កាលពីពេលថ្មីៗនេះ គេហទំព័រ TripAdvisor បានប្រកាសពីជម្រើសកោះដ៏ស្រស់ស្អាតជាងគេលើពិភពលោកសម្រាប់អ្នកទេសចរដើរកម្សាន្ត។
ដើម្បីដាក់ចំណាត់ថ្នាក់ គេហទំព័រនេះបានពឹងផ្អែកលើយោបល់របស់អ្នកទេសចររាប់លាននាក់ដែលបានធ្វើការអត្ថាធិប្បាយ បន្ទាប់ពីបានទៅកម្សាន្តនៅបណ្តាកោះទាំងនោះ។ ខាងក្រោមនេះ គឺជាឈ្មោះ និងទីតាំងកោះទាំង ១០ ដែលលោកអ្នកគួរតែសាកល្បងទៅកម្សាន្តដែរ៖
1. Providenciales គឺជាកោះជាប់ចំណាត់ថ្នាក់លេខ ១ លើពិភពលោក។ កោះនេះស្ថិតនៅភាគពាយ័ព្យនៃប្រជុំកោះ Caicos ក្នុងសមុទ្រ Caribbean ក្នុងទឹកដីចក្រភពអង់គ្លេស។ គឺជាឋានសួគ៌សម្រាប់អ្នកចូលចិត្តជ្រមុជទឹកក្រោមបាតសមុទ្រ និងកីឡាក្នុងទឹកផ្សេងៗ ដូចជាជិះទូក និងស្គីលើទឹកជាដើម។
2. Maui គឺជាកោះធំជាងគេបង្អស់ទីពីរនៃប្រជុំកោះ Hawaii នៅសហរដ្ឋអាមេរិក។ កោះនេះសម្បូរធនធានធម្មជាតិ។ វាមានឆ្នេរខ្សាច់ដ៏វែង និងស្រស់ស្អាត ថែមទាំងមានទឹកធ្លាក់ថែមទៀតផង។
3. Roatan គឺជាកោះមួយស្ថិតក្រោមអធិបតេយ្យភាពរបស់សាធារណរដ្ឋ Honduras ។ កោះនេះល្បីល្បាញដោយសារស្ថិតនៅជិតជួរផ្កាថ្មប៉ប្រ៉ះទឹកក្នុងសមុទ្រ Caribbean មានឆ្នេរខ្សាច់ពណ៌ស សម្បូររុក្ខជាតិ និងទេសភាពដ៏ត្រកាលក្រោមបាតសមុទ្រ។
4. Santorini គឺជាតំបន់ទេសចរណ៍ដ៏សំខាន់របស់ក្រិក។ សំណង់ត្រូវបានគេសាងសង់នៅលើឆ្នេរចោទនៃសមុទ្រ និងលាបពណ៌ស តែដំបូលដែលមានសណ្ឋានរាងក្រឡូមនោះលាបពណ៌ខៀវ។ អ្នកទេសចរចូលចិត្តមកមើលទេសភាពផ្ទៃសមុទ្រលើច្រាំងចោទ និងសម្រាកលំហែកាយលើឆ្នេរខ្សាច់ពណ៌ខ្មៅ។
5. Ko Tao (ប្រែថា កោះអណ្តើក) គឺជាកោះមួយស្ថិតក្នុងឈូងសមុទ្រថៃ។ គឺជាកោះដ៏ទាក់ទាញ ដោយសារសម្បូរដើមដូង មានឆ្នេរខ្សាច់ពណ៌ស និងទឹកថ្លាឆ្លុះ។ អ្នកទេសចរចូលចិត្តជ្រមុជទឹកលេងក្រោមបាតសមុទ្រ។ កោះនេះស្ថិតក្នុងអធិបតេយ្យភាពរបស់ប្រទេសថៃ។
6. Madeira គឺជាកោះមួយស្ថិតក្នុងអធិបតេយ្យភាពរបស់ប្រទេស Portugal ។ កោះនេះគ្របដណ្តប់ទៅដោយផ្កា និងដើមឈើតំបន់ត្រូពិច។ វាត្រូវបានគេឲ្យឈ្មោះថា « សួនផ្កាអណ្តែតលើផ្ទៃទឹក » ។ នៅលើកោះនេះ មានអាកាសធាតុត្រជាក់ល្មមពេញមួយឆ្នាំ គឺចន្លោះពី ១៦ ទៅ ២៣ អង់ស្សាសេ។
7. Bali គឺជាកោះមួយរបស់ប្រទេសឥណ្ឌូនេស៊ី។ កោះនេះមានឆ្នេរខ្សាច់ដ៏វែង ប្រាសាទបុរាណ និងវាលស្រែជាប់គ្នាឥតដាច់។ ឆ្នេរខាងត្បូងជាដីខ្សាច់ពណ៌ស ចំណែកឆ្នេរខាងជើង និងខាងកើតជាដីខ្សាច់ពណ៌ខ្មៅ។
8. Mauritius ស្ថិតក្នុងមហាសមុទ្រឥណ្ឌា។ គឺជាកោះដ៏សំខាន់របស់សាធារណរដ្ឋ Mauritius ។ កោះនេះកើតចេញពីភ្នំភ្លើង ប៉ុន្តែពេលនេះ ភ្នំភ្លើងលែងមានសកម្មភាពទៀតហើយ។ នៅលើកោះ មានមាត់ភ្នំភ្លើងជាច្រើនដែលក្លាយជាចំណុចទាក់ទាញភ្ញៀវទេសចរ។
9. Bora Bora គឺជាកោះមួយស្ថិតក្រោមអធិបតេយ្យភាពរបស់ប្រទេសបារាំង។ កោះនេះព័ទ្ធជុំវិញដោយថ្មប៉ប្រ៉ះទឹក។ គេអាចធ្វើសកម្មភាពច្រើនយ៉ាងដូចជា នេសាទ និងលេងកីឡាក្នុងទឹកជាដើម។ វាមានសីតុណ្ហភាពក្តៅជានិច្ច គឺចន្លោះពី ២២ ទៅ ៣០ អង់ស្សាសេ។
10. Fernando de Noronha គឺជាប្រជុំកោះរបស់ប្រទេសប្រ៊េស៊ីល ស្ថិតក្នុងមហាសមុទ្រអាត្លង់ទិច។ គឺជាកន្លែងគំរូសម្រាប់ការការពារបរិស្ថាន និងប្រព័ន្ធអេកូឡូហ្ស៊ី។