លោក អ៊ឹម ឈុនលឹម និងលោក សំ ព្រហ្មនា ក្លាយជាសមាជិកក្រុមប្រឹក្សាធម្មនុញ្ញតាមច្រកផ្សេងគ្នា

ជាតិ

នយោបាយជាតិ

លោក អ៊ឹម ឈុនលឹម និងលោក សំ ព្រហ្មនា ក្លាយជាសមាជិកក្រុមប្រឹក្សាធម្មនុញ្ញតាមច្រកផ្សេងគ្នា

04, Apr 2016 , 12:43 pm

រូបភាព

ដោយ: ម៉ៅ សុផា

នៅថ្ងៃនេះ លោក សំ ព្រហ្មនា អតីតរដ្ឋលេខាធិការក្រសួងទេសចរណ៍ ត្រូវសភាបោះឆ្នោតបានផ្តល់សេចក្តីទុកចិត្តដោយជ្រើសតាំងជាសមាជិកនៃក្រុមប្រឹក្សាធម្មនុញ្ញ ហើយបើតាមការអះអាងរបស់សម្តេច ហ៊ុន សែន លោក អ៊ឹម ឈុនលឹម អតីតរដ្ឋមន្ត្រីក្រសួងរៀបចំដែនដី នគររូបនីយកម្ម និងសំណង់ ក៏បានក្លាយជាសមាជិកនៃស្ថាប័នកំពូលនេះផងដែរ តាមរយៈការជ្រើសតាំងពីសំណាក់ឧត្តមក្រុមប្រឹក្សានៃអង្គចៅក្រម។

ក្រោមសំឡេងគាំទ្រ៧៣សំឡេង មិនព្រម២៩សំឡេង និងអនុបវាទ៥សំឡេងពីអ្នកតំណាងរាស្ត្រគណបក្សប្រជាជនកម្ពុជា និងគណបក្សសង្គ្រោះជាតិ លោក សំ ព្រហ្មនា អតីតរដ្ឋលេខាធិការក្រសួងទេសចរណ៍ បានក្លាយជាសមាជិកថ្មីនៃក្រុមប្រឹក្សាធម្មនុញ្ញ។

ជាមួយគ្នាផងដែរ សម្តេចនាយករដ្ឋមន្ត្រី ហ៊ុន សែន បានអះអាង លោក អ៊ឹម ឈុនលឹម ដែលត្រូវបានបញ្ចប់តំណែងជាទេសរដ្ឋមន្ត្រី និងជារដ្ឋមន្ត្រីក្រសួងរៀបចំដែនដី នគររូបនីយកម្ម និងសំណង់ នោះ ត្រូវបានឧត្តមក្រុមប្រឹក្សាអង្គចៅក្រម ជ្រើសរើសជាសមាជិកថ្មីនៃក្រុមប្រឹក្សាធម្មនុញ្ញផងដែរ។

ក្រុមប្រឹក្សាធម្មនុញ្ញអណត្តិ ២០១៣-១៦ ដែលដឹកនាំដោយលោក ឯក សំអុល ឈានដល់ការបញ្ចប់អណត្តិរបស់ខ្លួន ហើយសមាជិកក្នុងអណត្តិនោះរួមមាន លោក ព្រហ្ម ញាណវិចិត្រ អង្គម្ចាស់ ស៊ីសុវត្ថិ ផាន់ដារ៉ាវង្ស សម្តេច នរោត្តម សិរីវុឌ្ឍ លោក ម៉ឹង ស៊ាន លោកស្រី ចែម វេយ្យរិទ្ធ សម្តេច នរោត្តម ច័ក្រពង្ស់ លោក ពិត តាំងសាន និងលោក អ៊ុត ឈន។

សារព័ត៌មានថ្មីៗ មិនទាន់ទទួលបានព័ត៌មានទាក់ទងនឹងសមាសភាពផ្សេងទៀតដែលត្រូវផ្លាស់ប្តូរនោះឡើយ ខណៈលោក សំ ព្រហ្មនា និងលោក អ៊ឹម ឈុនលឹម សុទ្ធតែជាសមាជិកថ្មីក្នុងចំណោម៩នាក់ ហើយតំណែងជាប្រធានក្រុមប្រឹក្សាធម្មនុញ្ញ គឺអាស្រ័យលើសមាជិកទាំង៩រូប ជាអ្នកបោះឆ្នោតជ្រើសរើស។ លោក ឯក សំអុល កាន់តំណែងជាប្រធាន៣អណត្តិរួចមកហើយ។

តាមច្បាប់រដ្ឋធម្មនុញ្ញ សមាជិកនៃក្រុមប្រឹក្សាធម្មនុញ្ញចំនួន៣រូប តែងតែត្រូវបានផ្លាស់ប្តូរ ជារៀងរាល់៣ឆ្នាំម្តង។ សមាសភាពនៃក្រុមប្រឹក្សាធម្មនុញ្ញមានប្រធាន ១រូប និងសមាជិកចំនួន ៨រូប។ ក្នុងចំណោមសមាជិកទាំង៩រូបនោះ ៣រូបជ្រើសតាំងដោយរដ្ឋសភា និង៣រូបជ្រើសតាំងដោយឧត្តមក្រុមប្រឹក្សានៃអង្គចៅក្រម រីឯ៣រូបទៀតតែងតាំងដោយព្រះមហាក្សត្រ៕