អន្តរជាតិ
លោក ស៊ី ជិនពីង ប្រឹងកម្ចាត់ពុករលួយ តែបងថ្លៃលោកជាប់ឈ្មោះក្នុង «Panama Papers»
× មន្ត្រីជាន់ខ្ពស់ចិនសមាជិកបក្សកុម្មុយនីស្តចិនចំនួន ៨នាក់ ក្នុងនោះមានបងថ្លៃរបស់ប្រធានាធិបតីចិនលោក ស៊ី ជិនពីង ស្ថិតក្នុងចំណោមអ្នកនយោបាយប្រហែល ១៤០ នាក់ជាប់ក្នុងបញ្ជីឯកសារលេចធ្លាយរបស់ក្រុមហ៊ុនមេធាវីប៉ាណាម៉ា Mossack Fonseca។ មានមតិរិះគន់ថា លោក ស៊ី ជិនពីង ប្រឆាំងពុករលួយក្នុងប្រទេស តែលោកបរាជ័យក្នុងការដោះស្រាយបញ្ហាសាច់ញាតិខ្លួនឯង។
ក្រោយមានការទម្លាយឯកសារសម្ងាត់របស់ក្រុមហ៊ុន Mossack Fonseca ពាក់ព័ន្ធការលាក់លុយរបស់អ្នកនយោបាយ មេដឹកនាំនិងសែស្រឡាយ រួមទាំងតារា និងកីឡាករល្បីលើពិភពលោក គ្រប់គ្នាក៏ចោលក្រសែរភ្នែកមកមើលលោក ស៊ី ជិនពីងដែលកំពុងដុតដៃដុតជើងកម្ចាត់អំពើពុករលួយនៅក្នុងប្រទេស។នេះក៏ដោយសារក្នុងឯកសារនោះក៏មានមន្ត្រីជាន់ខ្ពស់សមាជិកបក្សកុម្មុយនីស្តចិន ៨រូបដែរ ហើយអ្វីដែលពិសេសក្នុងចំណោមនោះមានលោក Deng Jiagui ជាបងថ្លៃរបស់លោក ស៊ី ជិនម្នាក់ផងដែរ។
មន្ត្រីទាំងនោះរងការចោទប្រកាន់ថា បានផ្ទេរលុយទៅបរទេសដើម្បីទិញភាគហ៊ុន ដែលនេះជាវិធីសាស្ត្រលាក់លុយនិងអាចរួចផុតពីការបង់ពន្ធលើទ្រព្យសម្បត្តិផងដែរ។ ពាក់ព័ន្ធលោក Deng Jiagui ឯកសារដែលលេចធ្លាយនោះបានបង្ហាញថា ក្នុងឆ្នាំ ២០០៩ លោកបានបង្កើតក្រុមហ៊ុនស្ថិតក្រោម ក្រុម British Virgin Islands ចំនួន ២ នៅពេលនោះលោក ស៊ី ជិនពីងនៅជាសមាជិកនៃគណកម្មាធិការអចិន្ត្រៃយ៍នៃបក្សកម្មុយនីស្តចិននៅឡើយ។
កន្លងមកក្នុងឆ្នាំ ២០១៤ សារព័ត៌មានអាមេរិក The New York Time បានចុះផ្សាយរបាយការណ៍មួយដែលបង្ហាញថា ក្រុមគ្រួសាររបស់អតីតនាយករដ្ឋមន្ត្រីចិន Wen Jiabao និង ប្រធានាធិបតី ស៊ី ជិនពីង មានទ្រព្យសម្បត្តិច្រើន។ តែក្រោយមកក្រសួងការបរទេសចិនបានចេញមុខរិះគន់របាយការណ៍នោះដោយអះអាងថា វាគ្រាន់តែជាយុទ្ធនាការបង្ខូចកេរ្តិ៍ឈ្មោះមេដឹកនាំចិនប៉ុណ្ណោះ។
ចំណែកលោក ស៊ី ជិនពីងវិញតាំងពីឡើងកាន់តំណែងមក លោកបានចាប់ផ្តើមអនុវត្តគោលនយោបាយកណ្តាប់ដៃដែកបង្ក្រាបអំពើពុករលួយក្នុងចំណោមមន្ត្រីចិនទាំងថ្នាក់លើដល់ថ្នាក់ក្រោម។ សូម្បីតែមន្ត្រីកំពូលក៏រត់មិនរួចដែរ។ ប៉ុន្តែការចោទប្រកាន់ដែលមានក្នុងឯកសារលេចធ្លាយនេះ ថ្វីបើវាមិនបានបញ្ជាក់ថាជារឿងពុករលួយឬអ្វីក៏ដោយ វាបានបង្កើតរូបភាពអវិជ្ជមានមួយ សម្រាប់ប្រមុខរដ្ឋចិនលោក ស៊ី ជិនពីងដែរ។
ដោយឡែក ខណៈ រឿងគួរឲ្យចាប់អារម្មណ៍មួយទៀត ខណៈដែលសារព័ត៌មានទូទាំងពិភពលោកនាំគ្នាផ្សព្វផ្សាយពីបញ្ហាការលេចធ្លាយឯកសារសម្ងាត់នេះ សារព័ត៌មានក្នុងស្រុករបស់ចិនហាក់ដូចជាស្ងៀមស្ងាត់មិនបានផ្សព្វផ្សាយអ្វីពាក់ព័ន្ធបញ្ហានេះទេ។ ដែលនេះវាជារឿងចម្លែកមួយដែរ ឬក៏រដ្ឋាភិបាលដាក់កំហិតមិនឲ្យមានការផ្សព្វផ្សាយ?
© រក្សាសិទ្ធិដោយ thmeythmey.com