញ្ហាចំនួន ៤ចំណុច ក្នុងនោះ រួមមាន ការចាប់ ការឃុំខ្លួន និងការផ្តន្ទាទោសអនីតិជន,ការឃុំខ្លួនលើសនីតិវិធីកំណត់, កំហុសនៃការអនុវត្តន៏ នីតិវិធី និងការមិនអនុវត្តន៍តួនាទីរបស់ចៅក្រម និងព្រះរាជអាជ្ញា ជុំវិញករណីវិវាទដីធ្លី និងវិវាទផ្សេងទៀត និងឯករាជ្យភាពរបស់តុលាការ និងការជ្រៀតជ្រែក។
រដ្ឋមន្ត្រីក្រសួងយុត្តិធម៌ លោក អង្គ វង្សវឌ្ឍនា បានសន្យាថា ក្រសួងនឹងបន្តដោះស្រាយបញ្ហាមួយចំនួនបន្ថែមទៀត តបតាមសំណើលោក លោក អេង ឆៃអ៊ាង។ ចំពោះករណីការងារតុលាការវិញ លោកថា ក្រសួងពុំអាចជ្រៀតជ្រែកការងារតុលាការបាននោះទេ លោកថា ករណីដែលចៅក្រម និងព្រះរាជអាជ្ញាបានប្រព្រឹត្តកំហុសនោះ ក្រសួងនឹងបញ្ជូនឯកសារទៅឧត្តមក្រុមប្រឹក្សា នៃអង្គចៅក្រម ដើម្បីពិនិត្យ និងដោះស្រាយ។
លោកថ្លែងប្រាប់អ្នកសារព័ត៌មានយ៉ាងដូច្នេះថា៖«វាមានការយល់ខុសគ្នា រឿងនេះ ខ្ញុំគឺឆ្លើយទៅ គឺខ្ញុំមិនមានសិទ្ធិឆ្លើយផងដែរ ព្រោះវា ជារឿងរបស់តុលាការ ដូច្នេះខ្ញុំសុំរក្សាសិទ្ធិឯករាជ្យភាពរបស់ខ្ញុំដែរ ឯករាជ្យភាពរបស់តុលាការ ប៉ុន្តែឯករាជ្យភាពរបស់ក្រសួងយុត្តិធម៌ដែរ ជួនកាលករណីខ្លះ គឺខ្ញុំអត់មាន ជារួម គឺថារឿងទៅដល់តុលាការ គឺរឿងរបស់តុលាការ គឺខ្ញុំគ្រាន់តែសុំឲ្យតុលាការពន្លឿនករណីហ្នឹង សូមឲ្យពិនិត្យឲ្យបានត្រឹមត្រូវ រកយុត្តិធម៌ ហើយខ្ញុំមានឯកសារផ្សេងៗ ខ្ញុំនឹងបញ្ជូនទៅបន្ថែម ទៀត ដើម្បីឲ្យតុលាការមានភស្តុតាងគ្រប់គ្រាន់ ដើម្បីកាត់សេចក្តី»។
ជាការឆ្លើយតប លោក អេង ឆៃអ៊ាង បានសាទរនឹងការសន្យារបស់រដ្ឋមន្ត្រីក្រសួងយុត្តិធម៌ បើទោះបីជា លោកពុំទាន់ជឿជាក់ថា រដ្ឋមន្ត្រីក្រសួងយុតិ្តធម៌រូបនេះ អាចអនុវត្តតាមការ លើកឡើង និងការសន្យាខ្លួនក៏ដោយ។
លោក អេង ឆៃអ៊ាង ថ្លែងចំពោះមុខលោក អង្គ វង្សវឌ្ឍនា យ៉ាងដូច្នេះថា៖«យើងមិនទាន់ជឿទាំងស្រុងទេ ខ្ញុំ និងរដ្ឋសភានឹងតាមឃ្លាំមើលរឿងនេះទៀត។ ប៉ុន្តែយើងមានជំនឿថា ក្រោយពីការបំភ្លឺនេះ ក្រសួងយុតិ្តធម៌ នឹងដំណើរការល្អប្រសើរជាងមុន។ បើ មិនមានជំនឿតើយើងធ្វើរឿងនេះ (កោះហៅបំភ្លឺ) ធ្វើអ្វី»?
Tag:
អង្គ វង្សវឌ្ឍនា
អេង ឆៃអ៊ាង
តុលាការ
យុតិ្តធម៌
© រក្សាសិទ្ធិដោយ thmeythmey.com