ពីនេះ ពីនោះ
ខ្មែរមានដីមិនធ្វើកសិកម្ម តែកសិករដេកទ្រាំនឹងភាពក្រីក្រ
× ភ្នំពេញ៖ ប្រជាជនខ្មែរស្ទើតែគ្រប់ៗគ្នាតែងតែអួតសរសើប្រទេសខ្លួនឯងថា ជាប្រទេសកសិកម្ម ហើយប្រជាជនភាគច្រើនគឺជាកសិករ។ ក៏ប៉ុន្តែមូលហេតុអ្វីបានជាប្រជាជនខ្មែរមួយចំនួនគឺនៅតែក្រ នៅតែគ្មានស្បៀងអាហារគ្រប់គ្រាន់សម្រាប់ផ្គត់ផ្គងគ្រួសារ? មូលហេតុអ្វីបានខ្មែរសុកចិត្តរត់ទៅធ្វើការនៅស្រុកគេ ហើយទុកផ្ទៃដីដ៏ធំល្វឹងល្វើយ ដោយមិនមានបង្ករបង្កើនផលអ្វីទាំងអស់?
នៅគ្រប់ខេត្តទាំងអស់នៅក្នុងប្រទេសគេសង្គេតឃើញថា ប្រជាកសិករខ្មែរបានទុកដីឲ្យទំនេរចោលច្រើនជាងយកផ្ទៃដីមកដាំដុះភោគផលដំណាំកសិកកម្មផ្សេងៗ។ ទិដ្ឋភាពបែបនេះវាពិតជាមិនត្រឹមត្រូវតាមឈ្មោះថាជាប្រទេសកសិកម្មនោះទេ។
ការនិយាយបែបមិនមែនមានន័យថា មើលងាយខ្មែរមិនចេះដាំដុះ ធ្វើកសិកម្ម បង្ករបង្កើនផលនោះទេ។ ប៉ុន្តែបើតាមការសង្គេតជាក់ស្ដែង គេមើលឃើញយ៉ាងច្បាស់នូវហេតុពីយ៉ាងសំខាន់ៗ ដែលបណ្ដាលឲ្យមានការទុកផ្ទៃដីដ៏ធំល្វឹងល្វើយ ដោយគ្មានធ្វើអ្វីទាំងអស់នៅរដូវប្រាំ និងប្រជាកសិករខ្មែរនៅតែមានជីវភាពក្រីក្រលំបាក។
ចំពោះហេតុផលទី១ ដែលមនុស្សទូទៅតែងតែឃើញផ្ទៃដីទំនេរចោលបែបនេះ មកពីប្រជាកសិករខ្មែរមួយចំនួនមានទម្លាប់មួយគឺខ្ជិលក្នុងការធ្វើកសិកម្ម។ ពួកគាត់មានដី មានស្រែ ដែលអាចធ្វើកសិកម្មក្នុងរដូវប្រាំងបាន។ ប៉ុន្តែព្រោះតែភាពខ្ជិលច្រអូស ទើបមិននាំគ្នាបង្ករបង្កើនផល។ មិនតែប៉ុណ្ណោះពួកគាត់អាងអាជីពមួយទៀត គឺការធ្វើជាកម្មករចំណាកស្រុក ប្រើកម្លាំងទៅធ្វើការដូរប្រាក់ខែទាំងនៅក្នុងស្រុក និងទៅក្រៅប្រទេស។
ចំពោះហេតុផលទី២ គឺជាចំណុចដែល រដ្ឋាភិបាលមិនអាចប្រកែកបាន នោះគឺដោយសារគ្មានប្រភពទឹកសម្រាប់ប្រជាកសិករ។ បញ្ហាប្រព័ន្ធធារាសាស្ត្រហាក់មិនទាន់បានរៀបចំឲ្យបានគ្រប់គ្រាន់សម្រាប់ប្រជាជនតាមស្រុកស្រែចំការ ដែលនៅតែស្ថិតក្នុងបញ្ហាដ៏ចម្បងសម្រាប់ប្រជាពលរដ្ឋ។ កត្តានេះនាំឲ្យ ទ្រឹស្តីរបស់ពួកខ្មែរក្រហមមានលក្ខណៈត្រឹមត្រូវនៅត្រង់គេបានលើកឡើងថា«ធ្វើស្រែពឹងលើប្រឡាយមិនត្រូវពឹងលើមេឃទាំងស្រុងទេ»។
ព្រោះថា តាមការសង្គេតមើលជាក់ស្ដែងផ្ទៃដីដែលអាចបង្កើនផលកសិកម្មក្នុងរដូវប្រាំង គឺនៅមានទំហំតូចជាងផ្ទៃដីដែលនៅសេសសល់ខ្លាំងណាស់។ បន្ថែមពីនោះទៀត បញ្ហាជំនាញក្នុងការធ្វើកសិកម្ម បញ្ហាដើមទុន បញ្ហាទីផ្សារ គឺជាប្រភពដែលធ្វើឲ្យប្រជាជន មិនដាំដុះ និងបាក់ទឹកចិត្តនៅក្នុងការធ្វើកសិកម្មនេះ។
ជារួម ប្រជាជនខ្មែរតិច ផ្ទៃដីកសិកម្មធំ ប្រជាជនតាមស្រុកស្រែចំការមានទំហំដីជាកម្មសិទ្ធិក៏ច្រើន តែស្ថានភាពសេដ្ឋកិច្ចគ្រួសារមិនប្រាកដថា ល្អនោះទេ៕
© រក្សាសិទ្ធិដោយ thmeythmey.com