ជាតិ
ទូត បារាំង និងអាមេរិក ត្រៀមធ្វើការជាមួយលោក ប្រាក់ សុខុន
× ស្ថានទូតបារាំង និងអាមេរិកបានសាទរចំពោះលោក ប្រាក់ សុខុន ដែលបានក្លាយជាប្រមុខការទូតនៃប្រទេសកម្ពុជា ជំនួសលោក ហោ ណាំហុង ដែលបានចូលនិវត្ត។ ទាំងស្ថានទូតបារាំង និងស្ថានទូតអាមេរិក បានសំដែងការពេញចិត្តក្នុងការបំពេញការងារជាមួយលោករដ្ឋមន្ត្រីការបរទេសថ្មីរបស់កម្ពុជា។
ស្ថានទូតបារាំងបានសំដែងការពេញចិត្តខ្លាំងចំពោះវត្តមានរបស់លោក ប្រាក់ សុខុន ក្នុងតំណែងថ្មីជាប្រមុខការទូតកម្ពុជា។ ស្ថានទូតបារាំងបានចាត់ទុកលោក ប្រាក់ សុខុន អតីតឯកអគ្គរាជទូតកម្ពុជាប្រចាំប្រទេសបារាំង ថាជាអ្នកស្គាល់ច្បាស់អំពីទំនាក់ទំនងរវាងកម្ពុជានិងបារាំង។ ការអត្ថាធិប្បាយរបស់ស្ថានទូតបារាំងយ៉ាងនេះ ត្រូវបានធ្វើឡើងតាមរយៈលោក នីកូឡា បូដ្វាំង (Nicolas BAUDOUIN) លេខាទីមួយ និងជាអ្នកនាំពាក្យរបស់ស្ថានទូតបារាំងប្រចាំកម្ពុជា ដែលបានឆ្លើយតបសំនួររបស់សារព័ត៌មានថ្មីៗ តាមសារអេឡិចត្រូនិក។ លោកលេខាស្ថានទូតបារាំងដដែលក៏មិនបានភ្លេចលើកសរសើរស្នាដៃរបស់លោក ហោ ណាំហុង ដែលបានចូលរួមពង្រឹងចំណងការទូតរវាងប៉ារីស និងភ្នំពេញក្នុងអាណត្តិរបស់លោកនោះទេ។
«ទំនាក់ទំនងរវាងប្រទេសយើងទាំងពីរត្រូវបានបង្កើតឡើងដ៏យូរលង់មកហើយ និងក្រោមបុព្វហេតុនៃមិត្តភាព និងភាពទុកចិត្តគ្នា។ ជាមួយនឹងការតែងតាំងលោក ចែម វិដ្យ៉ា ជាឯកអគ្គរាជទូតកម្ពុជានៅប៉ារីស និងការឡើងកាន់តំណែងរបស់លោក ប្រាក់ សុខុន ជារដ្ឋមន្ត្រីការបរទេសកម្ពុជា យើងសង្ឃឹមថា ការសន្ទនាផ្នែកនយោបាយ ការផ្លាស់ប្តូរពាណិជ្ជកម្ម និងធនធានមនុស្សនឹងបន្តរីកចម្រើន ហើយស្ថានទូតបារាំងពេញចិត្តនឹងធ្វើការជាមួយលោក ប្រាក់ សុខុន»។ នេះជាការបញ្ជាក់របស់លោក នីកូឡា បូដ្វាំង។
ពីស្ថានទូតមហាអំណាចអាមេរិកឯណោះវិញ ក៏ដូចគ្នាដែរ។ ប្រធានការិយាល័យកិច្ចការសាធារណៈ និងជាអ្នកនាំពាក្យស្ថានទូតអាមេរិកប្រចាំកម្ពុជា លោក Jay R. Raman បានប្រាប់សារព័ត៌មានថ្មីៗ ថាស្ថានទូតអាមេរិកសាទររដ្ឋមន្ត្រីថ្មី និងមន្ត្រីជាន់ខ្ពស់នានាផ្សេងទៀត ដែលជាសមាសភាពថ្មីក្នុងការរុះរើគណៈរដ្ឋមន្ត្រី ហើយដែលរដ្ឋសភាបានផ្តល់សេចក្តីទុកចិត្ត។
អ្នកនាំពាក្យស្ថានទូតអាមេរិកបានឆ្លើយតបយ៉ាងដូច្នេះ៖«យើងស្វាគមន៍ឱកាសនៃការធ្វើការងារជាមួយគ្រប់អ្នកពាក់ព័ន្ធទាំងអស់នៅក្នុងរដ្ឋាភិបាលកម្ពុជា ដើម្បីបន្តទំនាក់ទំនងឲ្យកាន់តែស៊ីជម្រៅរវាងសហរដ្ឋអាមេរិក និងកម្ពុជា»៕
Tag:
ទំនាក់ទំនងការទូត
ប្រាក់ សុខុន
Jay Raman
Nicolas Baudouin
© រក្សាសិទ្ធិដោយ thmeythmey.com