អន្តរជាតិ
នយោបាយអន្តរជាតិ
អាមេរិក-ហ្វីលីពីន ផ្តើមសមយុទ្ធយោធាប្រចាំឆ្នាំរយៈពេល១១ថ្ងៃ ឌឺដងអ្នកជិតខាងចិន
ខណៈស្ថានភាពកំពុងតែតានតឹងនៅក្នុងតំបន់ជម្លោះសមុទ្រចិនខាងត្បូងរវាងភាគីពាក់ព័ន្ធ ហ្វីលីពីន និងសម្ព័ន្ធមិត្តចាក់ទឹកមិនលិចអាមេរិក បានផ្តើមសមយុទ្ធយោធាប្រចាំឆ្នាំជាមួយគ្នារយៈពេល១១ថ្ងៃ ដើម្បីពង្រឹងសមត្ថភាពយោធា និងសហប្រតិបត្តិការការពារជាតិផងដែរនោះ។ សកម្មភាពនេះ ក៏ត្រូវ បានមើលឃើញថាជាការបង្ហាញសាច់ដុំដាក់ចិន ដែលកំពុងតែបង្កើនអំណាចក្នុងតំបន់ជម្លោះនោះ។
សមយុទ្ធយោធាប្រចាំ Balikatan ដែលមានន័យថាប្រកៀកស្មាមួយនឹងមួយ រវាងកងទ័ពអាមេរិក និង ហ្វីលីពីនក្នុងទឹកដីហ្វីលីពីនរយៈពេល១១ថ្ងៃបានចាប់ផ្តើមចាប់ថ្ងៃទី០៤ ខែមេសានេះហើយ។ សមយុទ្ធ នេះ មានការចូលរួមពីយន្តហោះអាមេរិក៥៥គ្រឿង រួមជាមួយនឹងយន្តហោះចម្បាំងហ្វីលីពីនផងដែរ។
ទាំងមន្ត្រីជាន់ខ្ពស់អាមេរិក និងហ្វីលីពីន បានអះអាងថាលំហាត់យោធា មិនមានបំណងដើម្បីប្រឆាំង នឹងប្រទេសណាមួយនោះទេ ហើយហេតុផលតែមួយគត់នៃលំហាត់យោធានេះគឺ ដើម្បីបង្ហាញពីការគាំ ទ្រទ្វេភាគីរវាងប្រទេសទាំងពីរតែប៉ុណ្ណោះ។
អ្វីគួរកត់សម្គាល់នោះ សមយុទ្ធយោធានេះ ធ្វើឡើងស្របពេលដែលស្ថានភាពសមុទ្រចិនខាងត្បូង កំពុងតែឡើងកម្តៅ ជាពិសេសនោះ រវាងភាគីពាក់ព័ន្ធហ្វីលីពីន និងចិន និងចិន ជាមួយនឹងរដ្ឋខាងក្រៅ អាមេរិក។ ហ្វីលីពីន បានប្តឹងចិននៅមជ្ឈត្តការអន្តរជាតិក្រុងឡាអេនៃប្រទេសហូឡង់ដោយចោទចិន ថាបានបំពានដែនអធិបតេយ្យខ្លួនដែលជាផ្នែកមួយនៃសមុទ្រចិនខាងត្បូង។ អាមេរិក និងចិន ចោទគ្នាថា កំពុងតែប្រែក្លាយតំបន់សមុទ្រចិនខាងត្បូងឲ្យទៅជាតំបន់យោធូបនីយកម្មតាមរយៈប្រតិបត្តិការនាវាចរណ៍ក្នុងដែនសមុទ្រចិនខាងត្បូងរបស់អាមេរិក និងការបំពាក់សម្ភារយោធានៅក្នុងតំបន់ជម្លោះដោយចិន។
សូមរម្លឹកផងដែរ កាលពីពេលថ្មីៗនេះ ហ្វីលីពីន ក៏បានព្រមឲ្យមូលដ្ឋានយោធាអាកាសអាមេរិកប្រាំកន្លែងក្នុងអធិបតេយ្យហ្វីលីពីនដែលស្ថិតមិនឆ្ងាយពីតំបន់ចិនគ្រប់គ្រងប៉ុន្មាននោះទេ។ ការផ្តល់នោះធ្វើឡើងក្រោមកិច្ចព្រមព្រៀងកិច្ចសហប្រតិបត្តិការការពារជាតិនៃប្រទេសទាំងពីរដែលបានចុះហត្ថលេខាតាំងពីឆ្នាំ២០១៤ និងចូលជាធរមាននៅឆ្នាំ២០១៦នេះ។
សមយុទ្ធយោធានេះ ក៏ធ្វើឡើងស្របពេលជាមួយនឹងការមកដល់នៃនាវាមុជទឹករបស់ជប៉ុនមួយគ្រឿងដែលធ្វើទស្សនកិច្ចនៅក្នុងកំពង់ផែហ្វីលីពីនកាលពីថ្ងៃទី០៣ខែមេសា ដែលជាអតីតមូលដ្ឋានយោធា អាមេរិកផងដែរ៕
© រក្សាសិទ្ធិដោយ thmeythmey.com