ជាតិ
បុណ្យចូលឆ្នាំ៖ ផ្ទះសំណាក់និងសណ្ឋាគារនៅសៀមរាបចាប់ផ្តើមឡើងថ្លៃ
× សៀមរាប៖ នេះទើបថ្ងៃទី៣១ ខែមីនា គឺមិនទាន់ចូលខែមេសា ដែលជាខែចូលឆ្នាំផង ម្ចាស់ផ្ទះសំណាក់ និងសណ្ឋាគារមួយចំនួនក្នុងទីក្រុងសៀមរាប បានប្រកាសពីការដំឡើងថ្លៃសេវាបន្ទប់របស់ខ្លួនរួចទៅហើយ។ មានផ្ទះសំណាក់ខ្លះ ឡើងថ្លៃពាក់កណ្តាល ធៀបនឹងតម្លៃបន្ទប់ចំពោះថ្ងៃធម្មតា។
ព្រឹត្តិការណ៍អង្គរសង្ក្រាន្ត បានទាក់ទាញភ្ញៀវទេសចរជាច្រើនឲ្យមកកម្សាន្តខេត្តសៀមរាប។ ភ្ញៀវទេសចរដែលចង់ដើរកម្សាន្តពេលអង្គរសង្ក្រាន្ត ឫថ្ងៃចូលឆ្នាំនៅសៀមរាប ត្រូវកក់បន្ទប់សម្រាកជាមុន ព្រោះថា បន្ទប់សណ្ឋាគារ ជាពិសេសបន្ទប់ផ្ទះសំណាក់ ដែលពេញនិយមសម្រាប់ទេសចរក្នុងស្រុកនោះ អាចនឹងអស់ក៏ថាបាន។
ម្ចាស់ផ្ទះសំណាក់ ច្នៃជាកូនវីឡាមួយដ៏ស្រស់ស្អាតនៅភូមិស្ទឹងថ្មី ក្បែរតំបន់ផ្សារចាស់ លោក គីរីន បានឲ្យដឹងថា បន្ទប់ស្នាក់នៅផ្ទះវីឡារបស់គាត់ ឡើងថ្លៃដល់៣០ដុល្លារ នៅក្នុងថ្ងៃបុណ្យចូលឆ្នាំ។ សម្រាប់ថ្ងៃធម្មតា គឺបន្ទប់ស្នាក់នេះ មានតម្លៃពី១៥ ទៅ២០ តែប៉ុណ្ណោះ។ លោក គីរីន ដែលជាម្ចាស់ផ្ទះសំណាក់ខ្មែរឥស្លាមដំបូងនៅសៀមរាប ធ្លាប់បានប្រាប់ពីមូលហេតុថា លោកដំឡើងថ្លៃតាមគេឯងពេលមានបុណ្យទានម្តងៗ ។ «វាជារឿងធម្មតាទេ កន្លែងណាក៏គេដំឡើងដែរ។ ពេលបុណ្យទានម្តងៗ តែប៉ុណ្ណឹង»។
បើទោះជាលោក គីរីន ម្ចាស់ផ្ទះសំណាក់ គីរីនម៉ារី មិនបានពន្យល់ពីមូលហេតុឲ្យជាក់លាក់ក៏ដោយចុះ តែការដំឡើងប្រាក់ឈ្នួលដល់បុគ្គលិក ជាមូលហេតុ។ បុគ្គលិកមិនត្រូវបានឈប់សម្រាកនោះទេ ដូច្នេះពួកគេត្រូវទទួលបានប្រាក់បន្ថែមនៅថ្ងៃបុណ្យនោះ។ នេះជាការលើកឡើងរបស់លោក ទិត្យ សុធារ៉ា ម្ចាស់សណ្ឋាគារ ៣០៦ នៅម្តុំផ្លូវលោកតាណឺយ។
យ៉ាងណាក៏ដោយ ម្ចាស់សណ្ឋាគារថ្មីថ្មោង លោក ទិត្យ សុធារ៉ា អះអាងថា កន្លែងរបស់លោកនឹងឡើងថ្លៃតិចតួចតែប៉ុណ្ណោះ បើធៀបនឹងកន្លែងដទៃ។ លោកពន្យល់ថា ការដំឡើងថ្លៃសេវា គឺលោកដើម្បីឲ្យលោកយកទៅបំពេញប្រាក់ឈ្នួលបុគ្គលិក ដែលត្រូវបន្ថែមពេលពួកគេធ្វើការក្នុងថ្ងៃត្រូវឈប់សម្រាក។ «ក្រៅពីដំឡើងថ្លៃឈ្នួលហើយ កន្លែងខ្ញុំក៏មានរៀបចំបាយឲ្យពួកគេហូបនៅក្នុងសណ្ឋាគារដែរ ព្រោះថាពេលនោះ ភ្ញៀវច្រើនមែនទែន មិនអាចដកខ្លួនបាន»។ នេះជាការបញ្ជាក់បន្ថែមរបស់លោក សុធារ៉ា មុននឹងលោកបន្តថា លោកមិនទាន់កំណត់តម្លៃដែលត្រូវឡើងពេលចូលឆ្នាំនេះទេ។
គួររម្លឹកផងដែរថា កាលពីថ្ងៃទី២៥ មីនាកន្លងទៅ ប្រធានមន្ទីរទេសចរណ៍ខេត្តសៀមរាប លោក ង៉ូវ សេងកាក់ ធ្លាប់បានប្រកាសកុំឲ្យម្ចាស់អាជីវកម្មទាំងអស់ គួរកុំឡើងថ្លៃហួសហេតុពេក។ ការណ៍នេះ លោក សេងកាក់ ដឹងច្បាស់ហើយថា រាល់ពេលមានបុណ្យទានម្តងៗ ពិសេសពេលអង្គរសង្ក្រាន្ត ឈ្នួញតែងដំឡើងថ្លៃសេវា តាមតែមាត់របស់ពួកគេ។ លោក សេងកាក់ អះអាងថា ធ្លាប់មានប្រជាពលរដ្ឋរអ៊ូដាក់ត្រចៀកលោក និងស្នើឲ្យមានវិធានការទប់ស្កាត់ផង៕
© រក្សាសិទ្ធិដោយ thmeythmey.com