រដ្ឋាភិបាលផ្តល់ថវិកា ៥ម៉ឺនរៀលដល់មន្ត្រីរាជការស៊ីវិលមួយនាក់ៗ ឱកាសបុណ្យចូលឆ្នាំថ្មី

ជាតិ

សង្គមជាតិ

រដ្ឋាភិបាលផ្តល់ថវិកា ៥ម៉ឺនរៀលដល់មន្ត្រីរាជការស៊ីវិលមួយនាក់ៗ ឱកាសបុណ្យចូលឆ្នាំថ្មី

25, Mar 2016 , 11:31 pm

រូបភាព

ដោយ:

ភ្នំពេញ៖ រាជរដ្ឋាភិបាលបានចេញអនុក្រឹត្យសម្រេចផ្តល់ថវិកាចំនួន ៥ម៉ឺនរៀល ជូនមន្ត្រីរាជការស៊ីវិលមួយនាក់ៗ ក្នុងឱកាសពិធីបុណ្យចូលឆ្នាំថ្មីប្រពៃណីជាតិខ្មែរ ឆ្នាំវក ពុទ្ធសករាជ ២៥៦០ ត្រូវនឹងគ្រិស្តសករាជ ២០១៦នេះ។ នេះបើតាមអនុក្រឹត្យស្តីពី ការផ្តល់ប្រាក់ឧបត្ថម្ភក្នុងឱកាសពិធីចូលឆ្នាំថ្មីប្រពៃណីជាតិ។ រដ្ឋាភិបាលបានបង្គាប់ក្រសួងសេដ្ឋកិច្ច និងហិរញ្ញវត្ថុ និងក្រសួងពាក់ព័ន្ធ ឲ្យសហការគ្នាផ្តល់ជាបុរេប្រទានសម្រាប់ប្រាក់ឧបត្ថម្ភ ដល់មន្ត្រីម្នាក់ៗ យ៉ាងយូរបំផុតត្រឹមថ្ងៃទី១១ ខែមេសា ឆ្នាំ២០១៦។

បើតាមអនុក្រឹត្យស្តីពី ការផ្តល់ប្រាក់ឧបត្ថម្ភក្នុងឱកាសពិធីចូលឆ្នាំថ្មីប្រពៃណីជាតិ ដែលត្រូវបានចុះហត្ថលេខាដោយសម្តេចនាយករដ្ឋមន្ត្រី ហ៊ុន សែន នៅថ្ងៃទី២៥ ខែមីនា ឆ្នាំ២០១៦នេះ ថវិកានេះ ត្រូវបានឧបត្ថម្ភដល់មន្ត្រីរាជការស៊ីវិល និងអតីតមន្ត្រីរាជការស៊ីវិលបាន និងកំពុងបម្រើការងារក្នុងស្ថាប័ននីតិប្បញ្ញត្តិ នីតិប្រតិបត្តិ និងតុលាការ។

មន្ត្រីទាំងនោះ រួមមាន នគរបាលជាតិកម្ពុជា មន្ត្រីពន្ធនាគារក្រសួងមហាផ្ទៃ យោធិននៃកងយោធពលខេមរភូមិន្ទ សមាជិកក្រុមប្រឹក្សារាជធានីខេត្ត ក្រុង ស្រុក ខណ្ឌ ឃុំ សង្កាត់ ប្រធានភូមិ អនុប្រធានភូមិ សមាជិកភូមិ មន្ត្រីជាប់កិច្ចសន្យា បុគ្គលិកអណ្តែកដែលកំពុងបម្រើការងារ នៅថ្នាក់ជាតិ និងថ្នាក់ក្រោមជាតិ ព្រមទាំងនិវត្តជន ជនបាត់បង់សម្បទាវិជ្ជាជីវៈ ជនបាត់បង់ សមត្ថភាពការងារ និងជនពិការដែលជាអតីតមន្ត្រីរាជការស៊ីវិល អតីតយោធិននៃកងយោធពលខេមរភូមិន្ទ និងអតីតមន្ត្រីនគរបាលជាតិកម្ពុជា។

រដ្ឋាភិបាលបានបង្គាប់ក្រសួង ស្ថាប័នដែលបានរៀបចំការបើកគណនីបៀវត្សជូនមន្ត្រីរាជការ បុគ្គលិក និងភ្នាក់ងារសាធារណៈរបស់ពួកគេរួចហើយ ត្រូវបញ្ជូលប្រាក់ឧបត្ថម្ភនេះ ចូលក្នុងគណនីមន្ត្រីទាំងនោះតែម្តង។ រីឯ ការផ្តលប្រាក់ឧបត្ថម្ភដល់មន្ត្រីជាប់កិច្ចសន្យា និងបុគ្គលិកអណ្តែត ត្រូវបញ្ជូលតាមគណីនបៀវត្សរបស់មន្ត្រីម្នាក់ៗទាំងអស់។

ចំពោះការក្រសួង ស្ថាប័នដែលពុំទាន់បានរៀបចំការបើកគណនីបៀវត្សជូនមន្ត្រីរាជការ បុគ្គលិក និងភ្នាក់ងារសាធារណៈរបស់ពួកគេរួចរាល់នោះ រដ្ឋាភិបាលបង្គាប់ក្រសួង ស្ថាប័នទាំងនោះ ឲ្យចាត់ចែងផ្តល់ប្រាក់ឧបត្ថម្ភដល់មន្ត្រីម្នាក់ៗគ្រប់ចំនួន និងទាន់ពេលវេលា។

ដោយឡែក និវត្តជនអតីតមន្ត្រីរាជការស៊ីវិល អតីតយោធិននៃកងយោធពលខេមរភូមិន្ទ និងអតីតមន្ត្រីនគរបាលជាតិកម្ពុជាដែលកំពុងបំពេញការងារជាមន្ត្រីជាប់កិច្ចសន្យា បុគ្គលិក អណ្តែត សមាជិកក្រុមប្រឹក្សារាជធានីខេត្ត ក្រុង ស្រុក ខណ្ឌ ឃុំ សង្កាត់ ប្រធានភូមិ អនុប្រធានភូមិ ឬសមាជិកភូមិ ត្រូវទទួលប្រាក់ឧបត្ថម្ភតែមួយកន្លែងប៉ុណ្ណោះ ស្ថិតក្រោមការចាត់ចែងរបស់ក្រសួងសង្គមកិច្ច អតីតយុទ្ធជន និងយុវនីតិសម្បទា។ នេះបើតាមអនុក្រឹត្យ រដ្ឋាភិបាល។

បើតាមអនុក្រឹត្យខាងលើ រដ្ឋាភិបាលបានបង្គាប់ក្រសួង ស្ថាប័នពាក់ព័ន្ធ ឲ្យទទួលខុសត្រូវ ក្នុងការពិនិត្យផ្ទៀងផ្ទាត់ រៀបចំសំណើ និងបើកប្រាក់ឧបត្ថម្ភកំណត់ក្នុងអនុក្រឹត្យ។ លើសពីនេះ រដ្ឋាភិបាលបានបញ្ជាក់ក្រសួងស្ថាប័នថ្នាក់ជាតិ និងរដ្ឋបាលថ្នាក់ក្រោមជាតិ ឲ្យលើកសំណើជាក់ស្តែងអំពីចំនួនមន្ត្រីដែលទទួលប្រាក់ឧបត្ថម្ភទៅក្រសួងសេដ្ឋកិច្ច ដើម្បីក្រសួងសេដ្ឋកិច្ចរៀបចំប្រកាសបន្ថែមឥណទានផ្តល់ដល់មន្ត្រីទាន់ពេលវេលា។

បើតាមទំព័រហ្វេសប៊ុកសម្តេចនាយករដ្ឋមន្ត្រី ហ៊ុន សែន ថវិកាឧបត្ថម្ភនេះ គឺជាអំណោយពិសេស សម្រាប់មន្ត្រីរាជការ ក្នុងឱកាសបុណ្យចូលឆ្នាំខ្មែរខាងមុខនេះ។ «ថវិកាឧបត្ថម្ភនេះគឺនឹងជួយសម្រាលដល់ការចំណាយមួយចំនួនរបស់មន្ត្រីរាជការយើងនៅក្នុងឱកាសបុណ្យចូលឆ្នាំថ្មីខាងមុខនេះ»។ នេះជាអក្សរលើទំព័រហ្វេសប៊ុកនាយករដ្ឋមន្ត្រី៕