អន្តរជាតិ
នយោបាយអន្តរជាតិ
កូរ៉េខាងត្បូង ថា កូរ៉េខាងជើង អាចនឹងដាក់ពង្រាយប្រព័ន្ធបាញ់រ៉ុកកែ្កតប្រភេទថ្មីនៅចុងឆ្នាំនេះ
រដ្ឋមន្ត្រីការពារជាតិកូរ៉េខាងត្បូង Han Min-Koo
×![]()
ភាពតានតឹងនៅក្នុងឧបទ្វីបកូរ៉េ បានជំរុញឲ្យប្រទេសពាក់ព័ន្ធ ជាពិសេសកូរ៉េខាងជើង និងកូរ៉េខាងត្បូង ព្យាយាមពង្រឹង និងពង្រីកសមត្ថភាពយោធាការពាររៀងៗខ្លួន។ ជាមួយគ្នានេះ រដ្ឋាភិបាលក្រុងសេអ៊ូល បានអះអាងថាក្រុងព្យុងយ៉ាង នឹងដំឡើងមូលដ្ឋានរ៉ុកក្កែតប្រភេទថ្មីដ៏មានឥទ្ធិពលនៅចុងឆ្នាំ២០១៦នេះផងដែរ។
រដ្ឋមន្ត្រីក្រសួងការពារជាតិកូរ៉េខាងត្បូងលោក Han Min-Koo បានរំពឹងថាកូរ៉េខាងជើង អាចនឹងបញ្ចប់នូវការអភិវឌ្ឍប្រព័ន្ធដំណើរការនៃការបាញ់គ្រាប់រ៉ុកក្កែតច្រើនគ្រាប់ប្រភេទថ្មី 300-mm ដែលអាចនឹងដំឡើងនៅក្នុងមូលដ្ឋានយោធានៅចុងឆ្នាំនេះផងដែរ។ ការលើកឡើងនេះ ធ្វើឡើងក្នុងកិច្ចសម្ភាសន៍ជាមួយនឹងអ្នកសារព័ត៌មាននៅថ្ងៃទី០៦ ខែមេសា ម្សិលមិញនេះ។
ប្រមុខការពារជាតិរូបនោះ ក៏បានបន្ថែមដែរថាកងទ័ពកូរ៉េខាងត្បូង និងសហរដ្ឋអាមេរិក បានតាមដានដំណើរការអភិវឌ្ឍន៍រយៈពេលបីឆ្នាំមកហើយ ដែលក្នុងនោះ គេបានរកឃើញថាប្រព័ន្ធដំណើរការរ៉ុកក្កែតជាពហុគ្រាប់នោះ អាចសន្សំការចំណាយច្រើន បើប្រៀបធៀបទៅនឹងមីស៊ីលបាលីស្ទីក និងអាចជំនួសមីស៊ីលដែលអាចបាញ់បានចម្ងាយឆ្ងាយប្រភេទ Scud ទៀតផង។ នេះបើយោងតាមសារព័ត៌ មានចិន People’s Daily។
ប្រព័ន្ធដំណើរការនៃរ៉ុកក្កែតថ្មីនោះ អាចនឹងបាញ់បានចម្ងាយប្រមាណ២០០គីឡូម៉ែត ដែលអាចកម្ទេចទីស្នាក់ការកណ្តាលទ័ពជើងគោក ជើងទឹក និងទព័អាកាសនៅចំកណ្តាលនៃប្រទេស និងមូលដ្ឋាន ទ័ពអាមេរិកនៅភាគខាងលិចនៃកូរ៉េខាងត្បូងទៀតផង។ នេះបើយោងតាមប្រភពព័ត៌មានដដែលដែល បានដកស្រង់សម្តីលោក Han ដែលថា ទាហានកូរ៉េខាងត្បូង អាចមានសមត្ថភាពគ្រប់គ្រាន់ដើម្បី ទប់ទល់ជាមួយប្រព័ន្ធបាញ់គ្រាប់រ៉ុកក្កែតដោយមីស៊ីលទល់ដី(Surface-to-surface) មីស៊ីលនៅលើអាកាស និង រ៉ាដាប្រឆាំងគ្រាប់ផ្លោងរបស់កូរ៉េខាងត្បូង។
ទាក់ទងជាមួយកម្មវិធីនុយក្លេអ៊ែររបស់កូរ៉េខាងជើង លោក Han ថាក្រុងព្យុងយ៉ាង អាចសាកល្បងការបាញ់គ្រប់ពេលដែលមេដឹកនាំកំពូលកូរ៉េខាងជើងចង់ធ្វើ តែលោក ថា ទាហានកូរ៉េខាងត្បូងបាននិងកំពុងតាមដានយ៉ាងស្វិតស្វាញនៅទីកន្លែងដែលគ្រាប់បែកនុយក្លេអ៊ែរអាចនឹងត្រូវសាកល្បងនោះ។
បន្ថែមពីនេះ លោកប្រមុខការពារជាតិកូរ៉េខាងត្បូង ក៏បានផ្ញើសារចុងក្រោយទៅក្រុងព្យុងយ៉ាងដោយ ទទួចឲ្យបញ្ឈប់ការសាកល្បងគ្រាប់នុយក្លេអ៊ែរ និងដំណើរការមីស៊ីលបាលីស្ទីកទៅទៀត។ លោក ព្រមានថាកូរ៉េខាងជើង អាចនឹងដើរដល់ផ្លូវមួយគឺការបំផ្លាញខ្លួន បើនៅតែបន្តសកម្មភាពទាំងនោះ។
សូមបញ្ជាក់ផងដែរថា ថ្មីៗនេះ បងប្អូនកូរ៉េទាំងពីរ បានបង្ហាញសាច់ដុំយោធាដាក់គ្នាតាមរយៈសមយុទ្ធ យោធាទ្រង់ទ្រាយធំ។ មិនត្រឹមតែប៉ុណ្ណោះ កូរ៉េទាំងពីរ ក៏បានព្រមានបាញ់កម្ទេចដាក់គ្នាទៅវិញទៅមក ដោយអាវុធធុនធ្ងន់ទៀតផង៕
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 2 ថ្ងៃ
