ឥណ្ឌូនេស៊ី កម្ទេចទូកនេសាទខុសច្បាប់វៀតណាម និងម៉ាឡេស៊ី២៣គ្រឿង

អន្តរជាតិ

ឥណ្ឌូនេស៊ី កម្ទេចទូកនេសាទខុសច្បាប់វៀតណាម និងម៉ាឡេស៊ី២៣គ្រឿង

06, Apr 2016 , 1:38 pm

រូបភាព

ដោយ: ថ្មីៗ

អាជ្ញាធរឥណ្ឌូនេស៊ី នៅថ្ងៃទី៥ ខែមេសាម្សិលមិញ បានដុចកម្ទេចទូកនេសាទបរទេស២៣គ្រឿង ដែលឥណ្ឌូនេស៊ីឃាត់ទុក ដោយបានចោទថាចូលនេសាទខុសច្បាប់ក្នុងដែនសមុទ្ររបស់ខ្លួន។ ការកម្ទេចនេះ ធ្វើឡើងខណៈពេលបញ្ហាសមុទ្រក្នុងតំបន់កំពុងតែមានបញ្ហាស្រាប់ផងដែរនោះ។

ឥណ្ឌូនេស៊ី បានដុតកម្ទេចទូកនេសាទខុសច្បាប់វៀតណាម១៣ គ្រឿងនិងម៉ាឡេស៊ី១០គ្រឿង ក្នុងពេលតែមួយ នៅក្នុងទីតាំងចំនួនប្រាំពីរ និងដែលជាផ្នែកមួយនៃសមុទ្រចិនខាងត្បូងផង។ នេះបើយោងតាមភ្នាក់ងារព័ត៌មាន Xinhua។

រដ្ឋមន្ត្រីនៃក្រសួងកិច្ចការដែនសមុទ្រ និងនេសាទ លោកស្រី Susi Pudjiastuti បានប្រាប់អ្នកសារព័ត៌មាននៅក្នុងក្រុងហ្សាកាតាថា រដ្ឋាភិបាលនឹងបន្តកម្ទេចនាវា ឬទូកនេសាទទាំងឡាយណា ដែលចូលដែនទឹកឥណ្ឌូនេស៊ីខុសច្បាប់។

ឥណ្ឌូនេស៊ីដែលជាប្រទេសមានបណ្តុំកោះធំ និងច្រើនជាងគេរបស់ពិភពលោក បានចាប់ផ្តើមចាត់វិធានការតឹងរ៉ឹង ប្រឆាំងនឹងការនេសាទខុសច្បាប់ ចាប់តាំងពីលោកប្រធានាធិបតី ចូកូ វីដូដូ ឡើងកាន់តំណែងក្នុងឆ្នាំ២០១៤។ វិធានការនេះ ធ្វើឡើងក៏ដោយសារតែការនេសាទខុសច្បាប់ បានធ្វើឲ្យឥណ្ឌូនេស៊ីបាត់បង់ចំណូលជាតិជាច្រើនលានដុល្លារ ។

សូមបញ្ជាក់ថាកាលពីខែកុម្ភៈកន្លងទៅ អាជ្ញាធរឥណ្ឌូនេស៊ី ក៏បានកម្ទេចទូកនេសាទរបស់ ហ្វីលីពីន វៀតណាម ម៉ាឡេស៊ី និងមីយ៉ាន់ម៉ាសរុប២៧គ្រឿង ដោយចោទថាចូលនេសាទដោយខុសច្បាប់ ក្នុងដែនអធិបតេយ្យរបស់ខ្លួន៕