អន្តរជាតិ
នយោបាយអន្តរជាតិ
ការប្រជែងក្នុងបក្សកាន់តែស្រួចស្រាល់ ក្រោយ សេនដឺ និងថេត គ្រុស ឈ្នះនៅរដ្ឋ Wisconsin
× បេក្ខជនបក្សប្រជាធិបតេយ្យលោក ប៊ែនី សេនដឺ (Bernie Sanders) និងបេក្ខជនបក្សសាធារណរដ្ឋលោក ថេត គ្រុស (Ted Cruz) បានទទួលជ័យជម្នះនៅក្នុងការបោះឆ្នោត (Primaries)នៅរដ្ឋWisconsin ថ្ងៃអង្គារទី ៥ ខែមេសា។ ជ័យជម្នះរបស់អ្នកទាំងពីរបង្ហាញថា ការប្រជែងគ្នាដើម្បីឆ្ពោះទៅរកការតែងតាំងពីបក្សមិនទាន់ដល់ទីបញ្ចប់នៅឡើយទេ។
ក្នុងការបោះឆ្នោតសាកល្បងក្នុងបក្ស នៅរដ្ឋ Wisconsin លោក ប៊ែនី សេនដឺ បានផ្តួលគូប្រជែងលោកគឺលោកស្រី ហ៊ីឡារី គ្លីនតុន (Hillary Clinton)។ យោងតាមលទ្ធផលបោះឆ្នោត សមាជិកព្រឹទ្ធសភារដ្ឋ Vermont លោក សេនដឺ បានទទួលសំឡេងគាំទ្រ ៥៧ភាគរយ ខណៈលោកស្រី ហ៊ីឡារី គ្លីនតុនបានសំឡេងគាំទ្រត្រឹមតែ ៤៣ភាគរយប៉ុណ្ណោះ។
លោក សេនដឺ កាន់តែមានសង្ឃឹមជាងមុន ក្រោយពេលដែលលោកបានឈ្នះនៅក្នុងរដ្ឋនេះ ហើយវាក៏សារមួយសម្រាប់លោកស្រី អតីតរដ្ឋមន្ត្រីការបរទេស ហ៊ីឡារី គ្លីនតុន ផងដែរថា សមរភូមិនយោបាយឆ្ពោះទៅរកការតែងតាំងពីបក្សមិនទាន់ឈានដល់ទីបញ្ចប់នៅឡើយទេ។ តែលោកស្រីនឹងនាំមុខលោក សេនដឺ វិញនៅក្នុងការបោះឆ្នោតនៅទីក្រុង ញ៉ូវយ៉ក ថ្ងៃ ១៩ ខែមេសាខាងមុខ ហើយនិងការបោះឆ្នោតនៅរដ្ឋ Pennsylvania ដែលត្រូវរៀបចំឡើងក្នុងពេលមួយសប្តាហ៍បន្ទាប់គ្នានោះ។
ចំណែកខាងគណបក្សសាធារណរដ្ឋវិញ សមាជិកព្រឹទ្ធសភារដ្ឋតិចសាស លោក ថេត គ្រុស បានយកឈ្នះលើសេដ្ឋីអចលនទ្រព្យ ដូណាល់ ត្រាំ (Donald Trump) ដែលនេះជាក្តីសង្ឃឹមថ្មីមួយទៀតសម្រាប់លោកក្នុងឈានទៅទទួលបានការតែងតាំងពីបក្ស។ លោកបានសំឡេងគាំទ្រ ៤៩ ភាគរយ ខណៈលោក ដូណាល់ ត្រាំ បានត្រឹម៣៥ភាគរយ ហើយលោក ចន កាសិក (John Kasich) បានការគាំទ្រត្រឹម ១៤ភាគរយប៉ុណ្ណោះ។
តាមពិតទៅមុនបោះឆ្នោត លោក ដូណាល់ ត្រាំ ឯណោះទេដែលរំពឹងថា នឹងទទួលជ័យជម្នះក្នុងរដ្ឋ Wisconsin តែចុងក្រោយលោក ថេត គ្រុស ឯណោះទេដែលមានប្រៀបនោះ។ ជ័យជម្នះរបស់លោក ថេត គ្រុស ពេលនេះ កាន់តែធ្វើឲ្យការប្រជែងគ្នាក្នុងបក្សកាន់តែស្រួចស្រាល់ខ្លាំង ហើយវាក៏ធ្វើឲ្យសេដ្ឋីអចលនទ្រព្យ ដូណាល់ ត្រាំ បារម្ភផងដែរ ព្រោះលោកធ្លាប់មានសុទិដ្ឋិនិយមខ្ពស់ថា មានតែខ្លួនម្នាក់ទេនឹងអាចទទួលបានការតែងតាំងពីបក្សក្នុងសមាជខែកក្កដានោះ។ សម្រាប់បក្សសាធារណរដ្ឋ ដើម្បីទទួលបានការតែងតាំងពីបក្ស បេក្ខជននោះត្រូវរកចំនួនអ្នកតំណាង (delegate) ឲ្យបាន ១២៣៧នាក់៕
Tag:
ថេត គ្រុស
ប៊ែនី សេនដឺ
Primarie
© រក្សាសិទ្ធិដោយ thmeythmey.com