អន្តរជាតិ
នយោបាយអន្តរជាតិ
សមុទ្រចិនខាងត្បូង រូបភាព Sputnik
×![]()
អវត្តមាននៃដំណោះស្រាយរួមលើជម្លោះសមុទ្រចិនខាងត្បូង កំពុងតែធ្វើឲ្យបញ្ហានេះកាន់តែស្មុគស្មាញ និងជាពិសេសនោះ ភាគីជម្លោះនីមួយៗ បាននិងកំពុងតែងាកមកពង្រឹងសមត្ថភាពយោធារៀងៗខ្លួនគួរឲ្យព្រួយបារម្ភ។ ជាមួយគ្នាសិង្ហបុរីដែលជាស្ថាបនិកអាស៊ានមួយដែរនោះ បានទទូច និងព្រមានភាគីពាក់ ព័ន្ធទាំងអស់ធានាឲ្យបានការមិនប្រើប្រាស់យោធាដើម្បីដោះស្រាយនៃជម្លោះនោះ។ 
លោករដ្ឋមន្ត្រីការបរទេសសិង្ហបុរី Vivian Balakrishnan នៅថ្ងៃទី០៧ ខែមេសានេះ បានទទូចរាល់ភាគី ទាមទារអធិបតេយ្យសមុទ្រចិនខាងត្បូងបន្តស្វែងរកមធ្យោបាយទាំងឡយណាដែលមិនប្រើប្រាស់យោធាដើម្បីដោះស្រាយជម្លោះ។ ការលើកឡើងនេះ ធ្វើឡើងក្នុងការជជែករបស់គណៈកម្មាធិការផ្គត់ផ្តង់នៃសភាសិង្ហបុរី។
លោក Balakrishnan បានបញ្ជាក់ថា «យើងកំពុងតែនៅក្នុងស្ថានភាពដែលអាចនឹងខាតបង់ ប្រសិនបើ ភាពតានតឹងកាន់តែរីករាលធ្ងន់ធ្ងរ។ វា ពិតជាសំខាន់ណាស់ក្នុងការរក្សានូវការបើកចំហនៃការសន្ទនាលើបញ្ហាដែលជាក្តីបារម្ភរួមដើម្បីទប់ស្កាត់បញ្ហាកាន់តែធ្ងន់ធ្ងរដែលជាស្រមោលនៃទំនាក់ទំនងអាស៊ាន-ចិន»។ នេះបើយោងតាមសារព័ត៌មាន Channel News Asia។
ប្រមុខកាទូតរូបនោះ ក៏បានសង្កត់ដែរថា គោលជំហររបស់សិង្ហបុរី គឺអាស៊ាន និងចិន គួរតែបន្តប្តេជ្ញាក្នុងការធ្វើការឆ្ពោះទៅមុខដោយអនុវត្តដោយពេញលេញ និងប្រសិទ្ធភាពលើសេចក្តីថ្លែងការណ៍ស្តីពី ភាគីនៃក្រមប្រតិបត្តិសមុទ្រចិនខាងត្បូង។ សេចក្តីថ្លែងការណ៍ស្តីពីភាគីនៃក្រមប្រតិបត្តិសមុទ្រចិនខាង ត្បូង គឺជាលិខិតតូបករណ៍តែមួយរបស់អាស៊ានជាមួយចិនដែលធ្វើឡើងក្នុងឆ្នាំ២០០២ ក្នុងពេលដែលកម្ពុជាធ្វើជាប្រធានអាស៊ានដែលបានបញ្ញត្តិពីយន្តការ និងមធ្យោបាយមួយចំនួនដើម្បីសម្រាលភាពតានតឹងនៅក្នុងតំបន់ជម្លោះ។
សូមបញ្ជាក់ផងដែរ បញ្ហាសមុទ្រចិនខាងត្បូង គឺជាជម្លោះអធិបតេយ្យដែលមានរដ្ឋពាក់ព័ន្ធអាស៊ាន រួមមានព្រុយណេ ម៉ាឡេស៊ី ហ្វីលីពីន និងវៀតណាម ជាមួយនឹងចិន។ បញ្ហានេះ បានអូសបន្លាយដោយគ្មានដំណោះស្រាយអស់រយៈ៤ទសវត្សរ៍មកហើយ ដ្បិតចិន ដែលជាភាគីទាមទារស្ទើរតែទាំងអស់បានប្រើប្រាស់អំណេះអំណាងប្រវត្តិសាស្ត្រ ខណៈរដ្ឋពាក់ព័ន្ធអាស៊ាន ប្រើប្រាស់អំណេះអំណាង ដោយយោងតាមច្បាប់អន្តរជាតិ។ អំណេះអំណាងទាំងពីរ គឺផ្ទុយគ្នាទាំងស្រុង។
រយៈពេលចុងក្រោយនេះ ជម្លោះសមុទ្រចិនខាងត្បូង កំពុងតែឡើងកម្តៅ ដ្បិតចិននៅបន្តសកម្មភាពវាតទីនៅក្នុងតំបន់ជម្លោះដោយថែមទាំងសាងសង់កោះសិប្បនិម្មិត និងបំពាក់សម្ភារយោធាដែលចិន ថាធ្វើឡើងដើម្បីការពារផលប្រយោជន៍ស៊ីវិល។ មិនត្រឹមតែប៉ុណ្ណោះ បញ្ហានេះបានជំរុញឲ្យមានភាគីទីបីដែលមិនមែនជាភាគីទាមទារគឺអាមេរិក ដែលបានបញ្ចេញសកម្មភាពយ៉ាងសកម្មនៅក្នុងតំបន់ ជម្លោះនោះ។ សកម្មភាពទាំងនោះ គឺអាមេរិក បានប្រតិបត្តិការនាវាល្បាត និងយន្តហោះទម្លាក់គ្រាប់ ក្នុងសមុទ្រចិនខាងត្បូងក្រោមហេតុផលនៃការអនុវត្តសិទ្ធិសេរីភាពនៃការធ្វើនាវាចរណ៍ដែនទឹក និង សេរីភាពដែនអាកាស៕
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 2 ថ្ងៃ
