អន្តរជាតិ
នយោបាយអន្តរជាតិ
លោកស្រី ស៊ូជី ជួបរដ្ឋមន្ត្រីការបរទេសចិនមុនគេ តែមិននិយាយរឿងវារីអគ្គីសនី រដ្ឋមន្ត្រីការបរទេសមីយ៉ាន់ម៉ា លោកស្រី អ៊ុងសាន ស៊ូជី ជួបជាមួយសមភាគីលោក វ៉ាង យី
× លោកស្រី អ៊ុងសាន ស៊ូជី បានជួបជាមួយសមភាគីចិនលោក វ៉ាង យី នៅទីក្រុងណៃពិដោ ដែលជាជំនួបលើកទីមួយរបស់លោកស្រី ស៊ូជី ក្នុងនាមជារដ្ឋមន្ត្រីការបរទេសថ្មីរបស់រដ្ឋាភិបាលស៊ីវិលមីយ៉ាន់ម៉ា។ យ៉ាងណាក្ដី ភាគីទាំងពីមិនបានពិភាក្សាលើបញ្ហាវារីអគ្គីសនី Myitsone ដ៏ចម្រូងចម្រាសនោះទេ ដោយលោកស្រី ស៊ូជី អះអាងថា លោក វ៉ាង យី គ្រាន់តែមកពង្រឹងទំនាក់ទំនងប៉ុណ្ណោះ។
សូមស្ដាប់ព័ត៌មានលម្អិត៖
រដ្ឋមន្ត្រីការបរទេសចិន វ៉ាង យី ក្លាយជាមន្ត្រីបរទេសជាន់ខ្ពស់ដំបូងគេដែលជួបលោកស្រី អ៊ុងសាន ស៊ូជី ដែលទើបចូលកាន់តំណែងជារដ្ឋមន្ត្រីការបរទេសមីយ៉ាន់ម៉ាក្នុងអាណត្តិប្រធានាធិបតីស៊ីវិលលោក ធិន ច។ ភាគីទាំងពីរបានពិភាក្សាគ្នាលើការពង្រឹងទំនាក់ទំនងរវាងប្រទេសទាំងពីរ ក្រោយការបង្កើតរដ្ឋាភិបាលថ្មីនៅមីយ៉ាន់ម៉ា ប៉ុន្តែគម្រោងវារីអគ្គីសនី Myitsone មិនត្រូវបានលើកឡើងក្នុងជំនួបនៅថ្ងៃទី៥ ខែមេសានោះទេ។
និយាយក្នុងសន្និសីទកាសែតរួមគ្នា លោកស្រី ស៊ូជី បញ្ជាក់ថា លោកស្រីមិនបានពិគ្រោះរឿងវិនិយោគអ្វីនោះទេ ដោយរួមទាំងគម្រោងវារីអគ្គីសនីនៅរដ្ឋកាឈិនផងដែរ។ លោកស្រីថា រដ្ឋមន្ត្រីការបរទេសចិនមកនេះដើម្បីតែអបអររដ្ឋាភិបាលថ្មីមីយ៉ាន់ម៉ា និងដើម្បីពង្រីកមិត្តភាពប្រទេសទាំងពីរប៉ុណ្ណោះ។ លោកស្រី និងលោក វ៉ាង មិនបានពិគ្រោះពីរឿងពិស្ដារអ្វីទេ។
ចំណែកឯ រដ្ឋមន្ត្រីការបរទេសចិនក៏អះអាងដែរថា លោកមកមីយ៉ាន់ម៉ាគឺតាមការអញ្ជើញរបស់លោកស្រី ស៊ូជី ។ លោក វ៉ាង យី ប្រាប់អ្នកសារព័ត៌មានថា មីយ៉ាន់ម៉ាកំពុងស្ថិតនៅចំណុចចាប់ផ្ដើមនៃប្រវត្តិសាស្ត្រថ្មី ហើយចិនសង្ឃឹមនិងជឿជាក់ថា រដ្ឋាភិបាលថ្មីនឹងបង្រួបបង្រួមគ្រប់ភាគីទាំងអស់ និងដឹកនាំប្រទេសទៅកាន់ការអភិវឌ្ឍ។
រដ្ឋមន្ត្រីការបរទេសចិនរូបនេះបន្ថែមថា ចិនត្រៀមខ្លូនរួចរាល់ដើម្បីធ្វើការជាមួយរដ្ឋាភិបាលមីយ៉ាន់ម៉ាក្នុងការបន្តទំនាក់ទំនងប្រពៃណីរវាងចិននិងមីយ៉ាន់ម៉ា ពង្រឹងការទុកចិត្តផ្នែកនយោបាយ ក៏ដូចជាពង្រីកកិច្ចសហប្រតិបត្តិការផលប្រយោជន៍ទៅវិញទៅមក។ លោកក៏សង្ឃឹមដែរថា ទំនាក់ទំនងរវាងបក្សកាន់អំណាចទាំងពីរប្រទេស ក៏ត្រូវបានពង្រឹងតាមរយៈការផ្លាស់ប្ដូរបទពិសោធគ្រប់គ្រងរដ្ឋជាដើម។
សូមបញ្ជាក់ថា ជំនួបរវាងលោកស្រី ស៊ូជី និងរដ្ឋមន្ត្រីការបរទេសចិន វ៉ាង យី ធ្វើឡើងតែប៉ុន្មានថ្ងៃក្រោយរដ្ឋាភិបាលថ្មីដែលដឹកនាំគណបក្សសម្ព័ន្ធជាតិដើម្បីប្រជាធិបតេយ្យ ចូលកាន់តំណែងផ្លូវការនៅថ្ងៃទី១ ខែមេសា។ ដោយសារមិនស្របលក្ខខណ្ឌរដ្ឋធម្មនុញ្ញ លោកស្រី ស៊ូជី បានត្រឹមធ្វើជាទីប្រឹក្សារដ្ឋ ជារដ្ឋមន្ត្រីការបរទេស និងជារដ្ឋមន្ត្រីការិយាល័យប្រធានាធិបតីប៉ុណ្ណោះ។
គេអាចយល់បានថា ទស្សនកិច្ចរបស់លោក វ៉ាង យី នៅពេលនេះ គឺដើម្បីទាក់ទាញរដ្ឋាភិបាលថ្មីមីយ៉ាន់ម៉ាឲ្យងាកមករកខ្លួន និងដើម្បីការពារផលប្រយោជន៍ចិននៅក្នុងមីយ៉ាន់ម៉ា ជាពិសេសគម្រោងនានាដែលត្រូវបានផ្ដល់ដោយរដ្ឋាភិបាលលោក ថេន សេន។ ក្រុមហ៊ុនចិនទទួលបានសិទ្ធិវិនិយោគជាច្រើននៅមីយ៉ាន់ម៉ា ប៉ុន្តែរងការិះគន់ខ្លាំងពីពលរដ្ឋ ជាក់ស្ដែងនោះ គឺគម្រោងវារីអគ្គីសនីMyitsone ដ៏ចម្រូងចម្រាស៕
Tag:
អ៊ុងសាន ស៊ូជី
វ៉ាងយី
© រក្សាសិទ្ធិដោយ thmeythmey.com