លោក អូបាម៉ា៖ ណាតូនៅតែជាសសរគោលនៃសន្តិសុខរួមរវាងអាមេរិកនិងអឺរ៉ុប

អន្តរជាតិ

លោក អូបាម៉ា៖ ណាតូនៅតែជាសសរគោលនៃសន្តិសុខរួមរវាងអាមេរិកនិងអឺរ៉ុប

05, Apr 2016 , 8:19 pm

រូបភាព

ដោយ: តន ចាន់រិទ្ធារ៉ា

លោក បារ៉ាក់ អូបាម៉ា បានហៅសម្ព័ន្ធយោធាណាតូ (NATO) ថា ជាសសរគោលនៃនយោបាយសន្តិសុខរបស់អាមេរិក និងជាសម្ព័ន្ធដ៏សំខាន់ក្នុងយុទ្ធនាការប្រយុទ្ធប្រឆាំងក្រុមភេរវកម្ម។ លោក អូបាម៉ា ក៏ចាត់ទុកណាតូជាកម្លាំងដ៏សំខាន់សម្រាប់ការពារសន្តិសុខរួមគ្នារបស់អាមេរិកនិងអឺរ៉ុបផងដែរ។ ការលើកឡើងរបស់លោក អូបាម៉ា ទំនងជាការឆ្លើយតបនឹងសម្ដីរបស់លោក ដូណាល់ ត្រាំ ដែលនិយាយថា ណាតូហួសសម័យទៅហើយ។

សូមស្ដាប់ព័ត៌មានលម្អិត៖

ក្នុងជំនួបជាមួយអគ្គលេខាធិការណាតូនៅថ្ងៃទី៤ ខែមេសា លោក បារ៉ាក់ អូបាម៉ា បានលើកសរសើរពីការចូលរួមរបស់ណាតូក្នុងការប្រយុទ្ធប្រឆាំងនឹងក្រុមរដ្ឋឥស្លាម និងយុទ្ធនាការនៅអាហ្វហ្គានីស្ថានជាដើម។ លោក អូបាម៉ា ក៏បានលើកឡើងពីជំនួយរបស់អឺរ៉ុបក្នុងការដោះស្រាយវិបត្តិជនភៀសខ្លួនដែលកំពុងអុកឡុកអឺរ៉ុបផងដែរ។

លោក អូបាម៉ា ប្រាប់លោក Jens Stoltenberg នៅបន្ទប់ពងក្រពើរបស់សេតវិមានថា៖« ណាតូនឹងបន្តជាចំណុចស្នូលនៃការការពារសន្តិសុខរួមគ្នារវាងអាមេរិកនិងអឺរ៉ុប ក៏ដូចជាគោលនយោបាយសន្តិសុខរបស់អាមេរិក»។

គេអាចយល់បានថា បើទោះជាលោក អូបាម៉ា មិនបានលើកឡើងចំឈ្មោះលោក ដូណាល់ ត្រាំ ការបញ្ជាក់របស់លោក អូបាម៉ា គឺមានន័យប្រឆាំងនឹងការអត្ថាធិប្បាយរបស់លោក ត្រាំ ដែលរិះគន់ណាតូថាមិនសមស្របនឹងការកម្ទេចនឹងក្រុមភេរវករ។ លោក ត្រាំ ថែមទាំងនិយាយថា លោកនឹងបង្ខំឲ្យសមាជិកណាតូទាំងអស់បរិច្ចាគឲ្យបានច្រើនថែមទៀត ទោះជាត្រូវប្រឈមនឹងការបែកបាក់សម្ព័ន្ធភាពក៏ដោយ។

ក្រៅពីនោះ លោក អូបាម៉ា បានអះអាងថា លោកនិងអគ្គលេខាធិការណាតូ Jens Stoltenberg ក៏បានពិភាក្សាពីតួនាទីរបស់ណាតូនៅក្នុងវិបត្តិលីប៊ី។ មេដឹកនាំទាំងពីរក៏បានពិគ្រោះយោបល់លើគម្រោងរបស់អាមេរិកដើម្បីជួយអឺរ៉ុបក្នុងការដោះស្រាយលំហូរជនភៀសខ្លួនមកពីសង្គ្រាមនៅស៊ីរី។ ត្រង់ចំណុចនេះលោក អូបាម៉ា និយាយថា ជនភៀសខ្លួនបានជ្រើសរើសយកផ្លូវគ្រោះថ្នាក់ដើម្បីធ្វើដំណើរមកអឺរ៉ុប ដូច្នេះការឆ្លើយតបគឺត្រូវតែមានមេត្តានិងប្រកបដោយការយកចិត្តទុកដាក់។

ជាមួយគ្នានេះ សារព័ត៌មានAPផ្សាយ ដែរថា លោក អូបាម៉ា ក៏មានគម្រោងបង្កើនការចំណាយបួនដងរបស់មន្ទីរបញ្ចកោណទៅលើការហ្វឹកហាត់ និងកងទ័ពអាមេរិកនៅអឺរ៉ុប។ គម្រោងនេះទំនងជាការពង្រឹងសមត្ថភាពដើម្បីទប់ទល់នឹងការគំរាមកំហែងរបស់រុស្សីចូលមកតំបន់អឺរ៉ុប។

សូមរម្លឹកដែរថា អង្គការសន្ធិសញ្ញាអាត្លង់ទិកខាងជើង (NATO) ត្រូវបានបង្កើតឡើងក្នុងឆ្នាំ១៩៤៩។ គោលការណ៍សំខាន់របស់អង្គការនេះគឺជួយគ្នាទៅវិញទៅមកក្នុងចំណោមរដ្ឋជាសមាជិក ក្នុងគ្រាអាសន្នដែលសមាជិកណាមួយរងការវាយប្រហារពីសំណាក់ប្រទេសដទៃដែលមិនមែនជាសមាជិកក្រុមខ្លួន។ ក្នុងរយៈពេល៦៧ឆ្នាំមកនេះ សម្ព័ន្ធណាតូបានចូលរួមយ៉ាងសកម្មជាមួយអាមេរិកក្នុងវិបត្តិធំៗជុំវិញពិភពលោកតួយ៉ាង ការលុកលុយនៅអ៊ីរ៉ាក់ និងជម្លោះនៅលីប៊ីជាដើម៕