ជាតិ
អន្តរជាតិ
Panama Papers ៖ រុស្ស៊ីថា ការទម្លាយឯកសារជាការប្រឆាំងឬស្អប់លោក ពូទីន
× រដ្ឋាភិបាលក្រេមឡាំងបានបដិសេធ ឯកសារសម្ងាត់ « Panama Papers» របស់ក្រុមហ៊ុនមេធាវីប៉ាណាម៉ាដែលត្រូវបានទម្លាយចេញកាលពីថ្ងៃអាទិត្យ កន្លងមកដែលមានឈ្មោះមនុស្សជំនិតរបស់លោក វ្ល៉ាឌីមៀ ពូទីន ផង។ រុស្ស៊ីថា ឯកសារ ១១.៥លានច្បាប់នោះគ្មានទម្ងន់ដាក់បន្ទុកអ្វីឡើយ ហើយការបញ្ចេញឯកសារទាញការចាប់អារម្មណ៍និងបង្ខូចឈ្មោះលោក ពូទីន របៀបនេះក៏មិនមែនជាលើកទី១ ដែរ។ សម្រាប់រុស្ស៊ី ការទម្លាយឯកសារជាការបង្កើតឡើងដើម្បីប្រឆាំងរុស្ស៊ី និងធ្វើឲ្យបុរសខ្លាំងរុស្ស៊ីលោក ពូទីន ធ្លាក់ប្រជាប្រិយភាព ខណៈដែលនៅ ២ ឆ្នាំខាងមុខនោះ រុស្ស៊ីនឹងរៀបចំបោះឆ្នោតប្រធានាធិបតីផងដែរ។
សូមស្តាប់ការបកស្រាយរបស់លោក សៅ ផលនិស្ស័យ៖
ការទម្លាយឯកសារសម្ងាត់ របស់ក្រុមហ៊ុនមេធាវីប៉ាណាម៉ា Mossack Fonseca ដែលបង្ហាញពីវិធីលាក់លុយនៅបរទេសរបស់បណ្តាមេដឹកនាំ បងប្អូនសាច់ញាតិ អ្នកនយោបាយ និងតារា ឬកីឡាករល្បីៗ បានធ្វើឲ្យកក្រើកពិភពលោក។
សមាគមអ្នកសារព័ត៌មានស៊ើបអង្កេតអន្តរជាតិ (ICIJ) និងសារព័ត៌មានអាឡឺម៉ង់ Suddeutsche Zeituជាអង្គភាពដែលដើរតួនាទីសំខាន់ជាងគេក្នុងការផ្សព្វផ្សាយនិងចែកចាយឯកសារ ជាមួយបណ្តាសារព័ត៌មានអន្តរជាតិទូទាំងពិភពលោក។ អ្នកសារព័ត៌មានអន្តរជាតិរាប់រយនាក់ កំពុងសិក្សាស្រាវជ្រាវលើឯកសារបែកធ្លាយនិងរៀបចំរបាយការណ៍លម្អិតដើម្បីផ្សព្វផ្សាយបន្តថែមទៀត។
តែខណៈការស្រាវជ្រាវ និងស៊ើបអង្កេតពាក់ព័ន្ធឯកសារនេះកំពុងបន្តរៀបចំឡើង បណ្តាមេដឹកនាំមួយចំនួនដែលមានឈ្មោះ ខ្លួនឯង ឬបងប្អូនក្នុងបញ្ជីនោះបាននាំគ្នាចេញមុខទាត់ចោលការចោទប្រកាន់ និងរិះគន់ការទម្លាយឯកសារនេះ។ ក្នុងនោះមានឈ្មោះមនុស្សជំនិតរបស់ប្រមុខរដ្ឋរុស្ស៊ីលោក វ្ល៉ាឌីមៀ ពូទីន ផងដែរ តែរដ្ឋាភិបាលរុស្ស៊ីបានចេញមុខទាត់ចោលរបាយការណ៍នេះ។
១. លោក វ្ល៉ាឌីមៀ ពូទីន ជាគោលដៅនៃការទម្លាយឯកសារ?
ឯកសារ ១១.៥លានច្បាប់នោះទម្លាយថា មន្ត្រីជាន់ខ្ពស់រុស្ស៊ីមាន លុយ ២ពាន់លានដុល្លារអាមេរិកសម្រាប់ទិញភាគហ៊ុននៅបរទេស។ ឯកសារនោះបានចោទប្រកាន់ថា ធនាគាររុស្ស៊ី Rossiya ដែលមានម្ចាស់ជាមនុស្សជំនិតនិងក្រុមគ្រួសារលោក ពូទីន នោះមានខ្សែបណ្តាញជាមួយក្រុមហ៊ុនបរទេស ហើយគេបានផ្ទេរនិងលាក់ទ្រព្យសម្បត្តិនៅក្រៅប្រទេសផង។ ហើយធនាគារនេះស្ថិតក្រោមទណ្ឌកម្មរបស់អាមេរិកនិងបណ្តាប្រទេសសហភាពអឺរ៉ុបផងដែរ។
ក្រៅពីបងប្អូនរបស់ប្រធានាធិបតីរុស្ស៊ី ឯកសារដដែលនោះក៏បានចោទប្រកាន់សាច់ញាតិមន្ត្រីធំរបស់រដ្ឋាភិបាលក្រេមឡាំង ដូចជាកូនរដ្ឋមន្ត្រីអភិវឌ្ឍសេដ្ឋកិច្ច ក្មួយប្រុសរបស់លេខាធិការក្រុមប្រឹក្សាសន្តិសុខ និងអតីតប្រធានស្ថាប័នកិច្ចការសន្តិសុខសហព័ន្ធជាដើម។
ក្រោយមានផ្សព្វផ្សាយព័ត៌មាននេះពាសពេញពិភពលោក វិមានក្រេមឡាំងបានចេញមុខឆ្លើយតបនឹងការបរិហារលោក ពូទីន របស់បណ្តាសារព័ត៌មានបរទេសជាពិសេសលោកខាងលិច។ លោក Dmitry Peskov បានវាយប្រហារបកវិញចំពោះការចោទប្រកាន់នេះ ហើយលោករៀបរាប់ថា ការទម្លាយនេះជារឿងចាស់គំរឹល ហើយវាគ្មានភស្តុតាងដែលមានទម្ងន់ដាក់បន្ទុកឡើយ ពោលគឺវាត្រឹមតែជាការស្មានៗប៉ុណ្ណោះ។ លោកសង្កត់ធ្ងន់វាក៏ជាយុទ្ធសាស្ត្រមួយដែលគេបង្កើតឡើងដើម្បីប្រឆាំងប្រធានាធិបតីរុស្ស៊ី និងបង្កើតអស្ថិរភាពនៅរុស្ស៊ីដែរ។
លោក Peskov បានពន្យល់ថា គោលដៅសំខាន់នៃការទម្លាយរឿងនេះគឺទាញការចាប់អារម្មណ៍មនុស្សទូទាំងពិភពលោក និងបង្កើតរូបភាពអវិជ្ជមានរបស់លោក វ្ល៉ាឌីមៀ ពូទីន ដើម្បីទម្លាក់ប្រជាប្រិយភាពលោកដែរ។ នេះក៏ដោយករណីបែកធ្លាយឯកសារសម្ងាត់កើតឡើងស្របពេលរុស្ស៊ីជិតដល់ពេលបោះឆ្នោតសភានិងប្រធានាធិបតីថែមទៀត។
២.ស្អប់ ឬខ្លាចលោក ពូទីន?
លោក Peskov បានហៅការទម្លាយឯកសារនេះថាជាមធ្យោបាយទាក់ទាញអ្នកទស្សនាទូទាំងពិភពលោក។ នេះក៏ដោយសារគំនិតប្រឆាំងលោក ពូទីន ឬ ជាការមិនចូលចិត្តលោក ពូទីន នៅក្នុងប្រទេសលោកខាងលិចកើនឡើងខ្លាំង។ ដូច្នេះហើយ គេត្រូវតែនិយាយពីរឿងអាក្រក់ពីលោក ពូទីន។ ហើយបើសិនជា មិនមានរឿងទេ គេចាំបាច់ត្រូវបង្កើតរឿងឡើងមក។
យ៉ាងណាក៏ដោយគ្មានភស្តុតាងជាក់លាក់ណាមួយបញ្ជាក់ថា រឿងរ៉ាវនេះវាពាក់ព័ន្ធដោយផ្ទាល់ឬដោយប្រយោលជាមួយលោក ពូទីន ឡើយ។ ដូចលើកឡើងខាងដើមស្រាប់ឯកសារនោះមានបញ្ជាក់តែពីមនុស្សជំនិតលោកប៉ុណ្ណោះ ហើយវាជាការប៉ាន់ស្មានប៉ុណ្ណោះ។
បើ យោងតាមសម្តីរបស់អ្នកនាំពាក្យខាងលើដែលស្រង់ដូច VOA កាលពីសប្តាហ៍មុន មុនពេលការទម្លាយឯកសារទ្រង់ទ្រាយធំនេះ អ្នកនាំពាក្យនេះក៏បានបង្ហើបផងដែរថា រុស្ស៊ីត្រៀមជើងព្រួលដើម្បីប្រឆាំងការប្រើប្រាស់ឃោសនានិងព័ត៌មានដើម្បីប្រឆាំងរបបដឹកនាំក្រេមឡាំងជាពិសេសលោក វ្ល៉ាឌីមៀ ពូទីន និងអ្នកជិតស្និទ្ធជាមួយលោក។
លោក Peskov ក៏ឆ្លៀតបង្ហើបថា រដ្ឋាភិបាលក្រេមឡាំងបានដឹងស្រេចទៅហើយពីសមាគមអ្នកសារព័ត៌មាន ហើយក្រុមអ្នកសារព័ត៌មានមួយចំនួនស្ថិតក្នុងចំណោមក្រុមអ្នកសារព័ត៌មានស៊ើបអង្កេតទាំងនោះមានជាមនុស្សក្រសួងការបរទេសអាមេរិក និងក្រុមទីភ្នាក់ងារចារកម្មមជ្ឈិម។ រុស្ស៊ីក៏ដឹងច្បាស់ថា ក្រុមនេះទទួលបានធនធានពីប្រភពណាផងដែរ។ បើតាមសម្តីរបស់មន្ត្រីរុស្ស៊ី របបក្រេមឡាំងជឿជាក់ថា ក្រុងវ៉ាស៊ីនតោនជាអ្នកនៅពីក្រោយការទម្លាយរឿងនេះ៕
Tag:
Panama papers
វ្ល៉ាឌីមៀ ពូទីន
© រក្សាសិទ្ធិដោយ thmeythmey.com