ពីនេះ ពីនោះ
កូនខ្មែរត្រូវចាំថាបុរាណវត្ថុធ្វើឲ្យខ្មែរមានតម្លៃ
× ភ្នំពេញ៖ តម្លៃរបស់ប្រទេសខ្មែរ ដែលអាចអួតអាងចំពោះអន្តរជាតិបានក្នុងពេលកន្លងទៅ គឺពឹងអាស្រ័យមួយភាគធំ ទៅលើសមិទ្ធផលដែលដូនតាបានបន្សល់ទុកឲ្យរាប់ពាន់ឆ្នាំមកហើយ។ សំណងប្រាសាទបុរាណគ្រប់បែប គ្រប់ទម្រង់ គ្រប់រចនាបថ បុរាណវត្ថុនានា ដែលកើតចេញពីគំនិតច្នៃបង្កើតរបស់បុព្វបុរសខ្មែរសម័យដើម និងភាពអំណោយទានខាងផ្នែកទីតាំងភូមិសាស្ត្រ គ្រប់យ៉ាងដែលនាំឲ្យបរទេសចង់ឃើញ ចង់ស្គាល់កម្ពុជាកាន់តែច្រើនឡើងៗ។
ប៉ុន្តែ «ព្រោះតែមិនយល់ និងមានភាពខ្វះខាតផ្នែកចំណេះដឹង គិតតែចំពោះបញ្ហាចម្អែតក្រពះ» កូនខ្មែរពីមួយជំនាន់ទៅមួយជំនាន់ បាននាំគ្នាទៅគាស់រម្លើង ថ្មប្រាសាទ ស្វែងរកបុរាណវត្ថុ ក្បាលអ្នកតា រូបចំលាក់ និងតឹកតាងបុរាណវត្ថុនានារបស់ប្រវត្តិសាស្ត្រ ដើម្បីយកទៅលក់ឲ្យជនទុច្ចរិត និងអ្នកជំនួញបរទេស។ មែនទែនទៅ ថ្ម ក្បាលអ្នកតា ចម្លាក់នានា វាមិនមានតម្លៃអ្វី ដែលឈ្មួញបរទេសទាំងនោះចង់បានដូចជាមាស ពេជ្រ នោះទេ។ ប៉ុន្តែ តម្លៃពិតរបស់សម្បត្តិទាំងអស់នោះ គឺតម្លៃផ្នែកវប្បធម៌ អត្តសញ្ញាណជាតិ និងជាតឹកតាងបញ្ជាក់ពីប្រវត្តិសាស្ត្ររបស់ខ្មែរ។ ថ្ម ទាំងនោះអាចនិយាយថាមិនមានតម្លៃទេ ប៉ុន្តែតម្លៃស្នាដៃរបស់ដូនតា សិល្បះនៅក្នុងការឆ្លាក់ អត្ថន័យនៃបុរាណវត្ថុ ទើបជាតម្លៃពិតនៃបុរាណវត្ថុទាំងនោះ។
កូនខ្មែរត្រូវតែដឹងពី មូលហេតុអ្វីដែលគេអំពាវនាវទិញក្បាលអ្នកតា រូបចម្លាក់ ថ្មសម្រិត នានាកន្លងមកនោះ? គេទិញ គេលក់បុរាណវត្ថុយើង គឺក្នុងគោលបំណង ប្រមូលយកអ្វីដែលជាអត្តសញ្ញាណជាតិ សម្បត្តិវប្បធម៌ជាតិ ព្រលឹងជាតិ ឲ្យអស់ពីទឹកដីខ្មែរ រហូតទីបំផុតខ្មែរគ្មានអ្វីបញ្ជាក់ជូនពិភពលោកថា ខ្លួនមានអីឲ្យពិតប្រាកដ។ ក្រោយមកខ្មែរ និងក្លាយជាប្រទេសមួយដែលមានតែសំបកខ្លួន ដោយមិនដឹងថាជាតិឯងមានអ្វីខ្លះ។
ជាក់ស្ដែងណាស់សម្រែកតោថ្ម ប្រាសាទសំបូរព្រៃគុក រូបចម្លាក់នានា នៅប្រាសាទព្រៃគុក នៅអង្គរ នៅតាមប្រាសាទនានាទូទាំងប្រទេសកម្ពុជាត្រូវបាន កូនខ្មែរខ្លួនឯងវាយបំបាក់ គាស់កកាយស្វែងរកបុរាណវត្ថុដើម្បីយកទៅលក់ ដោះដូរជាមួយលុយកាកបន្តិចបន្តួច។ ចំណែកចម្លាក់មួយចំនួន ខ្លួននៅខ្មែរ ក្បាល់នៅបស្ចឹមលោក ដៃនៅបូព៌ាប្រទេស ដែលដឹងហើយ ឮហើយសែនសង្វេកនូវស្នាដៃដ៏ពិសិដ្ឋ និងស្ទើរនឹកស្មានមិនដល់ថា មូលហេតុអ្វីបានចម្លាក់ខ្មែរធ្លាក់ទៅប្រទេសទាំងនេះយ៉ាងសង្រេងបែបនេះ?
ថ្វីដ្បិតថា បច្ចុប្បន្ននេះ ខ្មែរចាប់ផ្ដើម ចេះថែរក្សា និងការពារ ព្រមទាំងនាំយកបុរាណវត្ថុរបស់ខ្លួនមកថែរក្សាដោយខ្លួនឯងក៏ពិតមែន ប៉ុន្តែចាប់តាំងពីបញ្ចប់សង្គ្រាមមក កូនខ្មែរខ្លួនឯងបានលក់បុរាណវត្ថុខ្លួនទៅក្រៅប្រទេសច្រើនណាស់។ មូលហេតុដែលហ៊ាននិយាយបែបនេះគឺព្រោះតែការមើលឃើញរូបភាពជាក់ស្ដែងនៃទង្វើរបស់កូនខ្មែរ នៅក្នុងការគាស់រម្លើង ថ្មប្រាសាទនានាស្ទើគ្រប់កន្លែង ដែលមិនខ្វល់ពីការបាក់បែកប្រាង្គប្រាសាទ ដែលជាសម្បត្តិដ៏មានតម្លៃរបស់ជាតិ។ សូមកូនខ្មែរថែរក្សាសម្បត្តិជាតិ៕
© រក្សាសិទ្ធិដោយ thmeythmey.com